ەلوردادا «استانا» حالىقارالىق قارجى ورتالىعى مەن «REDmoney Group» حالىقارالىق اگەنتتىگى بىرلەسىپ «IFN تمد 2017» فورۋمىن ۇيىمداستىردى. تاۋەلسىز مەملەكەتتەر دوستاستىعى ەلدەرىندەگى يسلامدىق قارجىلاندىرۋدى دامىتۋدى ىنتالاندىرۋ جانە وڭىردەگى ينۆەستيتسيالىق مۇمكىندىكتەردى زەرتتەۋ, سونداي-اق, بايلانىستار مەن ارىپتەستىك قارىم-قاتىناستاردى جەتىلدىرۋ ماقساتىنداعى شارادا اتالعان نارىقتاعى نەگىزگى قاتىسۋشىلار مەن قاداعالاۋشىلار باس قوستى.
سوڭعى بەس جىل كولەمىندە تمد قارجى نارىقتارى ەۋرازيالىق ەكونوميكالىق وداقتىӊ قۇرىلىمدالۋى ءناتيجەسىندە بەلسەندى ينتەگراتسياعا كوشكەنى راس. ينۆەستورلاردىӊ اكتيۆتەرىن ءارتاراپتاندىرۋ جانە جاӊا نارىق ىزدەۋ اياسىندا يسلام بانكينگى مەن قارجىلاندىرۋى 170 ميلليوننان استام حالىق قونىستانعان اۋقىمدى ايماقتا ۇلكەن كۇشكە اينالا الادى. ال قازاقستان 2008 جىلدان بەرى يسلام قارجىلاندىرۋىنىڭ نورماتيۆتىك-قۇقىقتىق بازاسىن قۇرۋ بويىنشا جۇيەلى جۇمىس جۇرگىزىپ كەلەدى. سۋكۋك (وبليگاتسيانىڭ يسلامدىق بالاماسى) شىعارۋ جانە ءداستۇرلى بانكتى يسلامدىق بانككە ايىرباستاۋ نەگىزىندەگى زاӊعا وزگەرىستەر 2015 جىلدىӊ قاراشاسىندا ەنگىزىلدى. ونىڭ ءۇستىنە, 2011 جىلى يسلام ساۋدا ۇيىمىنا ءتوراعالىق جاساعانىمىز بار.
جيىندا «استانا» حالىقارالىق قارجى ورتالىعىنىڭ باسشىسى قايرات كەلىمبەتوۆ يسلام قۇندى قاعازدارىن دامىتۋعا باعىتتالعان زاڭ جوباسى ازىرلەنىپ جاتقانىن مالىمدەدى. «تمد ەلدەرىندەگى يسلامدىق قارجىلاندىرۋدى دامىتۋعا ارنالعان بۇل كونفەرەنتسياعا تەك قازاقستاننان عانا ەمەس, ورتالىق ازيا مەملەكەتتەرىنىڭ, تمد ەلدەرىنىڭ وكىلدەرى قاتىسۋدا. «استانا» حالىقارالىق قارجى ورتالىعى يسلامدىق قارجى جۇيەسىن دامىتاتىن بولادى. كوپشىلىگىمىز بىلەتىندەي, بۇل باعىتتا ەلباسى نۇرسۇلتان نازارباەۆتىڭ ارنايى تاپسىرماسى دا بار. ءبىز جۇمىستى 2009 جىلى باستاپ, قازىرگى ۋاقىتتا ءبىرشاما جاقسى ناتيجەگە قول جەتكىزدىك. ساراپشىلاردىڭ پايىمىنشا, قازاقستان يسلامدىق قارجىلاندىرۋ جوعارى دەڭگەيدە دامىعان ەلدەردىڭ قاتارىنا قوسىلدى. جۇيەنى ودان ءارى دامىتۋعا باعىتتالعان ارنايى جوسپارىمىز دا بار», دەدى بايانداماشى. ونىڭ ايتۋىنشا, يسلامدىق قارجىلاندىرۋ نارىعى بارىنشا ۇلكەن, شامامەن 2 ترلن دوللاردى قۇرايدى. قازىرگى ۋاقىتتا كوپتەگەن ەلدەر وسى نارىقتى دامىتۋعا باسا نازار اۋدارىپ وتىر. «بۇعان دەيىنگى 30 جىل بويى يسلامدىق قارجىلاندىرۋ ءداستۇرلى تۇردە تاياۋ شىعىستىڭ يسلام ەلدەرىندە, مالايزيادا دامىعان بولسا, قازىرگى ۋاقىتتا يسلامدىق قارجىلاندىرۋ مۇمكىنشىلىكتەرىنە كوپتەگەن ەلدەر جۇگىنە باستادى. ۇلىبريتانيا, ليۋكسەمبۋرگ, جاپونيا, گونكونگ سياقتى ەلدەردە يسلامدىق قارجىلاندىرۋ قارقىندى دامىعان. سوندىقتان قازاقستان دا وسى باعىتتى دامىتۋ مۇمكىندىكتەرىن قاراستىرۋ ۇستىندە», دەدى ورتالىق باسشىسى.
فورۋمنىڭ «تمد-دا يسلامدىق قارجىنى دامىتۋ جولىنداعى كەدەرگىلەردى جەڭۋ» اتتى سەسسياسىندا پىكىرتالاسقا قاتىسۋشىلار ءوز قىزمەتى بارىسىندا قانداي قيىندىقتارعا كەزدەسكەنىن ايتىپ بەردى جانە وڭىردەگى يسلامدىق قارجىلاندىرۋ يندۋسترياسىنىڭ وسۋىنە باعىتتالعان ءوز ۇسىنىستارىن جەتكىزدى. «يسلامدىق قارجىلاندىرۋ قاعيداتتارىنا سايكەس كاپيتال تارتۋ ارقىلى وڭىرلىك دامۋعا جاردەمدەسۋ» سەسسياسىندا يسلامدىق قارجى مۇناي جانە گاز, ەنەرگەتيكا, اۋىل شارۋاشىلىعى جانە حالال يندۋسترياسى سالالارىنداعى وڭىرلىك رەسۋرستاردىڭ دامۋىنا قالاي ىقپال ەتەتىنى تۋرالى, سونداي-اق, تمد ەلدەرىنىڭ شوب وكىلدەرى يسلامدىق قارجىنى تارتۋدان قانداي پايدا تاباتىنى جايىندا ءسوز قوزعادى.
شارا بارىسىندا وڭىرلىك قارجى رەتتەۋشىلەردىڭ كەزدەسۋى ءوتتى. وندا قۇقىقتىق جانە نورماتيۆتىك بازانى دامىتۋ ماسەلەسى قارالدى. ساراپشىلار يسلامدىق قارجى سالاسىنداعى قىزمەتتىڭ ءوسۋىن ىنتالاندىرۋ ءۇشىن قوسىمشا شارالار رەتىندە قابىلدانۋى مۇمكىن وزگەرىستەرگە قاتىستى پىكىرلەرىمەن ءبولىستى.
اسحات رايقۇل,
«ەگەمەن قازاقستان»
سۋرەتتى تۇسىرگەن
ەرلان وماروۆ,
«ەگەمەن قازاقستان»