ەلىمىزدىڭ بىرقاتار قالاسىندا اۋا الماسۋى ناشارلاپ, قولايسىز مەتەوجاعداي قالىپتاسقان كۇندەرى اۆتوكولىك قوزعالىسىنا ۋاقىتشا شەكتەۋ ەنگىزۋ جوسپارلانىپ وتىر. مۇنداي كەزدە كوشەگە شىعۋعا كولىكتىڭ مەملەكەتتىك تىركەۋ نومىرىندەگى سوڭعى سانعا قاراي عانا, ياعني جۇپ نەمەسە تاق كۇندەرى رۇقسات بەرىلۋى مۇمكىن, دەپ جازادى Egemen.kz.
بۇل شارا 2026-2028 جىلدارعا ارنالعان اتموسفەرالىق اۋانى قورعاۋ قاعيدالارىن ازىرلەۋ اياسىندا قاراستىرىلىپ وتىر. اكىمدىكتەرگە ءتيىستى تاپسىرمانى ەكولوگيا جانە تابيعي رەسۋرستار مينيسترلىگى بەرگەن. ۆەدومستۆو دەرەگىنشە, 2025 جىلى «قازگيدرومەت» مالىمەتتەرى بويىنشا ەلىمىزدىڭ 11 قالاسىندا اۋا لاستانۋى جوعارى دەڭگەيدە تىركەلگەن.
ەكولوگيالىق جاعدايى كۇردەلى قالالاردىڭ قاتارىندا الماتى, وسكەمەن, قاراعاندى, تەمىرتاۋ جانە اقتوبە بار. بۇل قالالاردا جەلسىز كۇندەرى ءتۇتىن تارامايدى. اۋا ساپاسى كۇرت تومەندەيدى.
ءتيىمدى شەشىمدەردى تابۋ ءۇشىن مينيسترلىك وكىلدەرى قىتايعا بارىپ, بەيجىڭ قالاسىنداعى تاجىريبەمەن تانىستى. وندا اۋا ساپاسىن جاقسارتۋ ءۇشىن بىرنەشە شارا قاتار قولدانىلادى. كولىك قوزعالىسى رەتتەلەدى. قوعامدىق كولىك جاڭارتىلادى. قالا اۋماعى ەكولوگيالىق ايماقتارعا بولىنەدى.
وقي وتىرىڭىز: الماتىدا ءتۇتىنى بۋداقتاعان اۆتوكولىكتەردى تەكسەرۋ كۇشەيدى
ساپار سوڭىندا اكىمدىكتەرگە جاڭا ەرەجەلەر ازىرلەۋ تاپسىرىلدى. بۇل ەرەجەلەر ناقتى شەكتەۋلەردى قامتيدى. سونىڭ ءبىرى – «جۇپ كۇن – تاق كۇن» ءتارتىبى. قولايسىز مەتەوجاعداي جاريالانعان كۇندەرى كولىكتەر نومىرىنە قاراي كوشەگە شىعادى. مەملەكەتتىك ءنومىرىنىڭ سوڭعى سانى جۇپ كولىكتەر جۇپ كۇندەرى عانا قوزعالادى. تاق ءنومىرلى كولىكتەر تاق كۇندەرى عانا شىعا الادى. بۇل ءبىر كۇندە جولعا شىعاتىن كولىك سانىن ازايتادى.
سونىمەن بىرگە قوعامدىق كولىك پەن تاكسيدى ەلەكتر قۋاتىنا جانە گازعا كوشىرۋ جوسپارلانعان. قالالار ەكولوگيالىق ايماقتارعا بولىنەدى. كەي اۋماقتارعا ەكولوگيالىق كلاسى تومەن كولىكتەر كىرمەۋى مۇمكىن.
وقي وتىرىڭىز: تۇتىنگە تۇنشىققان شاھار: مەگاپوليستىڭ ەكولوگيالىق احۋالى قاشان تۇزەلەدى؟
ايتا كەتەيىك, مۇنداي ەرەجەلەر الماتى قالاسىندا 2025 جىلعى 30 جەلتوقساندا بەكىتىلگەن. قالادا شىعارىندىلارى از ايماقتار بەلگىلەۋ كوزدەلگەن. ەكولوگيالىق تالاپقا ساي كەلمەيتىن كولىكتەرگە قوسىمشا شەكتەۋلەر ەنگىزىلۋى مۇمكىن. ءتۇتىنى كوپ ەسكى كولىكتەردى ساتىپ الۋ تەتىگى دە قاراستىرىلىپ جاتىر.
وقي وتىرىڭىز: سولتۇستىك قازاقستاندا ەكى ايەل ءتۇتىننىڭ يىسىنەن تۇنشىعىپ قالا جازدادى
مامانداردىڭ ايتۋىنشا, نەگىزگى ماقسات – جۇرگىزۋشىلەردى جازالاۋ ەمەس, قولايسىز مەتەوجاعداي كەزىندە كولىك سانىن ازايتۋ. اۋانىڭ ساپاسىن جاقسارتۋ. قالا تۇرعىندارىنىڭ دەنساۋلىعىن قورعاۋ.