بيىل اقتوبە وبلىسىنىڭ الەۋمەتتىك سالاسىنا 111,8 ملرد تەڭگە ءبولىندى, دەپ حابارلادى وبلىس اكىمدىگىنىڭ ءباسپاسوز قىزمەتى.
2016 جىلدىڭ قورىتىندىسى بويىنشا ونەركاسىپ ءونىمىنىڭ كولەمى 1 202,7 ملرد. تەڭگەنى قۇرادى. سونىڭ ىشىندە, وبلىستىڭ وندەۋ ونەركاسىبى رەسپۋبليكا بويىنشا ءبىرىنشى ورىنعا شىقتى.
«اۋىلشارۋاشىلىعىنىڭ جالپى ءونىم كولەمى 184,8 ملرد. تەڭگەمەن رەسپۋبليكا بويىنشا 3-ءشى ورىندا. ينۆەستيتسيالار كولەمى 373,7 ملرد. تەڭگە. قۇرىلىس جۇمىستارىنىڭ كولەمى 136,3 ملرد. تەڭگە قۇرادى. قارجىلاندىرۋدىڭ بارلىق كوزدەرىنەن 616,6 مىڭ ش.م تۇرعىن ءۇي پايدالانۋعا بەرىلدى, بۇل 2015 جىلدىڭ دەڭگەيىنە115,0%. ال شوب قىزمەت ەتەتىن سۋبەكتىلەردىڭ سانى 50,8 مىڭ بىرلىكتى قۇراپ, ەل بويىنشا وبلىس 2-ءشى ورىندا», - دەلىنگەن حابارلامادا.
2016 جىلى ءمجا (مەملەكەتتىك جەكە ارىپتەستىك) اياسىندا 7 جوبا بويىنشا كەلىسىم-شارتتار جاسالىندى, 2017 جىلى قوسىمشا ءمجا-ءتىڭ 12 جوباسىن ىسكە اسىرۋ جوسپاردا. الداعى ۋاقىتتا, وبلىستىڭ ءار اۋدانىندا ءمجا-ءتىڭ كەمىندە 2-3 جوباسىن ىسكە اسىرۋ جوسپارلانۋدا..
الەۋمەتتىك سالاعا بيىل 111,8 ملرد. تەڭگە قاراستىرىلعان, ونىڭ ىشىندە ءبىلىم بەرۋگە 67,2 ملرد. تەڭگە, دەنساۋلىق ساقتاۋعا 28,6 ملرد. تەڭگە.
2016 جىلى ۇلتتىق قوردىڭ قاراجاتتارى ەسەبىنەن اقتوبە قالاسىنىڭ «نۇر اقتوبە» اۋدانىندا 1200 ورىندى, زارەچنىي-3 اۋىلدارىندا 600 ورىندى, كىرپىشتى اۋىلىندا 320 ورىندى 3 مەكتەپتىڭ جانە اقتوبە قالاسىنىڭ قارعالى اۋىلىندا جانە باتىس-2 مولتەك اۋدانىندا ارقايسىسى 320 ورىندى 2 بالا باقشانىڭ قۇرىلىسى اياقتالدى.
جەرگىلىكتى بيۋدجەت ەسەبىنەن ارقايسىسى 100 ورىندى قارعالى اۋدانىنىڭ الىمبەت اۋىلىندا, العا اۋدانىنىڭ قاراقۇدىق اۋىلىندا, مارتوك اۋدانىنىڭ اققايىن اۋىلىندا 3 مەكتەپتىڭ قۇرىلىسى اياقتالدى.
«نۇرلى جول» مەملەكەتتىك باعدارلاماسى اياسىندا 2016 جىلى ينۆەستيتسيا كولەمى 18,0 ملرد. تەڭگەگە 65 جوبا جۇزەگە اسىرىلۋدا. ونىڭ 17,9 ملرد. تەڭگەسى نەمەسە 99,2% يگەرىلدى.