بىرىككەن ۇلتتار ۇيىمىنىڭ بەيبىتشىلىگىن ۇستاپ تۇرۋ جونىندە وپەراتسيالار دەپارتامەنتىنىڭ ساراپشىلارى قازاقستان رەسپۋبليكاسىنا كونسۋلتاتيۆتىك ساپارمەن كەلدى, دەپ حابارلايدى قورعانىس مينيسترلىگىنىڭ ءباسپاسوز قىزمەتى.
بەيبىتشىلىكتى ۇستاپ تۇرۋ جونىندەگى قازاقستاندىق اسكەري قىزمەتشىلەردىڭ وپەراتسيالارعا قاتىسۋعا ازىرلىگىن ايقىنداۋ ماقساتىندا جۇمىس ساپارى اياسىندا بۇۇ-نىڭ ساراپشىلارى «بەيبىتشىلىك ءۇشىن سەرىكتەستىك» وقۋ-جاتتىعۋ ورتالىعى («قازتسەنت») جانە «قازبات» قازاقستاندىق بىتىمگەرشىلىك باتالونىنىڭ قىزمەتىمەن تانىستى. ساراپشىلار جۇمىسىنىڭ الدىن الا قورىتىندىسى 23 قاراشا كۇنى استانادا قر قورعانىس مينيسترلىگىنىڭ وكىلدەرىمەن كەزدەسۋ بارىسىندا جاريا ەتىلدى.
بۇۇ-نىڭ ساراپشىلارى قازاقستاندىق اسكەري قىزمەتشىلەردىڭ دايىندىق دەڭگەيىنە جوعارى باعا بەرىپ, سونىمەن قاتار, بىتىمگەرشىلىك كونتينگەنتتى دايىنداۋ جونىندەگى ۇيىمنىڭ جاڭا تالاپتارى اياسىندا بىرقاتار ۇسىنىمداردى بەلگىلەدى.
قازىرگى ۋاقىتتا قر پارلامەنتىنىڭ 2013 جىلعى قاۋلىسىنا سايكەس قازاقستاندىق ارميانىڭ ءتورت اسكەري قىزمەتشىسى باتىس ساحاراسى (MINURSO) مەن كوت-د’يۆۋارداعى (UNOCI) بۇۇ-نىڭ ەكى ميسسياسىندا قىزمەت وتكەرىپ جۇرگەندەرىن ايتا كەتكەن ءجون. سونىمەن بىرگە, قارۋلى كۇشتەردىڭ توعىز وفيتسەرى بۇۇ-نىڭ ميسسيالارىندا قىزمەتتەرىن اتقارىپ ۇيلەرىنە ورالدى. ولاردىڭ تورتەۋى بىتىمگەرشىلىككە قوسقان ۇلەستەرى ءۇشىن ماراپاتقا جانە ميسسيا قولباسشىلىعىنىڭ اتىنان العىس حاتقا يە بولدى.