قر ەڭبەك زاڭناماسىنىڭ ساقتالۋىن باقىلاۋ ماقساتىندا وسى جىلدىڭ 10 ايىندا وڭتۇستىك قازاقستان وبلىسىنىڭ مەكەمەلەرى مەن كاسىپورىندارىندا 702 تەكسەرۋ جۇرگىزىلدى. بۇل تۋرالى وبلىستىق ەڭبەك ينسپەكتسياسى جونىندەگى باسقارماسىنىڭ باسشىسى باسقار ەسقاراەۆ ايتتى.
ونىڭ ايتۋىنشا, جۇرگىزىلگەن تەكسەرۋلەردىڭ بارىسىندا 1166 زاڭ بۇزۋشىلىق انىقتالعان. ونىڭ 840 ەڭبەك تۋرالى, 254 ەڭبەك قاۋىپسىزدىگى مەن ەڭبەكتى قورعاۋ بويىنشا بولسا, 71-ءى وزگە فاكتىلەر. انىقتالعان زاڭ بۇزۋشىلىقتاردىڭ ىشىندە 1035-ءى جويىلىپ, زاڭعا سايكەستەندىرىلگەن.
باسقارما باسشىسى ءوز ەسەبىندە اتالعان زاڭ بۇزۋشىلىقتىڭ باسىم بولىگى ەڭبەك زاڭناماسىنىڭ ساقتالماۋى, ياعني, جۇمىسقا قابىلدانعان قىزمەتكەرلەرمەن ەڭبەك شارتتارىنىڭ جاسالماۋى, جالاقىنىڭ ۋاقىتىلى تولەنبەۋى, ۇستەمە, مەرەكە جانە دەمالىس كۇندەرىندەگى جۇمىسقا, سونداي-اق تۇنگى ۋاقىتتاعى جۇمىسقا تيىسىنشە اقى تولەمەۋ, جۇمىس بەرۋشىلەر تاراپىنان ايەلدەردىڭ ەڭبەك قۇقىعىنا قىسىم جاسالۋى سياقتى فاكتىلەردى كەلتىردى.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.