وبلىس اكىمى باقىتجان ساعىنتاەۆتىڭ باستاماسىمەن اشىلعان «زامانداستار» ارداگەرلەر كلۋبىنىڭ جاستارعا تاربيەلىك-ونەگەلىلىك ماقساتتا اتقارىپ جاتقان جۇمىستارى اۋدان ورتالىقتارىندا تۇراتىن اقساقالداردىڭ دا ويىنان شىققانداي. جۋىردا اۋدان ورتالىعى اقتوعايدا دا سوعىس جانە ەڭبەك ارداگەرلەرى كلۋبى زامانداستارىن جينادى. اۋدان اكىمى جۇماكەلدى قوجانوۆ ۇلكەندەر باس قوساتىن بۇل ورتالىقتىڭ اشىلۋىنا اۋدان كاسىپكەرلەرى «ءجاردەم» سەرىكتەستىگىنىڭ باسشىسى سەرىك احمەتوۆ, وبلىستىق ءماسليحات دەپۋتاتى يگور گولوۆاشوۆ, اۋداندىق ءماسليحات دەپۋتاتى الەكساندر تارامبالار ءوز ۇلەستەرىن قوسقانىن اتاپ ءوتتى. سوندىقتان بولار, شەتەلدىك جيھاز, توڭازىتقىش, تەلەديدارى بار ورتالىقتىڭ ءىشى جارقىراپ تۇر. كاسىپكەرلەر بۇل ءبىزدىڭ ەل تاۋەلسىزدىگىنىڭ 20 جىلدىعى قارساڭىندا ارداگەرلەرگە كورسەتكەن سىي-قۇرمەتىمىز دەيدى.
ەندى ارداگەرلەر شاحمات ويناۋعا, تەلەديدار كورۋگە, گازەت-جۋرنالدار وقۋعا, كەڭەسۋگە, جاستار, ءجاسوسپىرىمدەرمەن كەزدەسىپ, اڭگىمە وتكىزۋلەرىنە مۇمكىندىك الادى. وسى ورتالىق اتىنان اقساقالدار القاسى وزدەرىنىڭ ۇسىنىستارى مەن ماسەلەلەرىن تىكەلەي اۋدان اكىمىنە ايتا الادى. اۋداندىق ارداگەرلەر كەڭەسىنىڭ توراعالارى ب.قۋاتوۆ, م. كوروبكين, پ. راەۆسكي, ۆ. زۋەۆ, س. سادۋاقاسوۆا, ت عيبادۋللينالار ارداگەرلەر اتىنان العىستارىن ءبىلدىردى. ءسويتىپ, اقساقالدار القاسىنىڭ ۇسىنىسىمەن كلۋبتىڭ باسشىسى, ەڭبەك ارداگەرى سامەت ماعزۇم ۇلى بولدى. سونىمەن قاتار, سول كۇنى ورتالىقتىڭ قاسىنان اۋداندىق ولكەتانۋ مۇراجايى اشىلىپ, ارداگەرلەر ەندى اۋداننىڭ وتكەن ءومىرى, قالىپتاسۋى ءۇشىن قىزمەت ەتكەن ادامدار, زامانداستارى تۋرالى دەرەكتەرمەن تولىعا تۇسۋىنە دە ۇلەس قوساتىن بولادى.
فاريدا بىقاي, پاۆلودار وبلىسى.