نيدەرلاند سىرتقى ىستەر مينيسترلىگىندە وسى ەلدىڭ ەكسپو-2017 حالىقارالىق مامانداندىرىلعان كورمەگە قاتىسۋى قارساڭىندا ارنايى ينتەرنەت-سايتتىڭ رەسمي تۇساۋكەسەر ءراسىمى ءوتتى. بۇل ينتەرنەت-رەسۋرس نيدەرلاندتاعى ساۋدا جانە ينۆەستيتسيالار جونىندەگى ۇلتتىق اگەنتتىكتىڭ ەلەكتروندىق پورتالىنىڭ بازاسى نەگىزىندە دايىندالعان, دەپ حابارلادى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى.
سايتتا ەڭ العاش رەت نيدەرلاندتىڭ ەكسپو-2017 كورمەسىنە ارنالعان لوگوتيپى مەن «Low Land, High Energy» دەگەن جازۋى بار ۇرانى (سلوگان) تانىستىرىلعان. وسى ارقىلى نيدەرلاندتىقتار بالامالى ەنەرگەتيكا سالاسىنداعى وزىق تەحنولوگيالار مەن يننوۆاتسيالاردى ازىرلەۋدەگى ءوز جەتىستىكتەرىن كورسەتۋگە تىرىسقان. ينتەرنەت پايدالانۋشىلارى سايتتان نيدەرلاندتىقتاردىڭ ەكسپو-2017-گە قويىلاتىن ۇلتتىق پاۆيلونى تۋرالى اقپاراتتاردى, ءىس-شارالار باعدارلاماسىن, سونداي-اق, قازاقستان تۋرالى پايدالى ءمالىمەتتەردى تابا الادى.
ماسەلەن, سايتتىڭ قازاقستاندا بيزنەستى جۇزەگە اسىرۋ» تاقىرىبىنداعى ءبولىمىندە استاناداعى كورمە گوللانديالىق كاسىپكەرلەرگە بالامالى ەنەرگەتيكا, اۋىل شارۋاشىلىعى, «جاسىل» تەحنولوگيالار مەن يننوۆاتسيالار سەكىلدى سالالاردا ىسكەرلىك بايلانىستاردى جاقسارتۋعا ۇلكەن ءمۇمكىندىك بەرەتىنى ايتىلعان.
سونىمەن قاتار, بۇل ەلدە ستۋدەنتتەرگە – «جاڭاشىلداردىڭ بولاشاق بۋىنىمەن» جۇمىس ءجۇرگىزۋگە دە ايرىقشا كوڭىل بولىنگەن. بۇل رەتتە, نيدەرلاند دەلەگاتسياسى ەكسپو كورمەسى كەزىندە گوللانديالىق جانە قازاقستاندىق ستۋدەنتتەر اراسىندا ءبىلىم جونىنەن تاجىريبە الماسۋعا باعىتتالعان «Innovation Challenge» اكتسياسىن وتكىزۋدى كوزدەپ وتىر.
اتالعان سايتتىڭ رەسمي تۇردە اشىلۋ ءراسىمىنىڭ الدىندا قازاقستاننىڭ نيدەرلاندتاعى ەلشىسى ماعجان ءىلياسوۆ نيدەرلاندتىڭ ۇلتتىق كوميسسارى حانس دريسسەرمەن كەزدەستى. كەزدەسۋ بارىسىندا نيدەرلاندتىڭ ەكسپو-عا جانە 22-23 اقپان كۇندەرى استانادا وتەتىن حالىقارالىق كوميسسارلار جينالىسىنا قاتىسۋىنا دايىندىق بارىسى تالقىلاندى.
سونىمەن قاتار, قوس تاراپ نيدەرلاندتا ەكسپو-2017-گە ارنالعان رەسمي سايتتىڭ اشىلۋى استانادا وتەتىن حالىقارالىق كورمەگە قاتىسۋشىلار مەن قوناقتاردى كوپتەپ تارتۋعا سەپ بولاتىندىعىنا سەنىم بىلدىرۋدە.