«ەلوردامىزدىڭ ءوسىپ-وركەندەۋىمەن بىرگە ۇلكەن ادەبي ورتا قالىپتاستى. قانشاما اقىن-جازۋشىلار, شىعارماشىلىق ادامدارى استاناعا كوشىپ كەلىپ جاتىر. دەگەنمەن دە, قازىرگى زاماندا ادەبيەتكە دە قورعاۋشى كەرەك بولىپ تۇر. مىنە, «ادەبيەت پورتالى» ينتەرنەت-جوباسى سول قۇندىلىقتارىمىزدى, ادەبيەتىمىزدىڭ اسىل مۇرالارىن ناسيحاتتاسا دەگەن ويىم بار», دەيدى قوعام قايراتكەرى مىرزاتاي جولداسبەكوۆ ادەبي پورتالدى تانىستىرۋ راسىمىندە.
ءيا, شىنىندا, اقپارات جانە كوممۋنيكاتسيالار مينيسترلىگىنە قاراستى «قازكونتەنت» اق «ادەبيەت پورتالى» – زامانۋي اقپاراتتىق تەحنولوگيالار جەتىستىگىن پايدالانا وتىرىپ, قازاق ادەبيەتىن ناسيحاتتاۋ, وقىرماندار مەن قالامگەرلەر اراسىنداعى ادەبي بايلانىستى جانداندىرۋ, ءتۇرلى شىعارماشىلىق ءىس-شارالاردى ۇيىمداستىرۋدى جۇزەگە اسىرىپ وتىرعان ورتالىق ازيا كەڭىستىگىندەگى تۇڭعىش عالامتورلىق بىرەگەي ادەبي جوبا.
– ادەبيەتتىڭ ءمانى ۇلكەن, – دەيدى بەلگىلى جازۋشى تولەن ابدىك. – ادامگەرشىلىكسىز ءومىر سۇرۋگە بولمايدى. بويىندا ونداي قاسيەت بولماعان ادام اڭعا اينالادى. ال ول ءبىلىمدى بولسا, تىپتەن قاۋىپتى. ادامگەرشىلىك قاسيەت ەڭ الدىمەن وتباسىنداعى تاربيە, سوسىن ادەبيەت ارقىلى بەرىلەدى. سوندىقتان, ادەبيەتتى, كىتاپ وقۋدى بارىنشا ناسيحاتتاۋ كەرەك. «ادەبيەت پورتالى» – قازىرگى تەحنولوگيانىڭ دامىعان كەزەڭىندە وسى ىسكە جاڭاشا سەرپىن بەرەدى دەگەن سەنىمدەمىن.
ءيا, پورتال وتاندىق رۋحاني ونىمدەردىڭ تسيفرلى فورماتتاعى بازاسىن قۇرۋ, قازاق, ورىس جانە وزگە تىلدە جازاتىن قازاقستاندىق قالامگەرلەردىڭ شىعارماشىلىعىن ناسيحاتتاۋ, جالپى, ادەبي ۇدەرىستى جانداندىرۋ ارقىلى قوعامدا بيىك تالعامنىڭ, مەملەكەتشىلدىك وي-سانانىڭ قالىپتاسۋىنا يگى ىقپال ەتۋدى كوزدەيدى.
– بۇل ادەبي پورتالدىڭ ءمۇمكىندىگى وتە كوپ, – دەدى اقپارات جانە كوممۋنيكاتسيالار ءمينيسترى داۋرەن اباەۆ. – تەحنولوگيانىڭ سوڭعى مۇمكىندىكتەرىن پايدالانا وتىرىپ, تەك جازبا تۇرىندە عانا ەمەس, وقىرماندارعا اۋديو, بەينەجازبالار ارقىلى دا قىزمەت ەتەدى. ەلدىڭ رۋحانياتىن دامىتۋعا اتسالىسىپ جاتقان مۇنداي پورتالدارعا مەملەكەت تاراپىنان ءۇلكەن قولداۋ كورسەتىلۋدە.
ءىس-شارادا سونداي-اق, اقىندار قالقامان سارين, قانات وماروۆ, جانات اسكەربەكقىزى جانە باسقا دا شىعارماشىلىق وكىلدەرى ءوز ويلارىن ءبىلدىرىپ, تۇڭعىش عالامتورلىق ادەبي جوباعا ساتتىلىك تىلەدى. مىنبەگە شىققانداردىڭ بارلىعىنىڭ ءسوز سوڭىندا وزىنە ۇنايتىن ءبىر ولەڭدى وقىپ بەرۋى بۇل شارانىڭ باستى ەرەكشەلىگى بولعانى انىق. بۇل كۇنى مينيستر دە, عالىم دا, جازۋشى دا جىردان شاشۋ شاشتى. ينتەرنەت جوبانىڭ جەتەكشىسى باۋىرجان قاراعىز ۇلىنىڭ ايتۋىنا قاراعاندا, ءدال قازىر ادەبي پورتال قورىندا 5 مىڭعا جۋىق
ەلەكتروندى كىتاپ بار ەكەن. جانە تاعى ءبىر ايتارى, بۇل پورتالعا كەز كەلگەن اقىن-جازۋشى ءوز ەڭبەكتەرىن سالىپ, الەۋمەتتىك جەلى رەتىندە پايدالانىپ, ءوز وقىرماندارىمەن بايلانىسا الادى. الداعى ۋاقىتتا قازاقستاندىق جانە شەتەلدىك ۇزدىك اقىن-جازۋشىلاردىڭ شىعارمالارى مەن سۇحباتتارى ءجيى بەرىلىپ تۇرماق.
ورالحان ءداۋىت,
«ەگەمەن قازاقستان»
استانا