قىزىلوردا وبلىسى قازالى اۋدانىندا 75 جۇمىس ورنى اشىلدى, دەپ حابارلادى وبلىستىق كاسىپكەرلەر پالاتاسى.
كاسىپكەرلەر پالاتاسىنىڭ قازالى اۋداندىق فيليالىنىڭ ديرەكتورى ەرمەك ايماحانوۆتىڭ ايتۋىنشا, بيىلدىڭ وزىندە جەرگىلىكتى 22 كاسىپكەرگە بارلىعى 130 ملن تەڭگە نەسيە بەرىلگەن. ناتيجەسىندە اۋداندا 75 جاڭا جۇمىس ورنى اشىلدى.
سونداي كاسىپكەردىڭ ءبىرى البينا نۇرباەۆا 15 ادامدى جۇمىسپەن قامتىپ وتىر. ول وڭىرلىك ينۆەستيتسيالىق ورتالىق ارقىلى 8 ملن تەڭگە نەسيە الىپ, بۇل قارجىعا زاماناۋي ۇلگىدەگى پەش, نان جاياتىن ماشينا, يلەنگەن قامىردى بۋمەن كوتەرەتىن قۇرال, كونديتەر ونىمدەرىن سالىپ پىسىرەتىن ءتۇرلى قۇرالدار ساتىپ الدى. ودان بولەك كاسىپكەر جاڭادان العان پەشتەرىن قويۋ ءۇشىن قۇرىلىس جۇمىستارىن جۇرگىزىپ, تسەحتى كەڭەيكەن. قازىر كونديتەر تسەحىندا كونديتەرلىك ونىمدەردىڭ 10-نان استام ءتۇرى دايىندالادى.
قازالى اۋدانىنداعى كاسىپكەرلەر مەن كاسىپكەر بولۋعا نيەتتى 1048 تۇرعىننىڭ باسىم كوپشىلىگى – جۇمىسسىز جاستار. «بيزنەس كەڭەسشى» وقۋ سەمينارى تۇراقتى وتكىزىلىپ, 188 كاسىپكەر مەن كاسىپ اشۋعا نيەتتى جاندارعا ارنايى سەرتيفيكاتتار تابىس ەتىلگەن.