بۇل تۋرالى بۇگىن قر پارلامەنتى ماجىلىسىندە ءوتىپ جاتقان «وسىمدىكتەر مەن جانۋارلار دۇنيەسىن قورعاۋدىڭ, ءوسىمىن مولايتۋدىڭ جانە ولاردىڭ وبەكتىلەرىن ورنىقتى پايدالانۋدىڭ وزەكتى ماسەلەلەرى» تاقىرىبىندا ءوتىپ جاتقان «دوڭگەلەك ۇستەل» بارىسىندا اۋىل شارۋاشىلىعى ۆيتسە-ءمينيسترى ەرلان نىسانباەۆ مالىمدەدى.
«قازاقستان ورمانى از مەملەكەتتەر قاتارىنا جاتاتىندىعى بەلگىلى. ورماندى القاپتار ەلدىڭ 4,6 پايىزىن عانا الىپ جاتىر. سوندىقتان ەكپەلەردى كوبەيتۋ مينيسترلىكتىڭ نەگىزگى مىندەتتەرىنىڭ ءبىرى. وسى ورايدا, جەرگىلىكتى اكىمدىكتەر بەكىتكەن جوسپارعا سايكەس وڭىرلەردە جاسىل ايماقتاردى قۇرۋ, ەلدى مەكەندەردى كوگالداندىرۋ جۇمىستارى جۇرگىزىلۋدە. وسىناۋ ماڭىزدى جۇمىستاردى اتقارۋ ءۇشىن ءار ءوڭىر بويىنشا 5 جىلدىق جوسپار جاسالىپ, بەكىتىلدى. ايتا كەتۋ كەرەك, بۇل جۇمىس بيىلعا دەيىن جۇيەلى جۇرگىزىلمەگەن بولاتىن. دەگەنمەن, سوڭعى 10 جىلدا 2005 جىلعى 31 مىڭنان وسى جىلى 55 مىڭ گەكتارعا دەيىن ۇلعايدى», – دەپ اتاپ ءوتتى ۆيتسە-مينيستر.
بۇل رەتتە ول ەلباسى تاپسىرماسىنا سايكەس استانا ماڭىندا جاسىل جەلەك قۇرۋ جۇمىستارىنىڭ قارقىندى جۇرگىزىلىپ جاتقانىن باسا ايتتى. بۇگىندە بۇل ايماقتىڭ كولەمى 75 مىڭ گەكتارعا جەتكەن.
«ورمان سالاسىن قولداۋ مەن ساۋىقتىرۋ بويىنشا بىرقاتار شەشىم قابىلداندى. ولاردىڭ باستىلارى مىنالار: جۇمىر اعاش ماتەريالدارىنىڭ ەكسپورتىنا تىيىم سالۋ, سەكسەۋىل ورماندارىنداعى اعاش كەسۋدىڭ بارلىق تۇرىنە موراتوري جاريالاۋ. قىلقان جاپىراقتى ورمانداردا سانيتارلىق ماقساتتا جانە ورتەنگەن ورمان اعاشتارىن كەسۋگە تىيىم سالۋ ماسەلەسى قاراستىرىلۋدا. سونىمەن قاتار تابيعي قالدىقتاردى دا قولدانۋعا تىيىم سالىندى. ساۋدا ورىندارى مەن جانارماي قۇيۋ بەكەتتەرىندە سەكسەۋىل ساتۋعا تىيىم سالۋ جونىندەگى شارالار قولدانىلۋدا», – دەدى نىسانباەۆ.
بۇدان بولەك, ۆيتسە-مينيستر قازاقستاندا ورمان القاپتارىن ۇلعايتۋعا مۇمكىنشىلىك جاساۋ ماقساتىندا ورمان پايدالانۋ جانە ورمانداردى تولىقتىرۋ ماسەلەلەرىن دامىتۋ, جەكە ورمان ءوسىرۋ ينستيتۋتىن, اعاشتۇقىمداستارىن وندىرىستىك جانە ەنەرگەتيكالىق ماقساتتا پلانتاتسيالىق ءوسىرۋدى دامىتۋ كوزدەلىپ وتىرعانىن باسا ايتتى.