قر ءىىم ارنايى قىزمەتى ينتەرنەتتە ءولىم توپتارىنىڭ بار-جوعىن زەرتتەپ جاتىر. بۇل تۋرالى ىشكى ىستەر ءمينيسرى قالمۇحانبەت قاسىموۆ پارلامەنت ءماجىلىسى بارىسىنداعى وتىرىستا ايتتى, دەپ جازادى tengrinews.kz.
"ارينە, ءبىز ينتەرنەتتى تولىقتاي باقىلاپ وتىرمىز, ءولىم ويىندارىن انىقتاپ جاتىرمىز. بۇگىندە 100-دەن اسا دەرەك انىقتالدى جانە ءبىز ولاردى بۇعاتتاۋ ءۇشىن اقپارات جانە كوممۋنيكاتسيالار مينيسترلىگىنە جولدادىق, بىلتىر ءوز-وزىنە قول جۇمساماق بولعاندار جانە ءوز-ءوزىن ءولتىرۋ دەرەكتەرىنە قاتىستى 44 قىلمىستىق ءىس قوزعالعان. سالدارىنان 16 بالا قايتىس بولعان. سول كەزدە جۇرگىزىلگەن تەرگەۋلەر بۇل دەرەكتەردى انىقتاماعان", - دەدى مينيستر.
"قازىرگى تاڭدا قاڭتار جانە اقپان ايلارى بويىنشا كامەلەتكە تولماعاندارعا قاتىستى 63 وقيعا تىركەلگەن. 15 بالا وزدەرىنە قولدان كەلەتىن بارلىق جاراقاتتى جاساعان. بىزگە بالالاردىڭ اتا-انالارىنان, مۇعالىمدەرىنەن, تۋىستارىنان حاتتار كەلىپ جاتىر. بارلىق دەرەك بويىنشا قاجەتتى شارالاردى قولدانىپ جاتىرمىز. باستى پروبلەما - قولدانىلىپ جاتقان رەسۋرستاردىڭ قازاقستاننان تىس جەردە بولۋىندا. مىسالى, "ۆكونتاكتە" الەۋمەتتىك جەلىسى رەسەيدىكى, Facebook پەن Instagram جەلىلەرى اقش-تا. ءبىز ەندى زاڭدى تۇردە قازاقستاندىق قولدانۋشىلارعا قاتىستى بارلىق مالىمەتتىڭ ءبىزدىڭ قولۋىمىزدان بولۋىن مىندەتتەۋىمىز كەرەك نەمەسە ولاردى قازاقستاندىق پروۆايدەرلەر ارقىلى جۇمىس ىستەۋگە مىندەتتەۋىمىز قاجەت. ءاربىر دەرەك پروكۋراتۋراعا جولدانادى, ونىمەن قوسا, ءتۇرلى زاڭنامالار بار, سىزدەر ەندى وسى جۇمىستىڭ وسىلايشا ۇزاق جۇرگىزىلەتىنىن كورىپ وتىرعان شىعارسىزدار", - دەدى قالمۇحانبەت قاسىموۆۇ
سونداي-اق, مينيستر "سيني كيت" جانە "تيحي دوم" دەگەن سۋيتسيدكە شاقىراتىن پابليكتەر مەن پاراقشالار جايلى تولىعىراق ايتىپ بەردى.
"سوڭعى "سيني كيت" جانە "تيحي دوم" پاراقشالارىن تەكسەردىك. تەكسەرىپ جاتىرمىز, رەسەيدىڭ زور تاجىريبەسى بار. ولار بۇل ماسەلەمەن 2013 جىلى اينالىسقان ەدى. بىلتىر رەسەيدە ءولىم توبىن اشىپ, ونى F-57. F - فيلليپ دەپ اتاعان فيليپپ بۋدەيكين دەگەن ادام ۇستالعان, ونىڭ پاراقشاسىنىڭ سوڭعى تسيفرلارى - 57. وعان بىرنەشە ءجاسوسپىرىمنىڭ ولىمىنە قاتىسى بار دەگەن ايىپ تاعىلعان. ارينە, وسىدان كەيىن ونىڭ ء"ىزباسارلارى" جولىن جالعاستىرعان. قازىر "پوزۆوني منە ۆ 4:20", F-58 دەگەن تاعى دا كوپتەپ توپتار پايدا بولعان. ونىڭ ۇستىنە, ولار قازىر مۇنى تەلەفوندارعا قوسىمشالار ارقىلى جىبەرگەن - Whatsapp, Instagram, Facebook. سوندىقتان مۇندا ماسەلەلەر بار. ەرىكتىلەر عانا ەمەس, ءبىز دە باقىلاپ جاتىرمىز, ارنايى قىزمەتتى وتىرعىزىپ, وسى جۇمىستى باقىلاتىپ جاتىرمىز", - دەدى قاسىموۆ.
"ولاردىڭ بالالاردىڭ پسيحيكاسىنا اسەر ەتەتىنى, تارتاتىنى بەلگىلى. وسى 63 وقيعانىڭ 15-ىندە بالالار وزدەرى كوڭىل كوتەرگەن. كەيبىرەۋلەرى پاراقشاسىنىڭ دەڭگەيىن كوتەرگىسى كەلگەن, ال 15 بالا وزىنە جاراقات سالعان", - دەپ ناقتىلادى مينيستر.
سونىمەن قاتار, قاسىموۆ رەسەيلىك ارىپتەستەرىنىڭ قالاي ارەكەت ەتكەنى جايلى ايتتى.
"ارينە, پسيحيكاعا اسەر ەتەدى. وقىپ كورسەڭ, شامامەن 50 كۇن بەرىلەدى ەكەن, ءار كۇنى قاتىسۋشى بەلگىلى ءبىر تاپسىرمالاردى ورىنداۋ كەرەك, ماسەلەن 18-ءشى كۇنى تاڭعى 4:20-دا تۇرىپ, شاتىرعا شىعىپ, ءبىراز تۇرۋ كەرەك. ال 19-شى كۇنى "ەڭ ءىرى كوپىرگە بار". 21-ءى كۇنى "ەڭ بيىك كرانعا شىق". ال 28-ءشى كۇنى كيتپىن دەپ انت بەرۋىڭ كەرەك ەكەن. 39 بەن 49-شى تاپسىرمالاردا تۇنگى 4:20-دا كۇن سايىن ويانىپ, ۇرەيلى فيلمدەر كور دەيدى. 50-ءشى كۇنى ء"وز-وزىڭە قول سال نەمەسە بيىكتىكتەن سەكىر" دەپ تاپسىرما بەرەدى. ءبىز دە نەگە 50 كۇن ەكەنىن سۇرادىق. رەسەيلىكتەردىڭ نۇسقاسى بويىنشا, 2013 جىلى كىتاپ جازىلعان, اۆتورى اناستاسيا حولوۆا. "50 دنەي دو موەگو ساموۋبيستۆا" دەپ اتالادى. بۇل سولاردىڭ كىتابى بولىپ, سونى پايدالانادى. كىتاپتا اۋىر جاعدايدى باسىنان كەشىرەتىن ايەل جايلى ايتىلادى: جاۋاپسىز ماحاببات, اتا-انانىڭ اجىراسۋى, ساتقىندىق - ال بۇل جاعدايدان شىعۋدىڭ جالعىز جولى - ءوزىن-ءوزى ءولتىرۋ. كريمينالدىق پوليتسيا بۇكىل ينتەرنەتتى باقىلايتىن بولادى", - دەدى مينيستر.