«نۇر وتان» حدپ پارتيالىق باقىلاۋ كوميتەتىنىڭ توراعاسى بوران راحىمبەكوۆ جۇمىس ساپارىمەن وبلىستا بولىپ قايتتى. ونىڭ جۇمىس ساپارىنىڭ ماقساتى – وبلىستاعى سالىنىپ جاتقان ماڭىزدى نىساندارداعى جۇمىس ساپاسىنا نازار اۋدارۋ, ولاردا جۇمىس ىستەيتىن جۇمىسشىلارعا ەڭبەكاقى تولەۋدىڭ زاڭدىلىعىن, قاجەتتى تۇرمىستىق جاعداي جاساۋدىڭ بارىسىن قاداعالاۋ, پارتيالىق باقىلاۋ بەكەتتەرىنىڭ جۇمىسىمەن تانىسۋ, كەمشىلىكتەر انىقتالعان جاعدايدا ونى جويۋعا ىقپال ەتۋ.
پارتيالىق باقىلاۋ كوميتەتىنىڭ توراعاسى الدىمەن «باتىس ەۋروپا – باتىس قىتاي» حالىقارالىق كولىك ءدالىزىنىڭ 102 شاقىرىم بولاتىن «اقتوبە – مارتوك – رەسەي شەكاراسى» اۆتوموبيل جولى قۇرىلىسىنىڭ بارىسىمەن تانىستى. وبلىس ورتالىعىنان شىعاتىن جولدىڭ بەسىنشى شاقىرىمىنان باستاپ رەسەيدىڭ شەكاراسىنا دەيىنگى جول قۇرىلىسىن سالىپ جاتقان ءتۇركيانىڭ «CENGIZ INSAAT» فيرماسى ەكەن. جول بويىنداعى جۇمىس جايىندا «اقتوبە – مارتوك – رەسەي شەكاراسى» اۆتوموبيل جولىن قايتا جاراقتاندىرۋ جوباسىنىڭ جەتەكشىسى يگيت يازىدجي باياندادى. ونىڭ ايتۋىنشا, بۇل جوبانى مەرزىمىنەن بۇرىن اياقتاۋدىڭ بارلىق ءمۇمكىندىكتەرى بار.
جول بويىندا 14 كوپىر سالىنۋى ءتيىس. قازىر اقتوبە قالاسىنان سارجانساي اۋىلىنا دەيىن 45 شاقىرىمدا جۇمىس قىزۋ ءجۇرگىزىلۋدە. 25 شاقىرىمعا ەكى قابات ساپالى قاتتى جامىلعى توسەلىپتى. قىسقا دەيىن 40 شاقىرىمعا اسفالت توسەۋ اياقتالادى. جۇمىس ەكى اۋىسىممەن جۇرگىزىلۋدە. جول قۇرىلىسىنا قاجەتتى قيىرشىق تاس, تەمىر-بەتون جاقىن جەردەن جەتكىزىلەدى, بيتۋمنىڭ قاجەتتى قورى جاسالعان. جوبانى جۇزەگە اسىرۋعا 894 ادام قاتىسۋدا, سونىڭ 65-ءى عانا تۇرىك ازاماتى, قالعاندارى جەرگىلىكتى جۇمىسشىلار. مۇندا سونداي-اق ساعاتىنا 250 توننا اسفالت شىعاراتىن زاۋىت جۇمىس ىستەيدى. جالپى, جوبانى جۇزەگە اسىرۋعا 14 ميلليارد تەڭگە قارالعان.
– «باتىس ەۋروپا-باتىس قىتاي» حالىقارالىق ءدالىزىنىڭ اقتوبە وبلىسى اۋماعىندا قىرۋار جۇمىس اتقارىلۋدا. ءبىز وسىندا جۇمىس ىستەيتىن ازاماتتارىمىزدىڭ قۇقىقتارى بۇزىلماي ما, جۇمىس ساپاسى ساقتالا ما, سونى قاداعالاۋعا كەلدىك. ءاربىر ۋچاسكەدە پارتيالىق باقىلاۋ بەكەتتەرى جۇمىس ىستەيدى. بۇدان باسقا پارتيالىق باقىلاۋ كوميتەتىنىڭ ارالاسۋىمەن وسى جوباعا اقتوبە قالاسىن ءسولتۇستىكتەن اينالىپ وتەتىن قوسىمشا جول قۇرىلىسىن سالۋ قولعا الىندى. سوندا قالا ىشىمەن وتەتىن اۆتوكولىكتەر سانى اناعۇرلىم ازايادى, – دەدى بوران عيزات ۇلى.
ب.راحىمبەكوۆ جۇمىسشىلار تاماقتاناتىن 150 ورىندىق اسحانادا بولىپ, جۇمىسشىلاردىڭ جاتىن ورنىن, مەدپۋنكتتى كوردى, جۇمىسشىلارمەن جۇزدەسىپ, حال-جاعدايلارىنا قانىقتى. سونىمەن قاتار, جاڭادان پايدالانۋعا بەرىلگەن وبلىستىق بالالار كلينيكالىق اۋرۋحاناسىندا بولىپ, وسىنداعى پارتيالىق باقىلاۋ بەكەتىنىڭ جۇمىسىمەن تانىستى.
ساتىبالدى ءساۋىرباي.
اقتوبە وبلىسى.