الداعى جىلى قازاقستاننىڭ ىشكى جالپى ءونىمى وسەدى. بۇل تۋرالى استانادا وتكەن «قازاقستان: جاڭا ينۆەستيتسيالىق مۇمكىندىكتەر» اتتى كونفەرەنتسيا ەۋروپا قايتا قۇرۋ جانە دامۋ بانكىنىڭ قازاقستانداعى بولىمشەسىنىڭ جەتەكشىسى دجانەت حەكمان ايتتى.
«ەۋروپالىق قايتا قۇرۋ جانە دامۋ بانكى قازاقستاندا بارلىق سالالاردى قارجىلاندىرىپ جاتىر. سول سەبەپتى باسقا xالىقارالىق ۇيىمدار مەن دونورلىق كومپانيالارعا قاراعاندا, ءبىز وسى ەلدەگى جاعدايدى جاقسى بىلەمىز. بۇگىندە ءبىز ءباسپاسوز بەتتەرىندە سان الۋان بولجامداردى وقىپ ءجۇرمىز. دەگەنمەن, ءبىزدىڭ ەكونوميستەر بولاشاققا وپتيميستىك كوزقاراسپەن قاراپ وتىر. بىزدىڭشە, بۇگىندە قازاقستان مۇناي-گاز سالاسىنداعى ەكونوميكالىق قۇلدىراۋ كەزەڭىنەن ءوتتى. مەملەكەت اتالعان سىناقتى ءساتتى ەڭسەرە ءبىلدى. سوندىقتان بيىل ىشكى جالپى ءونىم شامامەن 0,7 پايىزعا وسەدى دەگەن بولجام بار. ال كەلەسى جىلى ول كورسەتكىش 2,4 پايىزعا كوتەرىلەدى. ءبىزدىڭ ەسەبىمىزگە سايكەس, قازىرگى كەزدە ينفلياتسيا ءوزىنىڭ شارىقتاۋ شەگىنە جەتتى. ەندى, اعىمداعى جىلدىڭ اياعىنا دەيىن, سوسىن كەلەسى ايدا اقشا مەن اكتيۆتەردىڭ اينالىمى قالىپتى دەڭگەيگە ورالادى», دەدى دجانەت حەكمان.
ايتقانداي,«قازاقستان: جاڭا ينۆەستيتسيالىق مۇمكىندىكتەر» اتتى كونفەرەنتسيا ينۆەستيتسيالار جانە دامۋ ءمينيسترى جەڭىس قاسىمبەكتىڭ قاتىسۋىمەن ءوتتى. شارا ەل تاۋەلسىزدىگىنىڭ 25 جىلدىعىنا وراي ۇيىمداستىرىلدى. كونفەرەنتسيا جۇمىسىنا 100 قازاقستاندىق جانە اگرووندىرىستىك كەشەن, مەملەكەتتىك-جەكەمەنشىك سەرىكتەستىك, تاۋ-مەتاللۋرگيا كەشەنى, قۋات, مۇناي-گاز جانە بانك سەكتورلارى, اقپاراتتىق-كوممۋنيكاتسيالىق تەحنولوگيالار, يننوۆاتسيا, كولىك جانە لوگيستيكا, تاعام ءوندىرىسى, حيميالىق سالا, ماشينا قۇراستىرۋ, كەمە جاساۋ, مەديتسينا جانە تۋريزم سالاسىنداعى قازاقستاندىق جانە شەتەلدىك كومپانيالاردان 300-گە جۋىق ادام قاتىستى.
مەملەكەتتىك ۇيىمداردىڭ وكىلدەرى, سونداي-اق قازاقستان رەسپۋبليكاسىنداعى شەت مەملەكەتتەردىڭ ديپلوماتيالىق وكىلدىكتەرىنىڭ, شەتەلدىك بيزنەس-اسسوتسياتسيالاردىڭ باسشىلارى كونفەرەنتسياعا ۇلكەن قىزىعۋشىلىق تانىتتى. سونىمەن قاتار شارا اياسىندا قازاقستاننىڭ يندۋسترياسىنا, ينۆەستيتسيالىق قىزمەتتىڭ كەڭەيۋى مەن جوعارى تەحنولوگيالىق ءوندىرىستىڭ دامۋىنا قوسقان ۇلەستەرى ءۇشىن شەتەلدىك ينۆەستورلاردى جىل سايىنعى ماراپاتتاۋ ءراسىمى دە ءوتتى.
دينارا بىتىكوۆا,
"ەگەمەن قازاقستان".