«نۇر وتان» پارتياسى توراعاسىنىڭ ءبىرىنشى ورىنباسارى سولتۇستىك قازاقستان وبلىسىندا بولدى. مۇحتار قۇل-مۇحاممەد وبلىس اكىمى ەرىك سۇلتانوۆپەن بىرگە وڭىردەگى ەڭبەك ۇجىمدارىمەن بىرقاتار كەزدەسۋ وتكىزدى, سونداي-اق, پارتيا اكتيۆىنىڭ الدىندا تۇرعان جۇمىستاردىڭ باسىم باعىتتارىن بەلگىلەپ بەردى.
ەلباسىنىڭ قازاقستان حالقىنا جولداۋىنىڭ ماڭىزىن ءتۇسىندىرۋ – «نۇر وتان» پارتياسى توراعاسى ءبىرىنشى ورىنباسارىنىڭ وڭىرلەرگە ساپارىنىڭ نەگىزگى ماقساتى. مۇحتار قۇل-مۇحاممەدتىڭ سولتۇستىك قازاقستان وبلىسىنا جوسپارلاعان جۇمىس كەستەسىندە بۇل ماسەلە باستى نازاردا بولدى.
سولتۇستىك قازاقستاندى بارلىق ۋاقىتتا دا ەڭ الدىمەن استىق جانە مال شارۋاشىلىعىمەن بايلانىستىرعانىمەن, بۇل جەردە ەكونوميكانىڭ باسقا سەكتورلارى دا ويداعىداي دامۋدا. مىسالى, 2015 جىلى وبلىستا پوليەتيلەن قۇبىرلارىنىڭ ءوندىرىسى جولعا قويىلدى. قۇنى 57 ميلليون تەڭگەنى قۇراعان جوبا مەملەكەتتىك يندۋستريالىق-يننوۆاتسيالىق دامۋ باعدارلاماسىنىڭ شەڭبەرىندە جۇزەگە اسىرىلدى. جاڭا زاۋىتتىڭ ديرەكتورى دميتري شاراپاەۆ – رەسپۋبليكامىزدىڭ باسقا بيزنەسمەندەرى ءۇشىن جاقسى ونەگە بولا الادى.
وقسانىنشى جىلدارى ءوز ءىسىن جاڭادان باستاعان كوپتەگەن كاسىپكەرلەردەي, ول دا حالىق تۇتىناتىن شەتەلدىك تاۋارلاردى جەتكىزۋمەن جانە وتكىزۋمەن شۇعىلداندى. ۋاقىت وتە كەلە, نارىقتىڭ قىرى مەن سىرىن مەڭگەرگەن كاسىپكەر ءونىمدى باسقا ەلدەن اكەلگەننەن گورى, ونى وسى جەردە شىعارۋدىڭ ءتيىمدى ەكەنىن ءتۇسىندى. وسىدان كەيىن د.شاراپاەۆ پلاستيكتەن جاسالعان ءۇيدىڭ كەرەك-جاراقتارىن وندىرەتىن ءوزىنىڭ ءبىرىنشى تسەحىن سالۋعا شەشىم قابىلدايدى. جىل وتكەن سايىن كاسىپورىننىڭ اينالىمى ءوسىپ, شىعاراتىن ءونىمى دە كوبەيە ءتۇستى.
بۇگىنگى تاڭدا ول حالىق تۇتىناتىن ونىمدەردىڭ 230 اتالىمىن نارىققا شىعارىپ وتىر. شيكىزات رەتىندە پايدالانىلعان قالدىقتار – پاكەتتەردى, پلاستماسسادان جاسالعان ونىمدەردى پايدالاناتىنى زاۋىتتىڭ ەرەكشەلىگى بولىپ تابىلادى. وسىنداي پايدالى «قوقىستى» قابىلدايتىن ورىندار قازاقستاننىڭ بارلىق جەرلەرىندە اشىلعان.
اتالعان كاسىپورىن باستاپقىدا ءتىركەلگەن ءوندىرىس قۋاتتىلىعىنا جەتە الماعان, مەملەكەتتىك يندۋستريالىق-يننوۆاتسيالىق دامۋ باعدارلاماسىنىڭ ايگىلى 72 جوباسىنىڭ قاتارىندا بولدى. بۇگىنگى تاڭدا بۇل ماسەلە شەشىلدى. اتاپ ايتساق, 2016 جىلى زاۋىت 2,5 ميلليارد تەڭگەنىڭ ءونىمىن شىعارىپ, ونىڭ بۇكىل قازاقستان مەن رەسەيمەن شەكارالاس اۋداندارىنا دەيىنگى جەتكىزىلىمىن قامتاماسىز ەتتى.
«نۇر وتان» پارتياسى توراعاسىنىڭ ءبىرىنشى ورىنباسارى سولتۇستىك-قازاقستاندىق بيزنەسمەننىڭ باستاماسىن قولداپ, مەملەكەت باسشىسىنىڭ ءۇشىنشى جاڭعىرۋعا ارنالعان حالىققا جولداۋىندا ىسكەر ادامدارىمىزدىڭ كاسىپكەرلىك تاپقىرلىعىنا ءۇمىت ارتىپ وتىرعانىن اتاپ ءوتتى.
وبلىستىڭ اگروونەركاسىپتىك كاسىپورىندارى ۋاقىتتىڭ جاڭا تالاپتارىنا ساي بولۋعا ۇمتىلادى. اۋىل شارۋاشىلىعىنداعى شيكىزاتتان كوپ پايدا تابا المايتىنىن مۇنداعىلار باياعىدا-اق تۇسىنگەن بولاتىن. سوندىقتان, ايماقتا جىل سايىن ءتۇرلى ازىق-ت ۇلىك ونىمدەرىن شىعاراتىن جاڭا زاۋىتتار مەن فابريكالار پايدا بولۋدا. بۇل ىستە «بوگاتىرسكي پرودۋكت» كومپانياسى تابىسقا جەتۋدە, ول ۇن, ماكارون ونىمدەرىن, تۇشپارا, قۇرعاق تاڭەرتەڭگى اس, كونديتەرلىك ونىمدەر ءوندىرۋدى جولعا قويدى. مۇحتار قۇل-مۇحاممەد ءوندىرىستى ارالاپ شىعىپ, جەرگىلىكتى بيزنەسمەندەردى ءوز زاۋىتتارىندا الدىڭعى قاتارلى ازىرلەمەلەردى ەنگىزە وتىرىپ, پرەزيدەنت جاريالاعان تەحنولوگيالىق جاڭعىرۋدى قولداۋعا شاقىردى.
«مەملەكەت باسشىسى ءوزىنىڭ جولداۋىندا اگرارلىق سەكتوردىڭ ەكونوميكانىڭ جاڭا درايۆەرى بولۋى ءتيىس ەكەنىن ەرەكشە اتاپ ءوتتى. ەلىمىزدىڭ ەڭ ءىرى سارقىلماس قورى بولىپ تابىلاتىن سولتۇستىك قازاقستاننىڭ اگرووندىرىستىك كاسىپورىندارىن جاڭعىرتىپ, عالامدىق باسەكەلى نارىققا شىعا الاتىن تاماشا مۇمكىندىگى بار», – دەپ اتاپ ءوتتى «نۇر وتان» پارتياسى توراعاسىنىڭ ءبىرىنشى ورىنباسارى.
«نۇر وتاننىڭ» وبلىستىق فيليالىندا وتكەن كەزدەسۋدە مۇحتار قۇل-مۇحاممەد جەرگىلىكتى پارتيالىقتارعا بۇگىنگى تاڭدا ەلباسىنىڭ جولداۋى بۇكىل سولتۇستىك قازاقستان وبلىسى حالقىنىڭ, اسىرەسە فەرمەرلەردىڭ قىزۋ تالقىلاپ جاتقانىن ايتىپ بەردى. شارۋالار پرەزيدەنتتىڭ اۋىل شارۋاشىلىعىن ساپالى دامىتۋ ماسەلەسىنە ايرىقشا نازار اۋدارعانىنا ءدان ريزا. ولار نۇرسۇلتان نازارباەۆتىڭ تىكەلەي قولداۋىنىڭ ارقاسىندا اگروونەركاسىپ كەشەنىنىڭ رەسپۋبليكامىزداعى ەكونوميكالىق ءوسىمنىڭ جاڭا قوزعاۋشى كۇشى بولا الاتىنىنا سەنەدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى