قاۋىپسىزدىك – بارشاعا ورتاق ماسەلە

قازاقستان پرەزيدەنتى نۇرسۇلتان نازارباەۆ ۇسىنعان يادرولىق قارۋسىز الەم جوباسى حالىقارالىق قوعامداستىق تاراپىنان جان-جاقتى قولداۋعا يە بولعانى ءمالىم. تاۋەلسىزدىك تويى قارساڭىندا بەلگىلەنگەن جۇلدىزدى 25 كۇننىڭ ءبىرى «يادرولىق قارۋسىز الەم» اتتى تاقىرىپتىق كۇنگە ارنالۋى بۇل ماسەلەنىڭ جاھاندىق اۋقىمداعى ورنى مەن ماڭىزىن ودان ءارى كوتەرە تۇسەدى. وسىعان وراي, كەشە ورال قالاسىنداعى دوستىق ۇيىندە تاقىرىپتىق كەزدەسۋ وتكى­زىلىپ, وعان ەتنومادەني بىرلەستىكتەردىڭ جەتەكشىلەرى, وڭىردەگى جوعارى وقۋ ورىن­دارىنىڭ پروفەسسور-وقىتۋشىلارى مەن زيا­لى قاۋىم وكىلدەرى قاتىستى. بۇل ءىس-شارا كەزىندە ورتاعا وي-پىكىر تاس­تاعاندار قازاقستان باسشىسى تاراپىنان ۇسىنىلعان يادرولىق قارۋسىز الەم جو­باسى ولاردىڭ ءبارىن تاڭعالدىرعانىن اتاپ كورسەتتى. ءارى ولار مۇنداي تەرەڭ ىزگىلىككە تولى قادامدى وزگە الەمدىك دەڭگەيدەگى ساياساتكەرلەردىڭ قايتالاي قويۋى دا ەكىتالاي ەكەنىنە ەكپىن ءتۇسىردى. سونىمەن بىرگە, قازاقستان يادرولىق قارۋدان ءوز ەركىمەن باس تارتۋى ارقىلى الەمدەگى ەڭ بەيبىتشىلىكسۇيگىش تۇراقتى مەملەكەت قۇرۋدىڭ جارقىن ۇلگىسىنە اينالعانى تۋرالى تۇجىرىمدار جاسادى. ءتۇيىپ ايتقاندا, قازاقستاننىڭ الەم ەل­دەرىنىڭ قاۋىپسىزدىك كەپىلىن يەلەنگەن بىرە­گەي ەل قاتارىنان ورىن الىپ ۇلگەرگەنى ور­تاق اڭگىمەنىڭ ارقاۋى بولدى. دوڭگەلەك ۇستەلدە ورال قالاسىنداعى ەۆ­رەي ەتنومادەني بىرلەستىگى توراعاسىنىڭ ورىنباسارى فەليكس بايۋكانسكي بەي­بىت­شىلىك پەن قاۋىپسىزدىكتى ساقتاۋ ماسەلەسى مەم­لەكەت باسشىسىنىڭ عانا ەمەس, سو­نىمەن بىرگە بارشا قازاقستاندىقتاردىڭ, ءار ۇجىم مەن وتباسىنىڭ دا ءتول پارىزى ەكەنىنە توقتالدى. مۇنداي قادامنىڭ ءبا­رى سايىپ كەلگەندە, قازاقستان حالقىنىڭ اۋىز­بىر­شىلىگى مەن ىنتىماعى ارقىلى عانا بەرىك ور­نىعا الادى,  دەدى ول دوڭگەلەك ۇستەلدە ءسوي­لەگەن ءسوزىنىڭ قورىتىندىسىندا. سونداي-اق, كەشە وبلىس ورتالىعىن­داعى دوستىق ۇيىندە وڭىرلىك قوعامدىق كەلىسىم مەكەمەسى «الەم. XXI عاسىر» ما­نيفەسى تاقىرىبىندا كىتاپ كورمەسىن ۇيىمداستىردى. تەمىر قۇسايىن, «ەگەمەن قازاقستان» ورال