كەشە مەملەكەتتىك حاتشى قانات ساۋداباەۆ پەن استانا قالاسىنىڭ اكىمى يمانعالي تاسماعامبەتوۆ ەل تاۋەلسىزدىگىنىڭ 20 جىلدىعىنا وراي 8-9 قىركۇيەك كۇندەرى ەلوردامىزدا وتكەن اتىراۋ, جامبىل جانە شىعىس قازاقستان وبلىستارىنىڭ اۋىل شارۋاشىلىعى تاۋارلارى جارمەڭكەسىن ارالاپ كوردى.
مەملەكەتتىك حاتشى الدىمەن استانا قالاسىنداعى «حان شاتىر» ساۋدا-ويىن-ساۋىق ورتالىعى جانىنداعى الاڭدا «كونە تاراز جارمەڭكەسى» دەگەن اتپەن ءوتىپ جاتقان جامبىل وبلىسىنىڭ ءجارمەڭكەسىنە اتباسىن تىرەدى. وبلىس اكىمى قانات بوزىمباەۆ مەملەكەتتىك حاتشى مەن استانا قالاسىنىڭ اكىمىنە ءوڭىردىڭ الەۋمەتتىك-ەكونوميكالىق دامۋ جەتىستىكتەرى تۋرالى بايانداپ, كونە ءاۋليەاتا جەرىنەن جەتكەن ءجارمەڭكەدەگى اۋىل شارۋاشىلىعى ەڭبەككەرلەرىنىڭ ءونىمدەرىمەن تانىستىردى.
ودان كەيىن قانات ساۋداباەۆ پەن يمانعالي تاسماعامبەتوۆ «وتان-انا» مونۋمەنتى الاڭىندا بوي كوتەرگەن اتىراۋ وبلىسىنىڭ جارمەڭكەسىن ارالاپ كوردى. ءوڭىر باسشىسى بەرگەي رىسقاليەۆ ولاردى ءوڭىردىڭ ماكروەكونوميكالىق كورسەتكىشتەرىمەن تانىستىرىپ, اتىراۋ وبلىسىنىڭ تاۋەلسىزدىكتىڭ 20 جىلىندا جەتكەن الەۋمەتتىك-ەكونوميكالىق جەتىستىكتەرى تۋرالى قىسقاشا ايتىپ بەردى.
استانا قالاسى اكىمدىگى الدىنداعى ورتالىق الاڭدا قونىس تەپكەن شىعىس قازاقستان وبلىسىنىڭ جارمەڭكەسى مەن وڭىردە شىعارىلىپ جاتقان اۆتوموبيل كولىكتەرىنىڭ كورمەسىن ارالاپ شىققان مەملەكەتتىك حاتشى ءتاۋەلسىزدىكتىڭ 20 جىلدىعىنا ورايلاستىرىلعان وبلىس كۇندەرى اياسىندا ۇيىمداستىرىلعان شىعىس ءوڭىرىنىڭ جارمەڭكەسىنە جوعارى باعا بەردى. وبلىس اكىمى بەردىبەك ساپارباەۆ مەملەكەتتىك حاتشى مەن استانا قالاسىنىڭ اكىمىنە ءوڭىر جەتىستىكتەرى كورمەسىنە قويىلعان تەحنيكالار مەن ءجارمەڭكە ءسورەلەرىندە سىڭسىعان اۋىل شارۋاشىلىعى ءوندىرىسى تاۋارلارىن پاش ەتە كەلىپ, ەلىمىزدىڭ ءىرى ءوندىرىستىك ايماعىنىڭ 20 جىل ىشىندە جەتكەن جەتىستىكتەرى تۋرالى جان-جاقتى بايانداپ بەردى.
مەملەكەتتىك حاتشى قانات ساۋداباەۆ استانا قالاسىندا ءوتكىزىلگەن وڭىرلەردىڭ بۇل ءجارمەڭكەسىنىڭ الەۋمەتتىك ماڭىزدىلىعىن اتاپ كورسەتتى.
جىلقىباي جاعىپار ۇلى.