ىرعىزعا گاز بەرىلدى

ىرعىز – گازداندىرىلعان سوڭعى اۋدان ورتالىعى. ەندى وبلىستىڭ بارلىق اۋدان ورتالىقتارىنىڭ تۇرعىندارى  كوگىلدىر وتىننىڭ يگىلىگىن كورەتىن بولدى.   «قازترانسگاز» اق  اۋدان ورتالىعىنداعى كوشەارالىق جانە جەتكىزۋشى گاز قۇبىرىنىڭ قۇرىلىسىن اياقتاپ, 6 مىڭ تۇرعىندى كوگىلدىر وتىنمەن قامتاماسىز ەتىپ وتىر. بۇل ماقساتتا اۆتوماتتاندىرىلعان گاز تاراتۋ ستانتسياسى, بلوكتى گاز رەتتەۋ پۋنكتى, 38 شكافتى گاز رەتتەۋ پۋنكتى, 164 شاقىرىم جەتكىزۋشى گاز قۇبىرى مەن ۇزىندىعى 53 شاقىرىمدى قۇرايتىن كوشەارالىق گاز قۇبىرى سالىندى. سالتاناتتى شارادا ءسوز العان وبلىس اكىمى بەردىبەك ساپارباەۆ بيىلعى جىل  قازاقستان ءۇشىن ايرىقشا ماڭىزدى ەكەنىنە,  ەلىمىزدىڭ تاۋەلسىزدىكتىڭ 25 جىلدىعىن مەرەلەگەلى وتىرعانىنا توقتالدى. ەگەمەندىك العان كۇننەن باستاپ ەلباسىمىز نۇرسۇلتان نازارباەۆتىڭ جۇرگىزىپ وتىرعان ساياساتى حالىقتىڭ ءال-اۋقاتىن جاقسارتۋعا باعىتتالعانىن, سونىڭ جارقىن كۋاسى ىرعىزعا گاز كەلگەنىن جەتكىزدى. -قازىر وبلىستىڭ 92 پايىز حالقى گازبەن قامتاماسىز ەتىلدى. وسىنىڭ بارلىعى ەلىمىزدىڭ ەكونوميكاسى دامۋىنىڭ, مەملەكەت باسشىسىنىڭ ءوزىنىڭ حالقىنا جاساعان قامقورلىعىنىڭ ناتيجەسى. وسى قۇرىلىسقا 6 ميلليارد تەڭگەدەن استام قارجى جۇمسالدى. ەندى جىلدىڭ سوڭىنا دەيىن كەمىندە 250 ءۇي, 30-دان استام مەكەمە گازعا قوسىلادى. ودان كەيىن ۇيلەر دايىندىعىنا بايلانىستى بىرتە-بىرتە گازعا قوسىلاتىن بولادى. ەندى گاز قۇبىرىنىڭ بويىندا ورنالاسقان 4 ەلدى مەكەندى دە قامتۋ ويلاستىرىلۋدا, - دەدى ءوڭىر باسشىسى. ودان سوڭ «قازترانسگاز» اق اقتوبە وندىرىستىك فيليالىنىڭ ديرەكتورى امانجول تاجىعاليەۆ, ەڭبەك ارداگەرى نۇرقاسىم سارسەنباي ۇلى جانە باسقا سويلەۋشىلەر ىزگى تىلەكتەرىن ءبىلدىرىپ, اۋدان تۇرعىندارى اتىنان ەڭبەك ارداگەرى امانتاي نۇرباەۆ اق باتاسىن بەردى. جوعارىدا اتالعان ازاماتتارمەن بىرگە بەردىبەك ساپارباەۆ گاز تاراتۋ قوندىرعىسىن  سالتاناتتى جاعدايدا ىسكە قوستى. ساتىبالدى ءساۋىرباي, «ەگەمەن قازاقستان» اقتوبە وبلىسى, ىرعىز اۋدانى.