10 اقپان كۇنى ماسكەۋ قالاسىندا قىزىلوردا وبلىسىنىڭ اكىمى قىرىمبەك كوشەرباەۆ قر پرەمەر-ءمينيسترىنىڭ ءبىرىنشى ورىنباسارى اسقار مامين مەن رەسەي فەدەراتسياسى ۇكىمەتى توراعاسىنىڭ ورىنباسارى دميتري روگوزيننىڭ كەزدەسۋىنە قاتىستى. كەزدەسۋدە «بايقوڭىر» كەشەنى بويىنشا ىنتىماقتاستىق ماسەلەلەرى تالقىلاندى.
كەزدەسۋ بارىسىندا قىرىمبەك كوشەرباەۆ ايماق ءۇشىن ماڭىزدى ماسەلەلەردى, ونىڭ ىشىندە بايقوڭىر قالاسى تۇرعىندارىنىڭ جۇمىسپەن قامتىلۋى جانە «ەكسپو-2017» حالىقارالىق مامانداندىرىلعان كورمە قوناقتارى مەن قاتىسۋشىلارىن قارسى الۋعا دايىندىق جۇمىستارىن قوزعادى.
ەستەرىڭىزگە سالا كەتەيىك, 26 جەلتوقساندا قازاقستان رەسپۋبليكاسى مەن رەسەي فەدەراتسياسى مەملەكەتتەرى باسشىلارىنىڭ سانكت-پەتەربۋرگ قالاسىنداعى كەزدەسۋىندە تاراپتاردىڭ «بايقوڭىر» كەشەنىندەگى ۇزاق مەرزىمدى ارىپتەستىك تۇجىرىمداماسى بەكىتىلگەن بولاتىن.
تاراپتار «بايقوڭىر» كەشەنى بويىنشا ۇكىمەتارالىق كوميسسيانىڭ كەزەكتى وتىرىسىن وسى جىلدىڭ ءساۋىر ايىندا قىزىلوردا قالاسىندا وتكىزۋ تۋرالى كەلىسىمگە كەلدى.