مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باستاماسىمەن قر پارلامەنتى «ايناداي» نومىرلەر مەن «ادەمى» ارىپتەر سەرياسىن ەرەكشە تاريفپەن بەرىلەتىن جانە جوعارى سۇرانىستى مەملەكەتتىك بەلگىلەر تىزىمىنە ەنگىزۋ تۋرالى زاڭ جوباسىن قاراۋدا.
بۇل تۋرالى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەن ءىىم بىرلەسىپ وتكىزگەن «اكىمشىلىك پوليتسيا كوميتەتىنىڭ قىزمەتىندەگى سىبايلاس جەمقورلىقپەن كۇرەس مونيتورينگىنىڭ قورىتىندىسى مەن جەمقورلىق قاۋپىنىڭ سىرتقى تالداماسى» اتتى سەلەكتورلىق جينالىسىندا ايتىلدى, دەپ حابارلادى مقسجقا ءباسپاسوز قىزمەتى.
اتالمىش باستاما سوڭعى ەكى جىلدا 5,2 ملرد. تەڭگەنى قۇراعان وسىنداي نومىرلەردىڭ كولەڭكەلى اينالىمىن مەملەكەتتىك نومىرلەردى ساتۋدان تۇسكەن بيۋدجەت كىرىستەرىنىڭ كولەمىمەن سالىستىرۋدان تۋعان.
بۇدان بولەك, جينالىسقا قاتىسۋشىلار اكىمشىلىك ءوندىرىس ماتەريالدارى بويىنشا دەرەكقورعا ۋاقتىلى مالىمەت ەنگىزبەگەن جاعدايلار قۇقىق بۇزۋشىلاردىڭ جاۋاپكەرشىلىكتەن جالتارۋلارىنا مۇمكىندىك بەرەتىنىن اتاپ ءوتتى. تەك ماڭعىستاۋ وبلىستىق ءىىد بويىنشا دەرەكقورعا ەنگىزىلمەگەن 14 مىڭنان استام ماتەريال انىقتالدى. الماتى وبلىسىنداعى وسىنداي جاعدايلار مىڭنان اسادى.
جول قوزعالىسىن باقىلاۋدى بارىنشا اۆتوماتتاندىرۋ, ستاتسيونارلىق سپيدومەترلەر مەن ونلاين كامەرالار, قول رادارلارى مەن ۆيدەوتىركەگىشتەردىڭ ءتيىمدى قولدانىلۋى, سونداي-اق كوميتەتتىڭ مەملەكەتتىك قىزمەت كورسەتۋ تالاپتارى مەن رەگلامەنتتەرىن ۇيلەستىرۋ قاجەتتىلىگىنە باسا نازار اۋدارىلدى.
جينالىستا قر ءىىم وزىندىك قاۋىپسىزدىك دەپارتامەنتىنىڭ باسشىسى ك.وسپانوۆ ءىىم-دەگى جەمقورلىقپەن كۇرەس جۇمىستارىنىڭ بارىسى تۋرالى باياندادى.