2016 جىلى قازاقستاندا اشىلعان جاڭا كاسىپورىندار سانى 4,5 مىڭعا كوبەيسە, 2017 جىلدىڭ قاڭتارىندا بۇل كورسەتكىش تاعى 2 مىڭعا ارتتى.
2015-2016 جىلداردا جۇمىس ىستەپ تۇرعان كاسىپورىنداردىڭ جۇمىستارىن توقتاتىپ تاستاۋىنا ءماجبۇر بولعانىنا قاراماستان, وتكەن جىلى جاڭادان اشىلعان كاسىپورىندار سانى كۇرت كوبەيدى.
سونىمەن قاتار, ەلدەگى ەكونوميكانىڭ باسەڭدەۋى دە باستاۋىش كاسىپكەرلەرگە كەدەرگى بولماي تۇر. 2016 جىلى جاڭادان اشىلعان بيزنەس سانى 4,5 مىڭعا كوبەيگەن (16 پايىز). بۇل 2013 جىلدان بەرگى ەڭ ءىرى ءوسىم رەتىندە تىركەلدى. ول كەزدە رەسپۋبليكا بويىنشا ءبىر جىلدا 5,8 مىڭ جاڭا كاسىپورىن اشىلعان.
ال 2017 جىلدىڭ ءبىر عانا قاڭتارىندا بيزنەسكە جاڭادان 2,1 مىڭ كاسىپورىن كەلىپ قوسىلعان.
جالپى, ەلدەگى بيزنەس قازىر "جاڭارىپ" جاتىر. قازىرگى تاڭدا جاڭادان اشىلعان كاسىپورىندار سانى جالپى كاسىپورىندار سانىنىڭ 14 پايىزىن قۇرايدى. ال بەس جىل بۇرىن بۇل كورسەتكىش 9,2 پايىز بولعان ەدى.
ال بيزنەستىڭ جابىلۋىنا كەلەر بولساق, 2015 جىلدىڭ قورىتىندىسى بويىنشا, ءوز جۇمىستارىن توقتاتۋعا ءماجبۇر بولعان كاسىپورىندار سانى 14 مىڭعا جەتكەن. بۇل نارىقتاعى كاسىپورىن سانىنىڭ 23 پايىزى. ەستەرىڭىزگە سالا كەتەيىك, 2015 جىلعى تەڭگەنىڭ ەركىن اينالىمعا جىبەرىلۋىنەن كوپتەگەن بيزنەس نارىقتان شىعىپ كەتۋگە ءماجبۇر بولعان ەدى.
2016 جىلى جۇمىستارىن توقتاتقان كاسىپورىندار سانى 2,3 مىڭدى قۇرادى. بۇل جالپى كورسەتكىشتىڭ 3 پايىزى.
جالپى, 2016 جىلى ستارتاپتىڭ كوبەيۋىنە باستى سەبەپ شاعىن بيزنەستىڭ ارتۋى. بۇل سەكتوردا بىلتىر 4,7 مىڭ جاڭا كاسىپورىن اشىلعان.
ال ءىرى كاسىپكەرلىكتەر كەرىسىنشە, ءوسىم كورسەتپەيدى. ورتا كاسىپورىنداردىڭ سانى 86-عا ازايسا, ءىرى بيزنەس 16-عا كەمىگەن.
سالالار بويىنشا ەڭ كوپ ستارتاپ ساۋدا مەن قىزمەت كورسەتۋ سالاسىنا تيەسىلى. 2016 جىلى كوتەرمە جانە بولشەك ساۋداعا جاڭادان 4,5 مىڭ بيزنەس كىرگەن. ال قىزمەت كورسەتۋ سالاسىنداعى ءوسىم 1,3 مىڭدى قۇرايدى.
سونىمەن قاتار بىلتىر اۋىل شارۋاشىلىعى سالاسىندا دا جاڭا كاسىپكەرلەر پايدا بولىپ, ولاردىڭ سانى 1 مىڭعا ارتتى.
ءبىر قىزىعى, جاڭا كاسىپورىنداردىڭ پايدا بولۋ جاعىنان كاسىبي جانە عىلىمي قىزمەت جانە ءبىلىم بەرۋ سالاسى كوشباسشىلار قاتارىندا. ءبىر جىلدا بۇل سالا تيىسىنشە 633 جانە 289 كاسىپورىنمەن تولىققان.
ەستەرىڭىزگە سالا كەتەيىك, قازىرگى تاڭدا قازاقستاندا جاپپاي كاسىپكەرلىككە تارتۋ باعدارلاماسى ءجۇرىپ جاتىر.