قوعامدىق باقىلاۋ – اشىقتىق كەپىلى

پارلامەنت  

«ەگەمەن قازاقستاننىڭ» ارناۋلى بەتى

پارلامەنت سەسسياسىنىڭ اشى­لۋىندا سويلەگەن سوزىندە ەلباسى نۇرسۇلتان نازارباەۆ بەسىنشى سەسسيا بارىسىندا پارلامەنت ال­دىندا تۇرعان زاڭ شىعار­ما­شى­لىق مىندەتتىڭ ءتورت بلوگىن اتاپ كورسەتتى. سولاردىڭ ءبىرى – قۇقىق قورعاۋ ورگاندارىن رەفورمالاۋ جونىندە بىرقاتار ناقتى تالاپتار قويدى. قىلمىستىق اتقارۋ جۇيە­سى, قۇجات رەسىمدەۋ ىشكى ىستەر ور­گاندارى قۇزىرىنان الىنىپ, ادىلەت مينيسترلىگىنە بەرىلگەنى بەلگىلى. وكىنىشكە قاراي, ولار بۇل جۇمىستى دوڭگەلەتىپ الىپ كەتە المادى. وسى رەتتە جاع­دايدى باتىستىق ستاندارتتارعا ساي بەيىمدەۋ وڭاي شارۋا ەمەس ەكەندىگىن ورىندى اتاپ كەتكەن ءجون. كەڭەس­تىك داۋىردەن جىلدار بويى قا­لىپتاسقان داعدىلار بۇعان ءمۇم­كىنشىلىك بەرە دە بەرمەيدى. ءاري­نە, ونىڭ شەشىمى بار, بىراق وعان قوماقتى قارجى قاجەت. سوت جۇيەسىن رەفورمالاۋ ءما­سە­لەسى دە وتكىر كۇيىندە قالىپ وتىر. قازىرگى كەزدە سوت جۇيەسىنە قوعامدىق باقىلاۋ جەتىسپەيدى. ولار ءوز زاڭدارىن قابىلداپ ال­عانىمەن, كوپتەگەن كەمشىلىكتەرگە جول بەرىپ وتىر. جوعارعى سوتتىڭ التى بىردەي سۋدياسىنىڭ ۇستىنەن قوزعالعان قىلمىستىق ءىس وسىنداي كەمشىلىكتەردىڭ سالدارىن كورسەت­سە كەرەك. وتكەن جىلدىڭ وزىندە ءار ءتۇرلى دەڭگەيدەگى 11 سۋديا زاڭ­دى بۇرمالاعانى, پارا العانى جانە وزگە دە قىلمىستارى ءۇشىن جا­زالاندى. مەنىڭ پايىمىمشا, سۋديالىق كادرلاردى ىرىكتەگەن كەزدە جاريالىلىق قاجەت. حالىق تاعايىندالاتىن سۋديالار تۋ­رالى ءوز پىكىرلەرىن ايتسا, سوندا عانا دۇرىس تاڭداۋ جاسالادى. سوت جۇيەسىنىڭ جۇمىسى ازا­ماتتىق قوعامعا اشىق بولعانى ءجون. قاراپ وتىرساق, قۇقىق قورعاۋ ورگاندارىنىڭ ۇيىمداسقان قىل­­مىس­پەن كۇرەسۋگە بارلىق ءمۇم­كىنشىلىكتەرى بار. «قورعاس» كەدەنى تاجىريبەسىنەن قۇقىق قور­عاۋ ور­گان­دارىنىڭ قىلمىسپەن باي­لا­نىسى بولعانىن كورەمىز. وسى ماسەلە ەلباسىنىڭ تىكەلەي باقى­لاۋىندا. وسى جەردە كىمنىڭ كىنا­لى ەكەندىگى اشىق ايتىلىپ, سول ادامدار جازاسىن تارتۋى ءتيىس. ەگەر ولار جازاسىن الماي كەتسە, وندا بۇعان دەيىن قولعا الىنعان شارالاردىڭ بارلىعى دا تۇككە تۇرعىسىز بولىپ قا­لادى. ەلباسى ءوز سوزىندە جەم­قور­لىققا قارسى كۇرەستى كەڭەيتۋ كەرەك دەگەندى اتاپ ايتتى. وسى ورايدا نازار اۋداراتىن نارسە, جەمقورلىقپەن كۇرەستى حالىق­ارا­لىق ستاندارتتارعا سايكەس جۇزەگە اسىرعان ءجون. مەملەكەتتىك قىز­مەتكەر جاۋاپكەرشىلىگىن ارتتىرۋ – ۋاقىت تالابى. ەلباسى ءساۋىر ايىندا بولعان ۇكىمەت جينالى­سىن­دا دا وسىنى اتاپ كورسەتكەن-ءتىن. سودان بەرى التى اي وتسە دە وبلىستاردا, اۋدانداردا جوعارى لاۋازىم يەلەرى پارامەن ۇستالىپ جاتىر. بىراق ءوز ورىنتاعىن تاستاپ كەتكەن ەشبىر باسشىنى كورمەيسىز. ەلباسى قىزمەتىنەن كەت دەمەگەنشە وتىرا بەرۋى ءتيىس پە ەكەن. سوندىقتان دا بۇل نورمانى زاڭعا كىرگىزىپ, ناقتى شارالار قولدانعان ۇتىمدى. ورالباي ابدىكارىموۆ, سەناتور.