"سىر ءۇمىتى" سىيلىعى تابىستالدى

24 قاراشا كۇنى قىزىلوردادا كوشباسشى جاستاردىڭ ءداستۇرلى «سىر ءۇمىتى» سىيلىعى تابىستالدى. ماراپاتتى وبلىس اكىمى قىرىمبەك كوشەرباەۆ تاپسىردى. ءوزىنىڭ العىسوزىندە قىرىمبەك كوشەرباەۆ وبلىستا جاستارعا ساپالى ءبىلىم بەرۋ, تۇراقتى جۇمىسقا ورنالاسۋ جانە ءوزىن-ءوزى دامىتۋ ءۇشىن بارلىق مۇمكىندىكتەر جاسالىپ جاتقاندىعىن ايتتى. - 200-گە جۋىق قىزىلوردالىق «بولاشاق» باعدارلاماسىنىڭ ستيپەندياتى اتاندى, ولاردىڭ 80 نەن استامى  قىزىلوردا وبلىسىندا جۇمىس ىستەيدى. 20 مىڭنان اسا قىز-جىگىت «جاسىل ەل», «ديپلوممەن اۋىلعا» جانە «جاستار تاجىريبەسى» مەملەكەتتىك باعدارلامالارىنا قاتىستى. رەسپۋبليكادا العاش رەت ءبىزدىڭ وبلىستا ەڭبەك رەسۋرستارىنىڭ بالانسى قۇرىلدى. 391 ستۋدەنت سىر ەلىنە  قاجەتتى ماماندىقتار بويىنشا رەسەيدىڭ الدىڭعى قاتارلى جوعارعى وقۋ ورىندارىندا ءبىلىم الۋدا, 4 مىڭعا جۋىق جاس تۇلەك «سەرپىن» باعدارلاماسىمەن وقىپ جاتىر.  512 وزات وقۋشى وبلىس اكىمىنىڭ گرانتىنا يە بولدى. بيىل العاش رەت وبلىستا شىعىس جاستارىنىڭ كوشباسشىسى عاني مۇراتباەۆ اتىنداعى سىيلىقتى تابىستادىق. كەلەشەكتە بۇل ءداستۇر  جالعاسىن تاباتىن بولادى,- دەدى وبلىس اكىمى. سالتاناتتى  شارانىڭ سوڭى كونتسەرتتىك باعدارلاماعا ۇلاستى.