نيگەر ۇكىمەتى ليۆيا كوسەمى مۋامار كاددافيدىڭ بالاسى سااديگە باسپانا بەرگەن.
وسىنىڭ الدىنداعى كۇنى ول ءوزىنىڭ جولباسشىلارىمەن بىرگە ليۆيا جاعىنان نيگەر ەلىنە كەلىپ كىرگەن كورىنەدى. نيگەردىڭ ادىلەت ءمينيسترى مارۋ ءامادۋدىڭ ايتۋىنشا, اسكەري پاترۋل ليۆيا شەكاراسى جاعىنان جوعارى جىلدامدىقپەن كەلە جاتقان اۆتوموبيلدەر توبىنا نازار اۋدارعان. اسكەريلەر كولوننانى توقتاتقان كەزدە اۆتوماشينەلەردىڭ بىرىندە ساادي كاددافيدىڭ بار ەكەنى انىقتالعان. ونىڭ قاسىندا ون ادام بولعان كورىنەدى.
قۇربانداردى ەسكە ءتۇسىردى
اقش وتكەن دەمالىس كۇندەرى 2001 جىلدىڭ 11 قىركۇيەگىندە بولعان تەررورلىق اكت قۇرباندارىن ەسكە الدى.
نيۋ-يوركتە بۇكىلالەمدىك ساۋدا ورتالىعىندا قازا تاپقاندارعا ەسكەرتكىش اشىپ جاتقان كەزدە بۇكىل امەريكالىق ارنايى قىزمەت جاڭا تەراكتىنى كۇتۋمەن بولعان كورىنەدى. ماسەلەن, ۆاشينگتون اۋەجايىندا بىرنەشە ساعات بويى بومبا ىزدەگەن, بىراق دابىل جالعان بولىپ شىققان. اقش تاريحىندا ورىن العان ەڭ ءىرى تەررورلىق اكت سالدارىنان 19 تەررورشىنىڭ سىرتىندا 2973 ادامنىڭ قازا تاپقانى بەلگىلى.
ليۆان ەگەمەندىگىن مويىنداۋدى تالاپ ەتتى
ەگيپەت بيلىگى يزرايلدەن ليۆاننىڭ ەگەمەندىگىن بۇلتارىسسىز مويىنداۋدى تالاپ ەتتى.
سونىمەن بىرگە, رەسمي كاير يزرايل اسكەري-اۋە كۇشتەرىنىڭ اتالعان ەلدىڭ اۋماعىمەن ۇشۋىن توقتاتۋدى دا تالاپ ەتكەن. «مااريۆ» باسىلىمىندا جازىلعانداي, ەگيپەت سىرتقى ىستەر مينيسترلىگى كايردەگى يزرايل ەلشىلىگىنە شابۋىل جاسالعاننان كەيىن ەكى كۇن وتە سالىسىمەن وسىنداي مالىمدەمە جاساعان. ازىرگە ەگيپەت ۇكىمەتىنىڭ مۇنداي مالىمدەمەسىنە يزرايل جاعى ەشقانداي جاۋاپ قايتارماعان كورىنەدى.
ءازىل ءتۇبى – ءزىل
جاپونيانىڭ ەكونوميكا, ەڭبەك جانە ونەركاسىپ ءمينيسترى يوسيو حاتيرو «فۋكۋسيما» ستانساسىنداعى اپاتقا قاتىستى ءساتسىز قالجىڭىنان كەيىن وتستاۆكاعا كەتكەن.
Daily Yomiuri باسىلىمىنىڭ حابارلاۋىنشا, حاتيرونىڭ «فۋكۋسيما-1» ستانساسىنا ينسپەكتسيالىق ساپارمەن بارۋ كەزىندە ايتقان بىرقاتار ازىلدەرى جانجالدىڭ تۋىنا سەبەپكەر. ول اتوم ەلەكتر ستانساسى جانىنداعى تۇرعىن اۋدانداردى «ەلەس-قالالار» دەپ اتاعان كورىنەدى. ءسويتىپ, جۇرتشىلىقتىڭ اشۋ-ىزاسىنان كەيىن ول وتستاۆكاعا كەتەتىنى تۋرالى ءوتىنىش بەرۋگە ءماجبۇر بولعان.
اسكەري بازا جانىنداعى جارىلىس
اۋعانستاندا جانكەشتى جارىلعىش تيەلگەن ءاۆتوموبيلدى حالىقارالىق كۇشتەردىڭ اسكەري بازاسىنىڭ قاقپاسى الدىندا جارىپ جىبەرگەن.
اۋعانستاننىڭ ۆارداك پروۆينتسياسىندا ورىن العان تەراكت سالدارىنان جارالى بولعاندار مەن قازا تاپقاندار سانى 110 ادامعا جەتكەن. جاراقات العانداردىڭ ىشىندە اقش-تىڭ 77 سولداتى دا بار. تاليبتەردىڭ ءباسپاسوز حاتشىسى زابيۋللا مودجاحەدتىڭ جۋرناليستەرگە حابارلاۋىنا قاراعاندا, جانكەشتى وتىرعان اۆتوماشينەدە 100 كيلودان استام جارىلعىش بولعان كورىنەدى.
اتوم ەلەكتر ستانساسى ىسكە قوسىلدى
دۇيسەنبى كۇنى يرانداعى تۇڭعىش «بۋشەر» اتوم ەلەكتر ستانساسىنىڭ ءبىرىنشى ەنەرگوبلوگى ىسكە قوسىلدى, دەپ حابارلادى ريا نوۆوستي اگەنتتىگى.
قۇرىلىس رەسەيمەن بىرلەسە جۇرگىزىلگەندىكتەن بۋشەردە وتەتىن ءىس-شارالارعا رەسەي ەنەرگەتيكا ءمينيسترى سەرگەي شماتكو مەن روساتوم باسشىسى سەرگەي كيريەنكو قاتىسادى. اتوم ەلەكتر ستانساسىنىڭ جوبالىق قۋاتى 1 مىڭ مۆت.-تى قۇراماق. تاياۋ بولاشاقتا ستانسا ءوز قۋاتىنىڭ 34-40 پايىزى مولشەرىندە جۇمىس ىستەيتىن بولادى.
مۇنايشىلاردى ىزدەۋ جالعاسۋدا
مەكسيكا شىعاناعىندا 8 قىركۇيەك كۇنى جوعالىپ كەتكەن ون مۇنايشىنىڭ جەتەۋى ءتىرى جانە ولاردى امان-ەسەن قۇتقارىپ العان.
مۇنايشىلار 11 قىركۇيەك كۇنى مەكسيكا جاعالاۋىنان شامامەن 80 شاقىرىمداي قاشىقتىقتا تابىلعان كورىنەدى. قۇتقارۋشىلار ءتىرى قالعاندارمەن بىرگە قازا تاپقان 2 جۇمىسشىنىڭ دا دەنەلەرىن تاۋىپ العان. جوعالىپ كەتكەن سوڭعى مۇنايشىنى ىزدەستىرۋ ءالى دە جالعاسۋدا.
بەيبىت كەلىسسوزدەرگە ورالۋعا شاقىردى
يزرايلدىك شاباك جانە «موسساد» ارنايى قىزمەتتەرى ەل ۇكىمەتىنە پالەستينا جاعىمەن بەيبىت كەلىسسوزدەرگە قايتا ورالۋدىڭ ءتيىمدى ەكەندىگىن ءمالىمدەگەن.
بۇل تۋرالى ءيزرايلدىڭ قورعانىس ءمينيسترى ەحۋد باراكتىڭ توڭىرەگىندەگى اقپارات كوزدەرىنە سىلتەمە جاساي وتىرىپ, «گاارەتس» باسىلىمى حابارلاعان. ارنايى قىزمەتتىڭ باياندامالارىندا كەلتىرىلگەن كوزقاراستاردى پرەمەر-مينيستر بينيامين نەتانياحۋعا جانە ۇكىمەتتىڭ باسقا دا مۇشەلەرىنە باراكتىڭ ءوزى جەتكىزگەن كورىنەدى. ونىڭ ايتۋىنشا, ەگەر يزرايل قاتاڭ باعىت ۇستانا بەرەتىن بولسا, مۇنىڭ ءوزى ەلدىڭ حالىقارالىق قوعامداستىقتان وقشاۋ قالۋىنا اپارىپ سوقتىرۋى مۇمكىن.
باقىلاۋ كۇشەيتىلمەيتىن بولدى
ەگيپەت بيلىگى كۇشەيتىلگەن ۆيزالىق باقىلاۋ جونىندەگى وسىعان دەيىن قابىلدانعان شەشىمنىڭ كۇشىن جويدى, دەپ حابارلاعان Associated Press اگەنتتىگى.
بۇعان دەيىن وڭايلاتىلعان سحەمانى پايدالانىپ كەلگەن ەلدەردىڭ ازاماتتارىنا شەكارادان وتكەن كەزدە قۇجاتتار تولتىرۋعا تۋرا كەلەتىندىگى جونىندە حابارلانعان بولاتىن. ەگيپەتتىڭ تۋريزم ءمينيسترى مۋنير فاحري ابدەل نۋر اتاپ كورسەتكەندەي, كابينەت قابىلدانعان شارالارعا قاتىستى جەرگىلىكتى حالىق پەن شەتەلدىكتەردىڭ رەاكتسياسى ەلدىڭ تۋريستىك سەكتورى ءۇشىن بولاتىن تەرىس زارداپتاردى بىلدىرەدى دەگەن ورتاق پىكىرگە توقتالعان. وسى ورايدا تۋريستىك سالانىڭ پيراميدالار ەلى ءۇشىن اسا ماڭىزدى ورىن الاتىنىن ايتا كەتۋ قاجەت.
يانۋكوۆيچ تۇركىمەنستانعا كەلدى
12-13 قىركۇيەك كۇندەرى ۋكراينا پرەزيدەنتى ۆيكتور يانۋكوۆيچ رەسمي ساپارمەن تۇركىمەنستاندا بولادى, دەپ حابارلاعان مەملەكەت باسشىسىنىڭ ءباسپاسوز قىزمەتى.
ساپار بارىسىندا ەكونوميكالىق قىزمەتتەستىكتى ودان ءارى تەرەڭدەتۋ, اتاپ ايتقاندا, ۋكرايناعا تۇركىمەن گازىن جەتكىزۋدى قايتا جولعا قويۋ ماسەلەلەرى كوتەرىلمەكشى. وڭىرلەر پارتياسى فراكتسياسى باسشىسىنىڭ ورىنباسارى اناتولي كيناح اتاپ كورسەتكەندەي, ساپار ەنەرگيا كوزدەرىن جەتكىزۋ جولدارىن ارتاراپتاندىرۋعا ىقپالىن تيگىزەتىن بولادى.
ينتەرنەت ماتەريالدارى نەگىزىندە ازىرلەندى.