الماتى وبلىسىندا پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار مينيسترى اسەت يسەكەشەۆ پەن «قتج» ۇك» اق پرەزيدەنتى اسقار ماميننىڭ قاتىسۋىمەن «قورعاس» حالىقارالىق شەكارالىق كەدەن بەكەتى ورتالىعىن دامىتۋ مەن جەتىگەن-قورعاس تەمىر جول جەلىسىنىڭ قۇرىلىس بارىسى تۋرالى كوشپەلى شتاب وتىرىسى ءوتتى.
شتاب وتىرىسىنا توتەنشە جاعدايلار مينيسترلىگى, كەدەن كوميتەتى, شەكارا قىزمەتى, يندۋستريا جانە جاڭا تەحنولوگيالار مينيسترلىگى, كولىك جانە كوممۋنيكاتسيا مينيسترلىگى, «قتج» ۇك» اق جانە الماتى وبلىستىق اكىمدىگىنىڭ وكىلدەرى قاتىستى.
«قورعاس» شەكارالىق كەدەن بەكەتى – قازاقستان مەن قحر اراسىنداعى ۋاعدالاستىققا ساي جاسالعان ءىرى جوبا. بۇل ەكى ەل اراسىنداعى ترانزيتتىك الەۋەتتى دامىتۋعا ارنالعان باتىس ەۋروپا – باتىس قىتاي كولىك ءدالىزى جوباسىن جۇزەگە اسىرۋدىڭ ءبىر پاراسى ىسپەتتى. «قورعاس» حكبو ەلىمىزدەگى كولىكتىك-لوگيستيكالىق دامىتۋ جۇيەسىنىڭ ماڭىزدى ءبىر بولىگى بولىپ سانالادى. مەملەكەت باسشىسىنىڭ 2016 جىلعا دەيىن قازاقستاندى ورتالىق ازيا ايماعىنىڭ ساۋدا, لوگيستيكالىق جانە ىسكەرلىك حالىقارالىق بايلانىستىڭ كوپ سالالى ورتالىعىن جاساۋ جونىندەگى تاپسىرماسىنا وراي ۇكىمەت شەشىمىمەن «قازاقستان تەمىر جولى» ۇلتتىق كومپانياسىنىڭ باسقارۋىنا سەنىپ تاپسىرىلسا, قازاقستان مەن قىتاي اراسىنداعى ساۋدا-ەكونوميكالىق ارىپتەستىكتىڭ ماڭىزدى بولىگى «سامۇرىق-قازىنا» ءال-اۋقات قورى جۇيەسىنە كىرەدى. وسىعان وراي كومپانيا سەنىمدى باسقارۋعا عانا يە بولىپ قويماي, ورتالىقتىڭ كەشەندى تۇردە دامۋىنا ىقپال ەتەدى. قازاقستان تەمىر جولى ءوز تاراپىنان مەملەكەتتىك ىقپالداسقان كولىكتىك-لوگيستيكالىق وپەراتور رەتىندە جەتىگەن-قورعاس تەمىر جول جەلىسىنىڭ قۇرىلىسىندا ەكىنشى شەكارالىق بەكەتتى جانە التىنكول ستانساسىنىڭ جوباسىن جۇزەگە اسىرادى. بولاشاقتا ۇكىمەت «قورعاس-شىعىس قاقپاسى» ارنايى ەكونوميكالىق ايماعى جوباسىندا ساۋدا, كولىكتىك-لوگيستيكالىق, يندۋستريالىق جانە ىسكەرلىك الاڭىن جۇزەگە اسىرماق. «باتىس ەۋروپا-باتىس قىتاي» كولىك جولى, «جەتىگەن-قورعاس» تەمىر جولى سەكىلدى جوبالار قىتايمەن ەكى ارادا ەكونوميكالىق, مادەني, تۋريستىك قارىم-قاتىناس كوكجيەگىن كەڭەيتە تۇسپەك. وعان قوسا جەكە ينۆەستيتسيالار تارتۋعا, ەكسپورتتى دامىتۋعا, تۇرعىنداردىڭ الەۋمەتتىك-تۇرمىستىق جاعدايلارىن كوتەرۋگە, جاڭا جۇمىس ورىندارىنىڭ اشىلۋىنا ىقپال ەتەدى.
قانات ەسكەندىر.