التىن كۇز – جيىن-تەرىننىڭ عانا ەمەس, جۇمىستىڭ دا قايناعان كەزى. وسى ءبىر بەرەكەلى ماۋسىمدا وبلىستا تۇڭعىش رەت ساڭىراۋقۇلاق فەستيۆالىنىڭ وتكىزىلۋىندە وزىندىك تاعىلىم بارى انىق. قازاقستان تاۋەلسىزدىگىنىڭ 20 جىلدىعى قارساڭىنداعى مەرەكەلىك شارالار اياسىنداعى فەستيۆال جۇمىسپەن قامتۋ ءجونىندەگى مەملەكەتتىك باعدارلامانى ەل ىشىنە جاقىنداتا تۇسكەندەي ەدى.
– تابيعاتى كوركەم اقمولا وبلىسى ونىڭ سانسىز ىرىزدىعىنان دا كەندە ەمەس, – دەيدى ەلدى ەلەڭ ەتكىزگەن شارانى ۇيىمداستىرۋشى اقمولا وبلىستىق جۇمىسپەن قامتۋ جانە الەۋمەتتىك باعدارلامالاردى ءۇيلەستىرۋ باسقارماسىنىڭ باستىعى باقىت ەسىموۆا. – ولكەمىزدەگى ءوزىن-ءوزى جۇمىسپەن قامتۋشى 3000-نان استام ادام ورمان جەمىس-جيدەكتەرى مەن ساڭىراۋقۇلاق جيناپ, ونى وڭدەپ, ساتۋمەن اينالىسادى. فەستيۆالدى ۇيىمداستىرۋداعى ماقساتىمىز – تۇرعىنداردى شاعىن جانە ورتا بيزنەستى دامىتۋعا شاقىرۋمەن قاتار, مەملەكەت تاراپىنان جاسالىپ جاتقان كومەك-قولداۋ جونىندە تۇسىنىك بەرۋ. ءبىز الداعى كەزدە وسى تۇرعىداعى شارالار جۇرتشىلىق تاراپىنان قولداۋ تاۋىپ, ءداستۇرلى سيپات الادى دەگەن سەنىمدەمىز. ال, ءبىرىنشى شارامىزدىڭ سيمۆولى بولعان ساڭىراۋقۇلاق وبلىسىمىزدىڭ ۆيزيتتىك كارتاسىنا اينالماق. ويتكەنى, ولكەمىزدە ونىڭ تاعامدىق وتىزدان استام ءتۇرى وسەدى. فەستيۆال بارىسىندا «ەۋرازيا گرۋپپ» جشس جانە «تۋران پروفي» حالىقارالىق كاسىبي اكادەمياسىنىڭ ماماندارى شەبەر-سىنىپتار وتكىزەتىن بولادى.
«استانا – بۋراباي» اۆتوماگيسترالىنىڭ بۇلاندى ورماندارىنداعى قوس جاقتاۋى مەرەكەدەگىدەي بەزەندىرىلگەن. شارانى ۇيىمداستىرۋعا ۇيىتقى بولعان بۇلاندى جانە ەڭبەكشىلدەر اۋداندارىنىڭ باسشىلىعى 50 ساۋدا نۇكتەسىن جابدىقتاپ, كيىز ۇيلەردى دە تىگىپ تاستاپتى. ساحنا تورىندە كوركەمونەرپازدار ءۇيىرمەسىنىڭ كونتسەرتى ۇزدىكسىز جالعاسىن تابۋدا. ارقان تارتۋ, قول كۇرەسى, زىلتەمىر كوتەرۋ سياقتى جارىستاردىڭ قىزىعى دا ءبىر توبە. بالعىندارعا بازارلىق رەتىندە وبلىستىق باسقارما ۇرمەلى اتتراكتسيونداردى ارقالاپ كەلگەنى قۋانىشتى ەسەلەي ءتۇستى. حالىقتىق قولونەر شەبەرلەرىنىڭ كورمەسى تارتىمدى اسەر قالدىردى.
فەستيۆالدىڭ باستى شاراسى: «ۇزدىك ساڭىراۋقۇلاق جيناۋشى», «ەڭ ۇلكەن ساڭىراۋقۇلاق», «بىلگىر وتباسى», «ەمدىك شارالار» بايقاۋلارىنا جۇرتشىلىق ايرىقشا ىقىلاس ءبىلدىردى. قازىلار القاسىنىڭ تالقىسىنا ساڭىراۋقۇلاق, ورمان جيدەكتەرى مەن باۋ-باقشا ونىمدەرىنىڭ, بالدىڭ 68 ءتۇرى ۇسىنىلدى. جۇرتشىلىق كۇتكەندەي, باس جۇلدە – «ساڭىراۋقۇلاق وسكارىن» ماكين قالاسىنىڭ تۇرعىنى الەكساندر كوستروۆ جەڭىپ الدى. ول وسى كاسىپپەن ارنايى پاتەنت ارقىلى 20 جىلدان بەرى وتباسىمەن بىرگە اينالىسىپ كەلەدى ەكەن. ال, ەڭبەكشىلدەر اۋدانىنىڭ وكىلدەرى اراسىندا ولگا شەۆتسوۆانىڭ مەرەيى ۇستەم بولدى.
– سوڭعى كەزدەرى بۇل كاسىپكە شىنايى بەتبۇرىس بايقالادى, – دەيدى ەڭبەكشىلدەر اۋدانىنىڭ اكىمى تەمىرجان حاميتوۆ. – جاڭا اۆتوباننىڭ 40 شىقىرىمدىق جيەگىندە ورنالاسقان قاراتال, قوعام, ماتەن, قاراعاي, بۇلاندى, ماقپال سياقتى 18 اۋىلدىڭ تۇرعىندارى قوسىمشا تابىس كوزىن تاۋىپ وتىر دەسەك, ارتىق ايتقاندىق ەمەس. بيزنەستىڭ تۇرلەرى دە كوبەيە تۇسۋدە. سونىڭ ءبىرى – ورمان بايلىعىن تۇتىنۋشىعا ۇسىنۋ. بۇگىنگى شاراعا 20-دان استام وكىلىمىز قاتىسۋدا. ءبىز مۇنداي باستامانى قولدايمىز. الداعى كەزدە ارنايى قابىلداۋ پۋنكتتەرىن اشۋ نيەتىندەمىز.
بۇل كۇنگى ەرەكشە شاراعا 1500 ادامنىڭ قاتىسقاندىعى باستامانىڭ باياندى بولاتىندىعىنا سەنىم قالىپتاستىرادى.
باقبەرگەن امالبەك.
اقمولا وبلىسى.