شىمكەنتتە اۆتوبۋس قۇراستىراتىن زاۋىت ىسكە قوسىلادى, دەپ حابارلادى «قازاقپارات».
قالا باسشىلىعى دايىن ماشينالاردى سىرتتان اكەلگەنشە, قوعامدىق كولىك بولشەكتەرىن قۇراستىرامىز دەگەن شەشىمگە كەلدى. بۇل ءدال سول زاۋىتتا قۇراستىرىلعان جەڭىل اۆتوكولىكتەردى 30%-عا تومەن باعادا ساتىپ الۋعا جانە اۆتوبۋستاردىڭ ىستەن شىققان بولشەكتەرىن وڭاي الماستىرۋعا مۇمكىندىك بەرەدى.
زاۋىتتىڭ باستى سەرىكتەسى – «مەرسەدەس» نەمىس اۆتوكومپانياسى. زاۋىت جىلىنا 100-150 اۆتوبۋس شىعارۋدى جوسپارلاپ وتىر. ازىرگە كاسىپورىنعا 1 ملن دوللار قارجى قۇيىلعان. كەلەسى جىلى زاۋىت باسشىلىعى سەرۆيستىك ورتالىق قۇرماقشى. بۇل كاسىپورىن 100 ادامنان جوعارى ادامدى جۇمىسپەن قامتاماسىز ەتە الادى.
الايدا, زاۋىت قازىر قالالىق اكىمدىكتىڭ قولداۋى مەن ىنتىماقتاستىعىنا ءزارۋ. سونىمەن قاتار, مۇگەدەكتەرگە ارنالعان ەۋروپالىق ۇلگىدەگى ارنايى اۆتوبۋستار دا جاسالىنادى.
«قازىر بىزگە «مەرسەدەس» كومپانياسىنىڭ وكىلى كەلىپ, كەلىسسوزدەر جۇرگىزىپ جاتىرمىز. ولار بىزبەن بىرگە جۇمىس جاساۋعا دايىن ەكەندەرىن ايتتى. اۆتوبۋستار ەكولوگيالىق نورمالارعا ساي بولادى. قازىر اۆتوبۋستاردىڭ ۇلگىلەرى تاڭدالۋدا, بەكىتىلگەنىن كۇتۋدەمىز», – دەپ ءتۇسىندىردى «كازبەلتەحنيكا» ساۋدا ءۇيىنىڭ باس ديرەكتورى باقىت جاسۇزاقوۆ.