قىتايدا تۇراتىن 22 جاستاعى بەيسەن ناسيوللا ۇلىنا قازاقستاندىق كاسىپقوي بوكس شەبەرى گەننادي گولوۆكينگە قاتتى ۇقسايتىندىعىنا بايلانىستى «One G» دەگەن لاقاپ ات قويىلعان, دەپ حابارلايدى «قازاقپارات».
«مەن ءبىر جىل بۇرىن گەنامەن بىرگە تۇسكەن سۋرەتىمدى جاريالاپ, وعان قاتىستى جالعان اقپارات تاراعانىنا كۋا بولدىم. ءبىز ونىمەن يۋننان پروۆينتسياسىنىڭ كۋنمين قالاسىندا 2015 جىلى WBC-ءتىڭ جىلدىق ەسەپتىك وتىرىسىندا كەزدەسكەن ەدىك. نەگىزى, تەوريا جۇزىندە مەن ونىمەن رينگكە شىعا الام, الايدا قازىر مەن ەكى سالماق تومەن دارەجەدە جاتتىعام. مەندە ونداي مۇمكىندىك بولعان كۇننىڭ وزىندە, گولوۆكينمەن جەكپە-جەككە شىقپاس ەدىم. سەبەبى ول قازاقستاننىڭ تۋىن بيىكتەرگە كوتەرىپ جۇرگەن جىگىت. مەن قازاقستان ازاماتى بولماسام دا, قانىم قازاق. سوندىقتان ونىمەن باسەكەلەس بولماس ەدىم», دەيدى بايشان بو (قىتايلىقتار ونى وسىلاي اتايدى ەكەن) قازاقپاراتقا بەرگەن سۇحباتىندا.
بەيسەن, سونداي-اق, ونى قازاق تىلىنە شورقاق دەپ جازىلعان اقپاراتتىڭ شىندىققا جاناسپايتىنىن دا ايتىپ ءوتتى. قازىرگى ساتتە قانداسىمىز 17 جەلتوقساندا اۆستراليالىق بىلعارى قولعاپ شەبەرىمەن جەڭىل سالماقتا WBA نۇسقاسى بويىنشا ازيا چەمپيونى اتاعى ءۇشىن وتەتىن جەكپە-جەككە قىزۋ دايىندالىپ جاتقانىن جەتكىزدى.
ايتا كەتەيىك, بەيسەن ناسيوللا ۇلى كاسىپقوي رينگتە 11 جەكپە-جەك وتكىزىپ, 10-ىندا جەڭىسكە جەتكەن (5-ەۋى نوكاۋت), ءبىر كەزدەسۋ تەڭ اياقتالعان.