وبلىسقا ەكى كۇندىك جۇمىس ساپارىمەن كەلگەن ەۋرووداق وكىلدىگىنىڭ باسشىسى نوربەر جۋستەن باستاعان ەۋرووداققا مۇشە ەلدەر وكىلدەرى ەۋرووداقتىڭ «ادام قۇقىقتارى تۋرالى اقپاراتتاردى قازاق تىلىندە تاراتۋ بويىنشا ازاماتتىق قوعام مۇمكىندىكتەرىن دامىتۋ» جوباسى اياسىندا «ادام قۇقىقتارى ءۇشىن حارتيا» قوعامدىق قورىنىڭ ۇيىمداستىرۋىمەن وتكىزىلگەن سەمينار-ترەنينگكە قاتىستى.
باسقوسۋعا اۆستريانىڭ, فينليانديانىڭ, فرانتسيانىڭ, لاتۆيانىڭ, ليتۆانىڭ, سلوۆاكيانىڭ, بولگاريانىڭ, پولشانىڭ, رۋمىنيانىڭ جانە ششۆەتسيانىڭ قازاقستانداعى ەلشىلەرى مەن ۋاقىتشا سەنىمدى وكىلدەرى كەلدى. ۇستىمىزدەگى جىلى باستالعان بۇل جوبانىڭ ماقساتى تۇرعىندارعا وزدەرىنىڭ قازاقستان كونستيتۋتسياسىمەن بەكىتىلگەن, سونداي-اق, حالىقارالىق پاكتىلەرمەن راتيفيتسيالانعان نەگىزگى ادامي قۇقىقتارىن قازاق تىلىندە وقىتۋ جولىمەن تانىسۋ بولىپ تابىلادى. وبلىستا ادام قۇقىقتارىن قورعاۋ باعىتىندا ءبىراز جۇمىستار تىندىرىلۋدا. بۇل باعىتتا 100-دەن استام ۇكىمەتتىك ەمەس ۇيىمداردىڭ باسىم بولىگى قايتارىمدى جۇمىس ىستەپ كەلەدى. «دوستىق» ۇيىندەگى 18 ەتنومادەني بىرلەستىك جانە باسقا قوعامدىق ۇيىمدار ادام قۇقىقتارىن قورعاۋعا اتسالىسۋدا. وبلىستا وسىنداي جۇيەلى جۇمىستار جۇرگىزىلۋىنىڭ ءناتيجەسىندە ءسابي ءولىمى 16 پايىزعا كەمىگەن. تۇرعىنداردىڭ قۇقىقتىق ساۋاتتىلىعىن ارتتىرۋ باعىتىندا كوپ شارۋالار اتقارىلعان. ادام قۇقىقتارىنىڭ ساقتالۋىنا بايلانىستى وسى جانە باسقا ءماسەلەلەر جايلى جينالعانداردى وبلىس اكىمىنىڭ ورىنباسارى سارا نۇرقاتوۆا ءوزىنىڭ كىرىسپە سوزىندە حاباردار ەتتى.
سەمينار-ترەنينگتە ەۋرووداق وكىلدىگىنىڭ باسشىسى نوربەر جۋستەن ءسوز الىپ, 27 ەلدى بىرىكتىرەتىن ەۋرووداقتىڭ ادام قۇقىعىن قوعامنان بولە قاراۋعا كەلمەيتىن امبەباپ ماسەلە رەتىندە قاراستىراتىنىن جەتكىزدى. ول ەۋرووداقتىڭ ساياساتىنا ازاماتتىق, ەكونوميكالىق, الەۋمەتتىك, مادەني قۇقىقتاردى قورعاۋ كىرەتىنىن اتاپ ءوتتى. سونداي-اق, ايەلدەر مەن بالالار, جەر اۋدارىلعاندار قۇقىقتارىن قورعاۋ دا جاتاتىنىن ءمالىم ەتتى. وسى جوباعا 156 مىڭ ەۋرو بولىنگەنىن ايتتى. مۇنداي سەمينار-ترەنينگتەردىڭ الماتى, شىمكەنت, تاراز, تالدىقورعان, اتىراۋ قالالارىندا وتكەنىن تىلگە تيەك ەتە كەلىپ, الدا اقتاۋ مەن قىزىلوردادا ۇيىمداستىرىلاتىنىنا توقتالدى. قازاقستان ءبىلىم جانە عىلىم مينيسترلىگى بالالاردى قورعاۋ كوميتەتىنىڭ ءتورايىمى رايسا شەر ادام قۇقىعىن, سونىڭ ىشىندە بالالاردىڭ قۇقىقتارىن قورعاۋعا بايلانىستى «ادام قۇقىعى ءۇشىن حارتياسى» قوعامدىق قورىنىڭ جۇمىسىنا قولداۋ كورسەتىپ وتىرعان ەۋرووداقتىڭ باستاماسىنا ريزاشىلىعىن ءبىلدىردى. ادام قۇقىعىن, سونىڭ ىشىندە بالالاردىڭ زاڭدى مۇددەسىن قورعاۋ مەملەكەتتىك ساياساتتا باسىمدىققا يە بولىپ وتىرعانىن جەتكىزدى. ەلىمىزدە بۇل باعىتتا ادامداردىڭ تۇرمىسىن جاقسارتۋ ماقساتىندا ازاماتتىق قوعامنىڭ, ۇكىمەتتىك ەمەس جانە حالىقارالىق ۇيىمداردىڭ ءتيىمدى جۇيەسىن قۇرۋدىڭ ماڭىزدىلىعىن اتاپ كورسەتتى. ول ادام قۇقىقتارىن قورعاۋدىڭ 2009-2011 جىلدارعا ارنالعان ۇلتتىق باعدارلاماسى قابىلدانعانىن دا بۇل باعىتتاعى جەتىستىك رەتىندە باعالادى. سەمينار-ترەنينگتە سويلەگەندەر ادام قۇقىقتارىن, سونىڭ ىشىندە بالالاردىڭ قۇقىقتارىن قورعاۋعا بايلانىستى وي ءبولىستى, بۇل باعىتتا اتقارىلىپ جاتقان جۇمىستاردى سارالاي كەلە, الدا اتقارىلۋى ءتيىس شارۋالاردىڭ باعىتتارىن انىقتادى.
ەۋرووداق وكىلدىگىنىڭ باسشىسى نوربەر جۋستەن باستاعان دەلەگاتسيا ونەركاسىپ ورىندارىندا, ءبىلىم نىساندارىندا, العا بالالار ۇيىندە جانە بەيىمدەلۋ ورتالىعىندا بولدى. ولار سونداي-اق, اقتوبە مەملەكەتتىك پەداگوگيكالىق ينستيتۋتىنىڭ رەكتورى, وبلىستىق ءماسليحاتتىڭ حاتشىسى عالىمجان نۇرىشەۆپەن, وبلىس ورتالىعىنداعى جوعارى وقۋ ورىندارىنىڭ ستۋدەنتتەرىمەن كەزدەستى.
ساتىبالدى ءساۋىرباي,
اقتوبە وبلىسى.