بيىل ەلىمىزدە قىس ەرتە ءتۇسىپ, اۋا رايىنىڭ كۇرت ناشارلاۋى حالىقتى ابىگەرگە سالۋدا. قالىڭ تۇسكەن قار, انومالدى تومەن تەمپەراتۋرا, بۇرقاسىندار مەن بوراندار كوپتەگەن توتەنشە جاعدايلاردىڭ ورىن الۋىنا سەبەپ بولىپ وتىر. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگ بارىسىندا ىشكى ىستەر ءمينيسترىنىڭ ورىنباسارى يۋري يلين ايتىپ بەردى.
«تەك قازان-قاراشا ايلارىندا «قازگيدرومەت» رمك ەلىمىزدىڭ وڭىرلەرىندە اۋا رايىنىڭ كۇرت ناشارلاۋى تۋرالى 45 داۋىلدى الدىن الا ەسكەرتۋ تاراتتى. اۋا رايىنىڭ ناشارلاۋىنا (كوكتايعاق, بۇرقاسىن, تەمپەراتۋرانىڭ تومەندەۋى) بايلانىستى ديزەل وتىنىمەن جۇرەتىن قوعامدىق جانە جۇك اۆتوكولىكتەرى ءۇشىن استانا قالاسى, اقمولا, الماتى, شىعىس قازاقستان, قاراعاندى, قىزىلوردا, پاۆلودار, جامبىل جانە سولتۇستىك قازاقستان وبلىستارىندا جول قوزعالىسى 38 رەت جابىلدى», – دەدى يۋ. يلين.
ول سونداي-اق قار باساتىن ۋچاسكەلەردىڭ جالپى قاشىقتىعى 3399,82 شاقىرىمدى قۇرايتىنىن, 42008,6 شاقىرىم جول ۋچاسكەسىنە قاردان قورعايتىن قالقاندار ورناتىلعانىن اتاپ ءوتتى.
«جالپى جەكە قۇرامنان 120 مىڭنان استام ادام مەن 22 مىڭنان استام بىرلىك تەحنيكا بار 9849 ازاماتتىق قورعاۋ قۇرالىمى ازىرلىككە كەلتىرىلدى. ونىڭ ىشىندە ءىىم بولىمشەلەرىنىڭ (ۇلتتىق ۇلان, توتەنشە جاعدايلار كوميتەتى, اكىمشىلىك پوليتسيا كوميتەتى) كوماندالىق-شتابتىق ماشينالارىن, ۆاحتوۆكالاردى, كەز-كەلگەن جەردە جۇرە الاتىن ماشينالاردى, اۆاريالىق-قۇتقارۋ جانە مامانداندىرىلعان اسكەري تەحنيكانى قوسا العانداعى 1926 بىرلىك وتىمدىلىگى جوعارى تەحنيكاسى بار», – دەپ ءمالىم ەتتى ءمينيستردىڭ ورىنباسارى.
ايدار ورىسباەۆ,
"ەگەمەن قازاقستان".