قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆانىڭ توراعالىعىمەن پرەزيدەنت جانىنداعى ازاماتتىق ماسەلەلەرى جونىندەگى كوميسسيانىڭ كەزەكتى وتىرىسى ءوتتى. بۇل تۋرالى اقوردانىڭ ءباسپاسوز قىزمەتى حابارلادى.
وتىرىستا قازاقستاننىڭ ازاماتتىعىنا قابىلداۋ جانە ودان شىعۋ ماسەلەلەرى قاراستىرىلدى.
مەملەكەتتىك حاتشى گۇلشارا ابدىقالىقوۆا قازاقستاننىڭ ازاماتى بولۋعا تالپىنعان ادام سانى تاۋەلسىزدىك العان ساتتەن باستاپ تۇراقتى تۇردە ءوسىپ كەلە جاتقانىن اتاپ ءوتتى. بۇل جايت ەلباسىنىڭ پاراساتتى باسشىلىعى ارقاسىندا ەلىمىز قول جەتكىزگەن الەۋمەتتىك-ەكونوميكالىق تۇراقتىلىقتىڭ, ۇلتارالىق جانە ازاماتتىق تاتۋلىق پەن ورنىقتى دامۋدىڭ ايقىن ايعاعى بولىپ سانالادى.
«ءبىز رەسپۋبليكا تاۋەلسىزدىگىنىڭ 25 جىلدىعىنىڭ قارساڭىندا ەلىمىزدىڭ جاڭا ازاماتتارىن ىستىق ىقىلاسپەن قۋانا قارسى الامىز. ولارعا باقىتتى ءومىر جانە ەندى ولاردىڭ دا وتانى بولىپ سانالاتىن ەلىمىزدىڭ يگىلىگى جولىنداعى جۇمىستارىنا تابىس تىلەيمىز. قازاقستاننىڭ لايىقتى ازاماتى اتانىپ, ەگەمەندى ەلىمىزدىڭ ودان ءارى دامۋىنا ولار ءوز ۇلەستەرىن قوسادى دەپ سەنەمىن», – دەدى مەملەكەتتىك حاتشى.
مەملەكەت باسشىسى ءتيىستى جارلىققا قول قويعاننان كەيىن تاياۋ جانە الىس شەتەلدەردەن كەلگەن ءارتۇرلى ۇلتتىڭ 622 وكىلى جاڭا قازاقستاندىقتار اتانادى.
سونداي-اق, جيىندا ىشكى ىستەر مينيسترلىگىنىڭ قازاقستان رەسپۋبليكاسى ازاماتتىعىنا جەڭىلدەتىلگەن تارتىپپەن قابىلداۋ جانە ازاماتتىقتان ايىرۋ ماسەلەلەرى جونىندەگى جۇمىس ناتيجەلەرى تالقىلاندى.
كوميسسيا وتىرىسىنىڭ قورىتىندىسى بويىنشا ءتيىستى شەشىمدەر مەن ۇسىنىمدار قابىلداندى.