2012 جىلعى 9-10 اقپان ارالىعىندا ەكسپو-2017 كورمەسىنىڭ كوميسسارى ءراپىل جوشىباەۆ گرەكيا رەسپۋبليكاسىندا جۇمىس ساپارىمەن بولىپ, ەل استاناسى افينا قالاسىندا بىرقاتار مەملەكەتتىك قىزمەتكەرلەرمەن كەزدەسۋ وتكىزدى.
ساپار بارىسىندا گرەكيانىڭ قورشاعان ورتا جانە ەنەرگەتيكا ءمينيسترى گەورگيوس ستاتاكيسپەن, ەكونوميكا جانە دامۋ مينيسترلىگىنىڭ باس حاتشىسى – گرەكيا ۇلتتىق سەكتسياسىنىڭ كوميسسارى يلياس كسانفاكوسپەن, سونىمەن بىرگە «Enterprice Greece» اتتى گرەكيانىڭ ءىرى ۇلتتىق كومپانياسىنىڭ توراعاسى حريستوس ستايكوستارمەن ەكىجاقتى كەزدەسۋلەر وتكىزىلدى. ەنەرگەتيكا جانە ەكونوميكا مينيسترلىگىندە وتكىزىلگەن كەزدەسۋ بارىسىندا ءراپىل جوشىباەۆ گرەكيالىق ۆەدومستۆو باسشىلارىمەن ەللادا ەلىنىڭ استانا قالاسىندا وتەتىن حالىقارالىق كورمەگە قاتىسۋ مۇمكىندىكتەرىن تالقىلادى. سونىمەن بىرگە, ول وسى كەزدەسۋدە ەلباسى نۇرسۇلتان نازارباەۆتىڭ قازاقستان حالقىنا ارناعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنىڭ ماڭىزىن تىلگە تيەك ەتتى. اتاپ ايتقاندا, ءراپىل جوشىباەۆ كەزدەسۋگە قاتىسۋشىلارعا ەلىمىزدىڭ جاڭا ەكونوميكالىق مودەلگە كوشكەندىگىن جانە تسيفرلى تەحنولوگيانى قولدانا وتىرىپ, يندۋستريانى دامىتۋدىڭ جاڭا مۇمكىندىكتەرىن بەلگىلەگەندىگىن اتاپ كورسەتتى. ەكسپو-2017 كورمەسىنىڭ كوميسسارى گرەكيالىق بيزنەسمەندەردى ءىت-ستارتاپتاردىڭ حالىقارالىق تەحنوپاركى ۇيىمداستىرىلاتىن ەلورداداعى حالىقارالىق كورمەگە بەلسەنە قاتىسۋعا شاقىردى.
ءوز كەزەگىندە گرەكيانىڭ ەنەرگەتيكا ءمينيسترى استانادا وتەتىن كورمەگە ءوز ەلىنىڭ حالىقارالىق ەكولوگيالىق ستاندارتتارعا سايكەستەندىرىلگەن ناقتى ەنەرگەتيكالىق ينفراقۇرىلىمدى پاش ەتەتىندىگىن ايتتى. گرەكيا جاڭعىرمالى ەنەرگيالىق قۋات كوزدەرىن دامىتۋ ماسەلەسىندە ەرەكشە ءتاجىريبە جيناقتاعان. بۇگىندە بۇل ەلدىڭ ەلەكتر ەنەرگياسىنا دەگەن قاجەتتىلىگىنىڭ 20 پايىزىن كۇن ەنەرگياسى قامتاماسىز ەتەدى. سونىمەن بىرگە, گرەكيا جاڭعىرمالى ەنەرگيا كوزدەرىن دامىتۋ ماسەلەسىندەگى بۇل مۇمكىندىكتەرمەن شەكتەلىپ قالماق ەمەس. 2020 جىلعا دەيىن بۇل ەل جاڭعىرمالى قۋات كوزدەرىنەن الىناتىن ەلەكتر ەنەرگياسىنىڭ ۇلەسىن 30 پايىزعا جەتكىزبەك.
كەزدەسۋ قورىتىندىسىندا, ەكسپو-2017 كورمەسىنىڭ كوميسسارى ر.جوشىباەۆ پەن گرەكيانىڭ ەكونوميكا جانە دامۋ مينيسترلىگىنىڭ باس حاتشىسى ي.كسانفاكوس گرەكيالىق تاراپتىڭ استانادا وتەتىن حالىقارالىق كورمەگە قاتىسۋى تۋرالى كەلىسىمشارتقا قول قويدى.
دايىنداعان
جىلقىباي جاعىپار ۇلى,
«ەگەمەن قازاقستان»