ول ءۇشىن دەنساۋلىق ساقتاۋ جانە الەۋمەتتىك دامۋ مينيسترلىگىنىڭ قازىر جۇمىس ىستەپ تۇرعان enbek.kz پلاتفورماسىنىڭ بازاسى قولدانىلادى. بۇل تۋرالى بۇگىن پرەمەر-مينيستر ب.ساعىنتاەۆتىڭ توراعالىعىمەن وتكەن قر ۇكىمەتىنىڭ كەزەكتى وتىرىسىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا مالىمدەدى.
«باعدارلامانىڭ ءۇشىنشى باعىتىندا ازاماتتاردىڭ جەكە توبىن مەكەنجايلىق قولداۋدى, ەڭبەك رەسۋرستارىنىڭ جەدەلدىگىن ارتتىرۋ مەن ەڭبەك نارىعىنىڭ ينفراقۇرىلىمىن دامىتۋدى كۇشەيتۋ قاراستىرىلادى», – دەپ اتاپ ءوتتى ۆەدومستۆو باسشىسى.
ءمينيستردىڭ ايتۋىنشا, بۇگىندە ەلىمىزدە حالىقتى جۇمىسپەن قامتۋعا ىقپال ەتەتىن وننان استام ۆەب-سايت بار. دەگەنمەن, ەڭبەك نارىعىنداعى سۇرانىس پەن ۇسىنىستاردىڭ بارلىعىن بىرىكتىرەتىن ورتاق پورتال جوق. وسىعان بايلانىستى جۇمىس ىزدەۋ مەن قىزمەتكەرلەردى ىرىكتەۋگە ارنالعان ەڭبەك نارىعىنىڭ بىرىڭعاي اقپاراتتىق بازاسىن نەمەسە ەڭبەك بيرجاسىن قۇرۋ ۇسىنىلىپ وتىر. بۇل جۇمىستى enbek.kz پلاتفورماسىنىڭ بازاسىندا جۇزەگە اسىرۋ جوسپارلانعان.
ەڭبەك بيرجاسىندا الەۋمەتتىك-ەڭبەك سالاسىنىڭ ءبىرتۇتاس جۇيەسى, مەملەكەتتىك ورگانداردىڭ اقپاراتتىق جۇيەسى, جەكە جۇمىسپەن قامتۋ اگەنتتىكتەرىنىڭ دەرەكتەر بازاسى, جۇمىسپەن قامتۋ جونىندەگى ينتەرنەت پورتالدار بىرىكتىرىلەتىن بولادى. وعان ايماقتاردىڭ جۇمىسپەن قامتۋ ورتالىقتارى قوسىلادى, ءسويتىپ جۇمىسپەن قامتۋ بويىنشا كورسەتىلەتىن قىزمەت مۇمكىندىكتەرى كەڭەيەدى.
مينيستر ايتىپ وتكەندەي, جەكەلەي ازاماتتار توبىن ەڭبەكپەن قامتۋداعى مەكەنجايلىق قولداۋ كەزىندە «جۇمىسپەن قامتۋ 2020» جول كارتاسى باعدارلاماسىندا قولدانىلعان تەتىكتەر پايدالانىلاتىن بولادى. اتاپ ايتقاندا, جاستار اراسىندا, سونىمەن قاتار ايەلدەر مەن مۇمكىندىگى شەكتەۋلى جاندار اراسىندا جوعارى سۇرانىسقا يە جاستار تاجىريبەسى مەن الەۋمەتتىك جۇمىس ورىندارى, قوعامدىق جۇمىستار قولدانىلادى.
ارنۇر اسقار,
«ەگەمەن قازاقستان»