ەلوردادا 10-11 جەلتوقساندا «استانا بالەت» تەاترىنىڭ سالتاناتتى اشىلۋى وتەدى, دەپ حابارلادى استانا قالاسى اكىمدىگىنىڭ ءباسپاسوز قىزمەتى.
ونىڭ قۇرىلىسى 2015 جىلدىڭ مامىرىندا باستالعان بولاتىن. نىساننىڭ جالپى اۋدانى 15 467 م² قۇرايدى. قۇرىلىس جۇمىستارىنا 400-گە جۋىق قازاقستاندىق قۇرىلىسشى مەن مامان تارتىلعان.
«بۇل - كەرەمەت زاماناۋي كەشەن, مۇندا دايىندىق جاساۋعا, قويىلىم كورسەتۋگە ارنالعان ۇلكەن زالدار, كەڭ جانە جارىق گريمدەۋ بولمەلەرى, سپورت زالى جانە ت.ب. بار», – دەيدى تەاتر وكىلدەرى.
«استانا بالەت» قازاق ۇلتتىق حورەوگرافيا اكادەمياسىنىڭ جانىندا ورنالاسقان. كورەرمەن زالىنىڭ سىيىمدىلىعى – 783 ورىن, سونىڭ ىشىندە پارتەر – 609 ورىن, بالكوننىڭ 2-ءشى يارۋسى – 104 ورىن, 3-ءشى يارۋسى – 70 ورىن. ديزاينەرلەردىڭ ۇسىنعان جوباسى بويىنشا, التىن-قوڭىر ءتۇستى شىمىلدىق ءىلىنىپ, ورىندىقتار جاۋقازىن تۇستەس ماتەريالمەن قاپتالعان, ال ەدەن - قوڭىر ءتۇستى.
ساحنانىڭ اۋدانى 536 م² قۇرايدى. ساحنانى ترانسفورماتسيالاۋ ءۇشىن قوزعالمالى جانە كوتەرۋ-ءتۇسىرۋ مەحانيكاسىنىڭ ەڭ وزىق تەحنولوگيالارى پايدالانىلدى. ساحنادا ەڭ كۇردەلى ستسەنوگرافياسى بار قويىلىمدار قويۋعا مۇمكىندىك بار. تەاتردا ساحنا اۋدانىمەن بىردەي جاڭا سپەكتاكلدەردى قويۋعا ىڭعايلى ەكى دايىندىق زالى قاراستىرىلعان.