عاشىقتار عالامتور ارقىلى نەكەلەستى

بۇگىندە مەملەكەتىمىزدىڭ ەل­ەكتروندى ۇكىمەت قۇرۋ ءجو­نىندەگى ارەكەتى بىرتىندەپ ءجۇ­زەگە اسىپ كەلەدى. قا­زىرگى اق­پا­راتتىق تەحنولوگيالار زاما­نىندا ونىڭ ءتىلىن جىلدام مەڭ­گەرگەن جان­دار ۇيىندە وتى­رىپ-اق, تولقۇجا­تىن ينتەرنەت ار­قىلى رە­سىمدەپ, كوم­مۋ­نال­دىق قىز­مەت اقىسىن ءتو­ل­ەپ, ءتىپتى نەكەگە دە وتى­را الادى. بۇل ەلەك­تروندى ۇكى­مەت قۇرۋ­دا­عى قىزمەتتەردىڭ ءبىر پا­راسى عانا. قىسقاسى, ادىلەت مينيسترلىگى دە اۆ­تو­مات­تان­­دىرىلعان مەملەكەتتىك قىز­مەتتەردىڭ سانىن ۇل­عاي­تۋدا بىرقاتار شارالار قا­بىلداۋدا. وسىنىڭ ءبىر كورىنىسى – دۇيسەنبى كۇنى الماتىداعى «جاس وتاۋ» ورتالىق نەكە سا­رايىندا جاڭا جۇپ ينتەرنەت ارقىلى جۇ­باي­لىق ومىرگە جولداما الدى. وسىلايشا, ال­ماتى قالاسىندا ينتەرنەت ارقىلى نەكە ءرا­سىمىن تىركەۋ تۋرالى ءوتىنىش تۇسىرگەن تۇڭعىش قازاقستاندىق جۇپ نەكەگە تۇردى. ەندىگى جەردە تۇرعىنداردىڭ ۋاقىتىن ۇنەمدەپ, جۇ­مى­سىن جەڭىلدەتەتىن مۇنداي تىرلىكتەر ۇيرەن­شىكتى ۇردىسكە اينالا بەرمەك. بۇل قىزمەت ءتۇرى تەك قازاقستان رەسپۋبليكاسىنىڭ ازا­مات­­تارىنا عانا كورسەتىلەدى. سونىمەن اسحات سادىرباەۆ پەن ەركە ەسماحان وڭتۇستىك استاناداعى ادىلەت دەپار­تا­مەنتىنىڭ اۋەزوۆ اۋداندىق احاج ءبولىمى قىز­مەتىنە ءبىرىنشى بولىپ 08.08.2011 جىلى ەلەكتروندى تۇردە ءوتىنىش بەرگەن. قالاي دەسەك تە, ولار ەلىمىزدەگى ينتەرنەت ارقىلى تۇڭعىش باس قوسقان جاندار بولىپ ەسەپتەلمەك. بۇلاردى جۇلدىزدى جۇپ دەپ تە اتاۋعا بولادى. اسحات – «ەلارنا» تەلەارناسى ارقىلى «شىركىن-لايف» باعدار­لاما­سى­نىڭ پروديۋسەرى ءارى جۇرگىزۋشىسى رەتىندە تانىلىپ كەلە جاتسا, ەركە ەسماحان – «ىڭكار» توبىنىڭ ءانشىسى. وسىلايشا, ەلىمىزدە العاشقى ەلەكتروندى جۇيەمەن جۇرگى­زىل­گەن نەكە قيۋ سالتاناتىنا قازاق­ستاندىق ەسترادا, كينو جانە تەلەۆيزيا جۇلدىزدارى دا كەلدى. سول سياقتى بۇل يگى شاراعا باي­لانىس جانە اقپارات مينيستر­لى­گى­نىڭ جانە «ۇلتتىق اقپاراتتىق تەحنولوگيالار» اق وكىلدەرى قاتىستى. ەسكە سالا كەتەيىك, ەندىگى جەردە قازاقستان ازاماتتارى عالام­شار­دىڭ كەز كەلگەن نۇكتەسىندە تۇرىپ, نەكە ءراسىمىن تىركەۋ تۋرا­لى ءوتىنىشتى www.egov.kz پورتالى ارقىلى بەرە الادى. باستى تالاپ – جاستاردا ەلەك­ترون­­دى-ساندىق قول­تاڭبانىڭ بولۋى. ال اتالعان قىزمەتتى قولدانعان العاشقى 50 جۇپ قازاقستاندىق جۇلدىزداردىڭ قۇت­تىق­تاۋلارى جازىلعان بەينەتاسپالاردى الادى. ايناش ەسالي. الماتى. –––––––––––––––––––– سۋرەتتى تۇسىرگەن بوريس بۋزين.