قازاقستان رەسپۋبليكاسىنىڭ ۇلتتىق بانكى «قازاقستاننىڭ ادەت-عۇرىپتارى, ۇلتتىق ويىندارى» مونەتالار سەرياسىنان نومينالى 500 تەڭگەلىك, «proof» ساپالى كۇمىستەن جانە نومينالى 100 تەڭگەلىك نەيزيلبەر قوسپاسىنان «قىرقىنان شىعارۋ» ەسكەرتكىش مونەتالارىن اينالىسقا شىعاردى, دەپ حابارلايدى ۇلتتىق بانكتىڭ ءباسپاسوز قىزمەتى.
قىرقىنان شىعارۋ – تۋعانىنا 40 كۇن تولعان سابيگە قاتىستى وتكىزىلەتىن ەجەلگى ءداستۇر. ءداستۇردىڭ ءمانى بالانى 40 قاسىق تۇزدى سۋعا شومىلدىرۋدان تۇرادى. سۋ قۇيىلعان ىدىسقا كۇمىس اشەكەيلەر, مونەتالار سالادى, سەبەبى كۇمىس ەجەلدەن تازالىقتىڭ نىشانىن بىلدىرەدى, بالە-جالادان قورعايدى دەپ ەسەپتەلەدى.
كۇمىستەن جانە نەيزيلبەر قوسپاسىنان جاسالعان مونەتالاردىڭ بەت جانە سىرت جاقتارىنداعى بەينەلەر بىردەي. «رroof» ساپالى كۇمىس مونەتالارداعى بەينە جىلتىر بەتكە سالىنعان. مونەتالاردىڭ بەت جاعىندا (اۆەرسىندە) ورتالىق بولىگىندە ويۋ-ورنەك اياسىندا قازاقستان رەسپۋبليكاسىنىڭ ەلتاڭباسى بەينەلەنگەن. تومەنگى جاعىندا مونەتانىڭ نومينالىن بىلدىرەتىن سان (كۇمىس مونەتادا «500», نەيزيلبەر قوسپاسىنان جاسالعان مونەتادا «100») جانە «تەڭگە» دەگەن جازۋ بار. سول جانە وڭ جاعىندا ۇلتتىق ويۋ-ورنەك ەلەمەنتى ءبىر-بىرىنە قاراما-قارسى بەينەلەنگەن. اينالدىرا مەملەكەتتىك تىلدە «قازاقستان رەسپۋبليكاسى» جانە ورىس تىلىندە «رەسپۋبليكا كازاحستان» دەپ جازىلعان.
مونەتالاردىڭ سىرت جاعىندا (رەۆەرسىندە) ۇلتتىق ءداستۇر – قىرقىنان شىعارۋدىڭ ءبىر ءساتى بەينەلەنگەن. سول جاعىندا قازاقستان رەسپۋبليكاسى ۇلتتىق بانكىنىڭ لوگوتيپى بار. اينالدىرا مەملەكەتتىك تىلدە «قىرقىنان شىعارۋ» دەگەن جازۋ, سوعىلعان جىلىن بىلدىرەتىن «2016» دەگەن سان, مونەتا دايىندالعان مەتالدى, ونىڭ سىنامىن جانە ماسساسىن بىلدىرەتىن «Ag 925 24 g» دەگەن جازۋ (كۇمىستەن جاسالعان مونەتادا عانا) بار.
نومينالى 500 تەڭگەلىك جانە 100 تەڭگەلىك ەسكەرتكىش مونەتالار قازاقستان رەسپۋبليكاسىنىڭ بۇكىل اۋماعىندا كورسەتىلگەن قۇنىمەن تولەمنىڭ بارلىق تۇرلەرى بويىنشا, سونداي-اق بانك شوتتارىنا ەسەپتەۋ جانە اۋدارىم جاساۋ ءۇشىن قابىلدانۋعا مىندەتتى, قازاقستان رەسپۋبليكاسىنىڭ بارلىق بانكتەرىندە شەكتەۋسىز ۇساقتالادى جانە ايىرباستالادى.
ەسكەرتكىش مونەتالاردى «قازاقستان رەسپۋبليكاسى ۇلتتىق بانكىنىڭ قازاقستان تەڭگە سارايى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى دايىنداعان. «Proof» ساپاسىمەن جاسالعان ەسكەرتكىش مونەتالار كوللەكتسيالىق قۇنى بويىنشا ساتۋعا ارنالعان. ولار كادەسىيلىق وراۋمەن شىعارىلادى جانە قازاقستان رەسپۋبليكاسى ۇلتتىق بانكىنىڭ مەملەكەتتىك, ورىس جانە اعىلشىن تىلدەرىندەگى نومىرلىك ساپا سەرتيفيكاتىمەن جابدىقتالعان.