پاۆلوداردىڭ "ەرتىسى" جاڭا ماۋسىمنىڭ العاشقى تۋرلارىن ءتاۋىر ناتيجەلەرمەن باستادى. ۇجىم ءبىرىنشى تۋردا ورالدىڭ "اقجايىق" كومانداسىن 2:1 ەسەبىمەن ۇتسا, كەلەسى ويىندا ازۋلى "استانامەن" تەڭ وينادى. العاشقى ماتچتان كەيىن پاۆلودار فۋتبول فەدەراتسياسىنىڭ پرەزيدەنتى راسۋل ورازعۇلوۆپەن سۇحباتتاسقان ەدىك. اڭگىمە الەمدەگى ءبىرىنشى ءنومىرلى سپورتتىڭ ايماقتاعى دامۋى جايلى ءوربىدى.
– جەڭىس قۇتتى بولسىن, راسۋل قابدوللا ۇلى! بيىلعى فۋتبول ماۋسىمى «ەرتىس» ءۇشىن ەرەكشە. كلۋب بىرنەشە جىلدىق ۇزىلىستەن سوڭ, ەۋروپا ليگاسىندا ويناۋ مۇمكىندىگىنە يە بولدى. وسى ورايدا, كوماندانىڭ جاڭا ماۋسىمعا دايىندىعى قالاي؟
– راحمەت. ازىرلىك ويداعىداي ءوتتى. كلۋب تۇركيادا ءۇش وقۋ-جاتتىعۋ جيىنىندا بولىپ قايتتى. 11 جولداستىق كەزدەسۋگە قاتىستى. ترانسفەرلىك باعىتتاعى جۇمىستارعا دا كوڭىل تولادى. باپكەرلەر جاقسى كوماندا جاساقتادى. بىلتىرعى ماۋسىمنان كوماندادا داۆيد لوريا, قازبەك گەتەريەۆ, پيرالى اليەۆ, رۋسلان ەسىموۆ, كارلوس فونسەكا جانە سەرىكبول قاپانوۆ قالعان ەدى. بيىل ۇجىمدى قازاقستاننىڭ ۇلتتىق جانە جاستار قۇرامالارىندا ونەر كورسەتكەن تاجىريبەلى فۋتبولشىلار تولىقتىردى. اتاپ ايتقاندا, قازاق فۋتبولىندا وزىندىك ورنى بار الەكساندر كيسليتسىن مەن يليا ۆوروتنيكوۆ «ەرتىستىڭ» جەيدەسىن كيدى. جارتىلاي قورعاۋشىلار اسلان داراباەۆ پەن يليا كالينين كلۋبپەن كەلىسىمشارتقا وتىردى.
پاۆلودارلىق كلۋبتىڭ ساپىندا سەرج باندو, فرانك دجا دجەدجە, ستەفان جيۆكوۆيچ, رودريگو انتونيو, ەۆگەني تكاچۋك ءجانە يسماەل فوفانا سىندى لەگيونەرلەر ونەر كورسەتەدى. جەرگىلىكتى جاس فۋتبولشىلاردى دا ۇمىتقان جوقپىز. ۆالەري لەنكوۆ, ارمان سمايلوۆ جانە ماديار رامازانوۆ سىندى جەرگىلىكتى فۋتبول مەكتەبىنىڭ تۇلەكتەرى «ەرتىستىڭ» نەگىزگى قۇرامىنا الىندى. جىگىتتەر جەرگە قاراتپاۋى ءتيىس.
– «ەرتىستىڭ» الدىنا قويىلعان ناقتى مەجە قانداي؟
– بىلتىر بىرىنشىلىكتى ءۇشىنشى ورىنمەن تۇيىندەدىك. بيىلعى مەجە – سول دەڭگەيدەن تومەن تۇسپەۋ. سونداي-اق, ۋەفا ەۋروپا ليگاسىنىڭ ءبىرىنشى كەزەڭىن باعىندىرۋ. قالعانىن بارا كورەرمىز.
– ءوڭىر فۋتبولىنىڭ دامۋى تۋرالى نە ايتاسىز؟ بالالار, جاسوسپىرىمدەر فۋتبولىنا قانشالىقتى كوڭىل بولىنگەن؟
– وبلىستا بارلىعى 628 فۋتبول سەكتسياسى جۇمىس ىستەيدى. 232 شاعىن فۋتبول جانە 1 جاعاجاي فۋتبولى سەكتسياسى بار. ايماقتاعى فۋتبولمەن شۇعىلدانۋشىلاردىڭ جالپى سانى – 19 061 ادام. ولارمەن 417 جاتتىقتىرۋشى جۇمىس ىستەيدى.
ماتەريالدىق-تەحنيكالىق بازا دا جىل سايىن جەتىلدىرىلۋدە. وڭىردە 1 جابىق مانەج جانە 15 ستاديون بار. سونداي-اق, جاساندى كوگال توسەلگەن 106 شاعىن فۋتبول الاڭى ەل يگىلىگىنە قىزمەت ەتۋدە. وبلىس ورتالىعىندا فۋتبول بويىنشا مامانداندىرىلعان بالالار مەن جاسوسپىرىمدەر سپورت مەكتەبى جىل سايىن تالانتتاردى ۇلكەن سپورتقا قوسۋدا. بۇگىندە مۇندا 800-گە جۋىق وقۋشى ءتالىم الادى. سونداي-اق, پاۆلودار قالاسىندا 2012 جىلعى مامىردان «ەرتىس» فۋتبول ورتالىعى جۇمىسىن باستادى. وندا 6-17 جاس ارالىعىنداعى 365 بالا تاربيەلەنۋدە.
وڭىردە جىل سايىن ءتۇرلى تۋرنيرلەر ۇيىمداستىرىلادى. مىسالى, مەكتەپ وقۋشىلارى اراسىندا «بىلعارى دوپ» دوداسى, ب.كۋلاەۆتى, ا.سۆياتوۆتى, ي.ۆاگنەردى ەسكە تۇسىرۋگە ارنالعان ءداستۇرلى تۋرنيرلەر جىل سايىن جۇزدەگەن فۋتبولشىنىڭ باسىن قوسادى. فۋتبول اۋەسقويلارى اراسىنداعى وبلىس چەمپيوناتى دا تارتىستى ورىلەدى.
فۋتبول ينفراقۇرىلىمىن دامىتۋعا كوڭىل بولىنگەن. بىلتىر 38 شاعىن فۋتبول الاڭى ورناتىلدى. بيىل وبلىسقا قاراستى ءۇش قالا مەن باياناۋىل جانە تەرەڭكول اۋىلدارىندا تولىق ولشەمدى فۋتبول الاڭدارى پايدالانۋعا بەرىلمەك.
– بيىل پاۆلوداردىڭ ورتالىق ستاديونى سەنىمدى باسقارۋعا بەرىلدى. بۇل قادام ءوزىن ءوزى قانشالىقتى اقتايدى؟
– ەندى ورتالىق ستاديوننىڭ 2022 جىلعا دەيىن دامۋى «ەرتىس» فۋتبول كلۋبىنا بايلانىستى. سەبەبى, ستاديون تولىقتاي كلۋبتىڭ قاراجاتى ەسەبىنەن قامتاماسىز ەتىلمەك. نىساندى سەنىمدى باسقارۋعا بەرۋ ارقىلى مەملەكەت بيىل 37 ملن تەڭگە ۇنەمدەيدى. ۇنەمدەلگەن قارجى قالانىڭ وزگە قاجەتتىلىكتەرىنە باعىتتالماق. «ەرتىس» فۋتبول كلۋبى شارتتارعا سايكەس, بالالار-جاسوسپىرىمدەر سپورت مەكتەبىنىڭ وقۋشىلارىنا, سپورتتىڭ ءى, ءىى توپتاعى مۇگەدەكتەرىنە جانە مۇمكىندىگى شەكتەۋلى بالالارعا فۋتبول الاڭىن تەگىن ۇسىناتىن بولادى.
اڭگىمەلەسكەن
فارحات امىرەنوۆ,
جۋرناليست
پاۆلودار