قوستاناي وبلىسىندا مەديتسينالىق قالدىقتاردى وتقا جاعاتىن قوندىرعىنىڭ ورنىن ەندى اۆتوكلاۆ الماستىرادى. ول قورشاعان ورتانىڭ ورگانيكالىق زياندى قالدىقتارمەن لاستانۋىن ازايتۋ باعىتىنداعى بۇۇ دامۋ باعدارلاماسى, الەمدىك ەكولوگيالىق قور جانە قر ەنەرگەتيكا مينيسترلىگىنىڭ بىرلەسكەن پروون جوباسى شەڭبەرىندە جۇرگىزىلگەن جۇمىستار ناتيجەسىندە مۇمكىن بولدى. مەديتسينالىق قالدىقتاردى قىسىمنىڭ كۇشىمەن زالاسىزداندىراتىن اۆتوكلاۆتىڭ قورشاعان ورتاعا ەشقانداي زيانى جوق, ويتكەنى وڭدەۋ كەزىندە مەديتسينالىق قالدىقتار بۇرىنعىداي ۋلى زاتتار بولمەيدى.
«قازاقستاندا مەديتسينالىق قالدىقتاردى قاۋىپسىز ەتۋ جۇيەسىن قالىپتاستىرۋ قالدىقتاردى ازايتۋ, ولاردى وڭدەپ, ەكىنشى رەت پايدالانۋ ماقساتىندا قولعا الىندى. جاڭا تەحنولوگيالاردى پايدالانۋ ەلدە ءوندىرىستىڭ وسۋىمەن بىرگە قورشاعان ورتانى تازا ۇستاپ, ادامدار دەنساۋلىعىن ساقتاي وتىرىپ, دامۋدى قامتاماسىز ەتەدى», دەدى پروون-نىڭ قازاقستان رەسپۋليكاسىنداعى تۇراقتى ءتورايىمى مۋنحتۋي التانگەرەل.
قازىر بارلىق مەديتسينالىق قالدىقتاردىڭ 90 پايىزى پەشكە جاعۋ ارقىلى جويىلىپ وتىرىلادى. ال قالدىقتار جانعان كەزدە ودان وتە ۋلى ديوكسين بولىنەدى. ديوكسين ادامداردىڭ ەندوكريندىك, جۇيكە, يممۋندىق جۇيەسىن السىرەتىپ, قاۋىپتى اۋرۋلار تۋدىرادى.
جوبا وكىلدەرىنىڭ ايتۋىنا قاراعاندا, اۆتوكلاۆ قوندىرعىسى ازىرگە شىعىس قازاقستان, قوستاناي وبلىستارى مەن استانا قالاسىندا ورناتىلادى. «ءبىز اۆتوكلاۆ قوندىرعىسىن قولايلى عيماراتقا ورناتتىق. جوبامەن بىرلەسكەن جۇمىسىمىز ءوزىنىڭ جەمىسىن بەرەتىن بولادى. بۇل وبلىس وڭىرىندە ەكولوگيالىق تازالىقتىڭ ساقتالۋىنا باتىل قادامنىڭ ءبىرى بولدى», دەدى قوستاناي وبلىسى اكىمىنىڭ ورىنباسارى سەرگەي كارپليۋك.
قوستاناي وبلىسىندا جىل سايىن 300-400 توننا مەديتسينالىق قالدىق ورتەلەدى. ولاردىڭ ءبىر كيلوگرامىن جاعۋعا 200 تەڭگە شىعىن كەتەدى. اڭگىمە شىعىننان بۇرىن زيانىندا بولسا كەرەك. وبلىستا الداعى ۋاقىتتا 4 اۆتوكلاۆ جۇمىس ىستەيتىن بولادى. ولار مۇمكىندىگىنشە وبلىس وڭىرىندەگى اۋرۋحانالاردان شىققان مەديتسينالىق قالدىقتاردى زالاسىزداندىرادى.
قر ەنەرگەتيكا مينيسترلىگى قالدىقتاردى باسقارۋ دەپارتامەنتىنىڭ ديرەكتورى جان نۇربەكوۆ مەديتسينادىق قالدىقتاردى زالاسىزداندىراتىن مۇنداي ۇزدىك قوندىرعىلار الداعى ۋاقىتتا وبلىستاردىڭ بارلىعىندا بولۋى كەرەكتىگىن ايتتى.
ءنازيرا جارىمبەتوۆا, «ەگەمەن قازاقستان»