بۇگىن استانا قالاسىنداعى نازارباەۆ ۋنيۆەرسيتەتىنىڭ كونفەرەنتس زالىندا «ادەبيەت پورتالى» ينتەرنەت-جوباسى جاڭا نۇسقاسىنىڭ تانىستىرىلىمى ءوتتى.
ءىس-شارادا اقپارات جانە كوممۋنيكاتسيالار ءمينيسترى داۋرەن اباەۆ, قوعام قايراتكەرى مىرزاتاي جولداسبەكوۆ, جازۋشى تولەن ابدىك, اقىندار قالقامان سارين, قانات وماروۆ جانە باسقا دا شىعارماشىلىق ادامدارى ءسوز سويلەپ, تۇڭعىش عالامتورلىق ادەبي جوباعا ساتتىلىك تىلەدى.
اقپارات جانە كوممۋنيكاتسيالار مينيسترلىگىنە قاراستى «قازكونتەنت» اق «ادەبي پورتالى» - زامانۋي اقپاراتتىق تەحنولوگيا جەتىستىگىن پايدالانا وتىرىپ, قازاق ادەبيەتىن ناسيحاتتاۋ, وقىرماندار مەن قالامگەرلەر اراسىنداعى ادەبي بايلانىستى جانداندىرۋ, ءتۇرلى شىعارماشىلىق ءىس-شارالاردى ۇيىمداستىرۋ جۇزەگە اسىرىپ وتىرعان ورتا ازيا كەڭىستىگىندەگى تۇڭعىش عالامتورلىق بىرەگەي ادەبي جوبا.
"بۇل ادەبي پورتالدىڭ مۇمكىندىگى وتە كوپ. تەحنولوگيانىڭ سوڭعى مۇمكىندىكتەرىن پايدالانا وتىرىپ, تەك جازبا تۇرىندە عانا ەمەس, وقىرماندارعا اۋديو, بەينە جازبالار ارقىلى دا قىزمەت ەتەدى. ەلدىڭ رۋحانياتىن دامىتۋعا ات سالىسىپ جاتقان مۇنداي پورتالدارعا مەملەكەت تاراپىنان ۇلكەن قولداۋ كورسەتىلۋدە", - دەيدى اقپارات جانە كوممۋنيكاتسيالار ءمينيسترى داۋرەن اباەۆ.
ءدال قازىر ادەبي پورتال قورىندا 5 مىڭعا جۋىق ەلەكتروندىق كىتاپ بار. جانە تاعى ءبىر ايتارى, بۇل پورتالعا كەز-كەلگەن اقىن-جازۋشىلار ءوز ەڭبەكتەرىن سالىپ, الەۋمەتتىك جەلى رەتىندە پايدالانىپ, ءوز وقىرماندارىمەن بايلانىسا الادى.
ورالحان ءداۋىت,
"ەگەمەن قازاقستان"