استانا تەمىر جول ۆوكزالىنان 10 قىركۇيەك كۇنى «مەنىڭ قازاقستانىم» اقپاراتتىق-ناسيحات پويىزى ءبىرىنشى كەزەڭنەن كەيىنگى ساپارىن جالعاستىرۋ ءۇشىن جولعا شىقتى.
مۇنىڭ الدىندا, ياعني 10-20 تامىز كۇندەرى سولتۇستىك-شىعىس ءوڭىردى ارالاعان پويىز ەندى 27 قىركۇيەككە دەيىن ەلىمىزدىڭ وڭتۇستىك-باتىس ايماقتى ءجۇرىپ وتەتىن بولادى. وسى ۋاقىت ىشىندە شاراعا قاتىسۋشىلاردىڭ ەلدى-مەكەندەردە كونتسەرتتەر قويىپ, دارىگەرلىك كومەك كورسەتىپ, جەرگىلىكتى حالىقپەن كەزدەسۋلەرى جوسپارلانىپ وتىر.
بۇل ءىس-شارا مادەنيەت مينيسترلىگى مەن «نۇر وتان» حدپ-نىڭ ۇيىمداستىرۋىمەن ەل ءتاۋەلسىزدىگىنىڭ 20 جىلدىعى اياسىندا وتكىزىلۋدە. وعان الەۋمەتتىك قىزمەت, دەنساۋلىق ساقتاۋ, قارجى سەكتورى, مادەنيەت, سپورت قايراتكەرلەرى جانە باسقا دا سالا قىزمەتكەرلەرى قاتىسۋدا. گازەتىمىزدە بۇعان دەيىن حابارلاعانىنداي, اتالعان شارانىڭ ماقساتى – بارلىق ءوڭىر تۇرعىندارىن ەل ءتاۋەلسىزدىگىنىڭ 20 جىلدىق مەرەكەسىنە اتسالىسۋعا تارتۋ, تاۋەلسىزدىك اكەلگەن جەتىستىكتەردى ءاربىر ازاماتقا جەتكىزۋ, حالىقتار اراسىندا بىرلىك پەن ىنتىماقتاستىقتى, سالاماتتى ءومىر سالتى مەن ەلباسىنىڭ قازاقستان حالقىنا جولداۋىن ناسيحاتتاۋ, شالعاي ەلدى-مەكەندەردە تۇراتىن ازاماتتارعا ءتۇرلى كومەك كورسەتۋ جانە مەملەكەتتىڭ جاڭا الەۋمەتتىك ساياساتىنىڭ ءمانىن ءتۇسىندىرۋ.
سەنبى كۇنى ساعات تاڭەرتەڭ استانادان شىققان پويىز ساعات 09.30-دا اتباسارعا كەلدى. وسى جەردە تەمىر جول ۆوكزالىنىڭ الدىندا سالتاناتتى شارا ءوتتى. وعان اۋدان اكىمى رۋسلان ءاۋباكىروۆ, «نۇر وتان» حدپ-نىڭ اقمولا وبلىستىق فيليالى توراعاسىنىڭ ورىنباسارى عالىم شويكين, قازاقستاننىڭ حالىق ءارتىسى التىنبەك قورازباەۆ, «گۇلدەر» ءانسامبلىنىڭ جەتەكشىسى جەڭىس سەيدوللا, اۋداندىق تۋبەركۋلەزگە قارسى ديسپانسەردىڭ باس ءدارىگەرى باۋىرجان دىلدابەكوۆ, سونداي-اق سوعىس جانە ەڭبەك ارداگەرلەرى كەڭەسىنىڭ توراعاسى يۆان كوميسساروۆ قاتىسىپ, ءسوز ءسويلەدى.
وسىدان كەيىن اۋداندىق جۇمىسپەن قامتۋ جانە الەۋمەتتىك باعدارلامالار باسقارماسىندا زەينەتاقىمەن قامتاماسىز ەتۋ, الەۋمەتتىك ساقتاندىرۋ, الەۋمەتتىك كومەك بەرۋ, زاڭدىق جانە بانكتىك قىزمەت كورسەتۋ ماسەلەلەرى بويىنشا «نۇر وتان» حدپ-نىڭ قوعامدىق قابىلداۋى بولدى. سونىمەن بىرگە, اۋداندىق اۋرۋحانادا «اشىق ەسىك كۇنى» ءوتكىزىلىپ, وندا حالىققا دارىگەرلىك كومەك-كەڭەس بەرىلدى. اۋداندىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ساۋلە دۇيسەنباەۆانىڭ ايتۋىنشا, ازاماتتارعا بارلىق ماسەلە بويىنشا كومەك كورسەتىلدى. مىسالى, ەڭبەك جانە حالىقتى الەۋمەتتىك قورعاۋ مينيسترلىگىنىڭ باقىلاۋ جانە حالىقتى الەۋمەتتىك قورعاۋ كوميتەتىنىڭ ساراپشىسى راۋشان كوشكىنبەكوۆا ءوزىنىڭ قابىلداۋىندا بولعان ازاماتتاردىڭ بارىنە ءتۇرلى كەڭەس بەردى. ونىڭ قابىلداۋىندا 20-دان استام ادام بولىپ, زەينەتاقىنى كوبەيتۋ ماسەلەسى تۋرالى مول ماعلۇمات الدى. سونىڭ ىشىندە اتباسار قالاسىندا 30-40 جىل تەمىر جول سالاسىندا جۇمىس ىستەگەن ازاماتتار زەينەتاقىنى ءوسىرۋ تۋرالى وتىنىشتەرىن ءبىلدىردى. قازىر ولار 40 000 - 45 000 تەڭگە زەينەتاقى الادى ەكەن. بۇل ورتاشا زەينەتاقى بولىپ سانالادى. ەلىمىزدە ەڭ تومەڭگى زەينەتاقى 16 000 تەڭگە. الايدا باسقا سالالاردا زەينەتاقى ۇستەمەلەپ بەرىلىپ جاتسا, تەمىر جولدىڭ بۇرىنعى قىزمەتكەرلەرىنە ونداي جەڭىلدىكتەر قاراستىرىلماعان كورىنەدى. زەينەتكەرلەر وسى ءماسەلەنى تىلگە تيەك ەتتى. سونداي-اق حاليفا باترۋدتينوۆا دەگەن قالا تۇرعىنى ءوزى تىل ارداگەرى ەكەنىن, بىراق ونى راستايتىن كۋاگەرلەردىڭ جوقتىعىن ايتىپ, وسى ماسەلەنى وڭ شەشۋدىڭ جولدارىن سۇرادى. ناتيجەسىندە وسى ماسەلە بويىنشا اۋداندىق ارداگەرلەر كەڭەسىنە قولداۋ حات جىبەرىلەتىن بولدى. قوعامدىق قابىلداۋدا بولعان مۇگەدەك انا زامزەگۇل زەيتەنوۆانىڭ ۇيىنە سۋ قۇبىرىن تارتۋ تۋرالى ءوتىنىشى دە قاناعاتتاندىرىلدى. ال ەرلى-زايىپتى زەينەتكەرلەر بەگەندىك پەن راش جاناباەۆتار كەزدەسۋدە ەلباسىنىڭ اعا ۇرپاقتى قولداۋداعى ازاماتتىق ىسىنە ريزاشىلىقتارىن ءبىلدىردى.
«نۇر وتان» پارتياسىنىڭ قابىلداۋ بولىمىندە دە ءبىراز ماسەلە قارالدى. پارتيانىڭ ورتالىق اپپاراتى قوعامدىق قابىلداۋ ءبولمەسىنىڭ كەڭەسشىسى اسقار قۇمارباي كەزدەسۋدە ەكى ماسەلە شەشىلگەنىن ايتتى. ونىڭ العاشقىسى, اكە-شەشەسى مۇگەدەك بالانىڭ اسكەري ۋچيليششەگە وقۋعا ءتۇسۋ جونىندە بەرگەن ءوتىنىشى بولسا, ەكىنشىسى جاس وتباسىلاردى تۇرعىن ۇيمەن قامتاماسىز ەتۋ جايى ەكەن. اۋداندىق اۋرۋحانادا جەرگىلىكتى ماماندار مەن جىلجىمالى مەديتسينالىق كەشەننىڭ دارىگەرلەرى 729 ادامدى قابىلداسا, ءاربىر مامان 40-45 ازاماتقا دارىگەرلىك كومەك كورسەتتى. مۇنىڭ الدىندا ولار شارانىڭ ءبىرىنشى كەزەڭىندە 3 442 ادامدى قابىلداسا, وسى جولى 12 كۇننىڭ ىشىندە 10 000-نان استام ادامعا كومەك كورسەتۋدى جوسپارلاۋدا.
وسى كۇنى وليمپيادا چەمپيوندارى ەرماحان ىبىرايىموۆ پەن يۋري مەلنيچەنكو بالالار جانە جاسوسپىرىمدەر سپورت مەكتەبىندە شەبەرلىك-سىنىپتارىن ءوتكىزىپ, باپكەرلەرمەن, سپورتشىلارمەن جۇزدەستى. ودان كەيىن اۋداندىق مادەنيەت ۇيىندە ەلباسى ن.نازارباەۆتىڭ بالالىق شاعى تۋرالى «بالالىق شاعىمنىڭ اسپانى» اتتى كوركەم فيلم مەن شاراعا قاتىسۋشىلاردىڭ حالىقپەن كەزدەسۋى, «لوكوموتيۆ» ستاديونىندا سپورتتىق ءىس-شارالار وتسە, ونىڭ سوڭى مەرەكەلىك كونتسەرتكە ۇلاستى. كەشكە انشىلەر التىنبەك قورازباەۆ, باعدات ءسامەدينوۆا, «گۇلدەر» مەن «ءالقيسسا» بي ءانسامبلى, «بايتەرەك» توبى قاتىستى.
ال كەشە تاڭەرتەڭ پويىز حرومتاۋعا كەلىپ جەتتى. ۆوكزال الدىنداعى الاڭدا ميتينگ ءوتتى. وعان قالالىقتارمەن قوسا جاقىن جەردەگى اۋىل تۇرعىندارى دا جينالدى.
سالتاناتتى شارادا اقتوبە وبلىسىنىڭ اكىمى ارحيمەد مۇحامبەتوۆ, «نۇر وتان» حدپ ءتوراعاسىنىڭ ءبىرىنشى ورىنباسارى نۇرلان نىعماتۋلين, حرومتاۋ اۋداندىق «قازاق ءتىلى» قوعامدىق قورىنىڭ ءتورايىمى ماريام جۇماعاليەۆا اكتسيانىڭ ءمان-ماڭىزى تۋرالى جۇرتشىلىققا كەڭىنەن اڭگىمەلەپ بەردى. ودان كەيىن «نۇر وتان» پارتياسى ءتوراعاسىنىڭ ءبىرىنشى ورىنباسارى ن.نىعماتۋلين اۋداندىق مادەنيەت ۇيىندە قابىلداۋ جۇرگىزدى. بۇل جەردە دە ءارتۇرلى ماسەلەلەر كوتەرىلدى. مىسالى, مادەنيەت ءۇيىنىڭ جانىنداعى حالىق تەاترىنىڭ رەجيسسەرى اقتىلەپ مالعارين ءىرى ونەركاسىپ ءوندىرىستەرى كوپتەپ شوعىرلانعان قالادا تاعى ءبىر مادەنيەت وشاعى قاجەتتىگىن ايتقان. راس, مادەنيەت ءۇيى بار كورىنەدى, بىراق ول 40 000 تۇرعىنى بار اۋدان ءۇشىن جەتكىلىكسىز دەدى ول. ونىڭ قويعان ماسەلەسى شەشىلەتىن بولدى. ەندى 2013 جىلى مادەنيەت ءۇيىنىڭ ىرگەسى قالانباق.
قوعامدىق قابىلداۋعا كەلگەن اقتوبە مىس كومپانياسىنىڭ لابورانتى اينا وتەشوۆا «نۇرلى كوش» باعدارلاماسىنا سوڭعى 10 جىلدا ءوز تاريحي وتانىنا قايتىپ كەلگەن ورالمانداردى قوسۋدى سۇرادى. ول قازىر باعدارلاماعا 2009 جىلدان كەيىن كەلگەندەر عانا كىرەتىنىن ايتسا, كاسىپتىك ليتسەي وقىتۋشىسى مارال ءبىرجانوۆ اۋىل-ايماقتاردا كادرلار جەتىسپەۋشىلىگى ماسەلەسىن كوتەردى. وسىعان وراي ول «ديپلوممەن – اۋىلعا!» باعدارلاماسى اياسىندا قامتىلاتىنداردىڭ ىشىنە قازىرگى كەزدە جوعارى سۇرانىسقا يە ينجەنەر, اگرونوم, زووتەحنيك سياقتى مامانداردى قوسۋدى ۇسىندى.
وسىدان كەيىن جىلجىمالى مەديتسينالىق كەشەننىڭ دارىگەرلەرى مەن قارجى سەكتورى, حالىقتى الەۋمەتتىك قورعاۋ جانە ەڭبەكپەن قامتۋ سالاسى ماماندارى تۇرعىندارعا كومەكتەرىن كورسەتىپ, كەڭەستەرىن بەردى. سول كۇنى كەشكە مەرەكەلىك كونتسەرت قويىلدى.
بۇگىن اقپاراتتىق-ناسيحات پويىزى ءارى قاراي باعىت الدى.
كەلەسى ايالداما – قاندىاعاش قالاسى. ودان كەيىن شاراعا قاتىسۋشىلار قۇلسارى, بەينەۋ, قازاقستان, ارال, جاڭاقورعان, ارىس-2, جاڭاتاس, وتار, ۇشتوبە ەلدى-مەكەندەرىندە بولىپ, 27 قىركۇيەك كۇنى استاناعا قايتىپ ورالماق.
داستان كەنجالين.
استانا – اتباسار – حرومتاۋ.