فۋتبولدان ەۋروپا ليگاسىنىڭ توپتىق كەزەڭىندە ەلوردانىڭ «استانا» كومانداسى كيپردىڭ اپوەل كلۋبىن قابىلداپ, 2:1 ەسەبىمەن جەڭىسكە جەتتى.
تارتىسقا تولى كەزدەسۋدە قوناقتار ساپىنان گەورگيوس ەفرەم 31-مينۋتتا كومانداسىن العا شىعارسا, 59-مينۋتتا مارين انيچيچ تارازى باسىن تەڭەستىردى. ال كەزدەسۋدىڭ اياقتالۋىنا ساناۋلى مينۋتتار قالعاندا (85-مينۋتتا) دجوردجە دەسپوتوۆيچ جەڭىستى گولدى سوقتى.
«استانا» وسىلايشا ەۋروپا ليگاسىنىڭ توپتىق كەزەڭىندە العاشقى جەڭىسىنە قول جەتكىزدى. وسى كەزدەسۋدەن كەيىن ول ءوز توبىندا 3-ورىندا تۇر. كەلەسى ماتچتا "استانا" 8 جەلتوقساندا شۆەيتساريانىڭ «يانگ بويز» كومانداسىمەن وينايدى.