اتىراۋدا اۋا رايى ايتارلىقتاي سۋىتىپ, 20 گرادۋسقا دەيىن تومەندەدى. باسپاناسىز جاندارعا «الەۋمەتتىك پاترۋل» ءبولىمى كومەك كورسەتىپ جاتىر. اتالعان ءبولىمنىڭ ارنايى كولىگىندە فەلدشەر مەن الەۋمەتتىك قورعاۋ سالاسىنىڭ قىزمەتكەرلەرى بار. ولار كۇنى بويى قالا ءىشىن ارالاپ, ءۇيسىز-كۇيسىز جۇرگەن جانداردى ىزدەيدى.
«كومەككە مۇقتاج, تۇرعىلىقتى ورنى جوق جانداردى الەۋمەتتىك بەيىمدەلۋ ورتالىعىنا اكەلەمىز. قازىر ءبىزدىڭ ورتالىقتا 30 ادام بار», – دەدى مەكەمە ديرەكتورى ءومىرجان جۇمانيازوۆ.
«ورتالىقتا جۋىنىپ, تاماق ءىشىپ, مەديتسينالىق كومەك الۋعا جانە تۇنەپ شىعۋعا بولادى. «كوپشىلىگى كۇن سۋىتقاندا وزدەرى كەلەدى, ال كۇن جىلىنىسىمەن كەتىپ قالادى. ءتىپتى, ءبىر تاۋلىك تە تۇرا الماي, كەتىپ قالاتىندار بار. سەبەبى, مۇندا سپيرتتىك ىشىمدىك ىشۋگە بولمايدى, باسقا دا قاتاڭ تالاپتار بار», - دەدى ءو.جۇمانيازوۆ.