كاسىپقوي بوكستا ەسىمى بۇكىل الەمگە تاراعان قازاقستاندىق بوكسشى مارات مازىمباەۆ جانات جاقيانوۆ پەن روۋشي ۋوررەن اراسىنداعى جەكپە-جەك جايلى پىكىرىن ءبىلدىردى. بۇل تۋرالى vesti.kz حابارلادى.
«جانات اقش جەرىندە ءوزىن جاقسى قىرىنان كورسەتەتىن مۇمكىندىك تۋدى. ەگەر وسى تيتۋلدىق كەزدەسۋدى جەڭسە, ۇلكەن جەكپە-جەكتەرگە جول اشادى. مۇنداي ساتتەر ومىردە ءبىر-اق رەت بەرىلەدى جانە ونى ءتيىمدى قولدانا ءبىلۋ كەرەك. ارينە, قارسىلاسى وتە مىقتى. ۋوررەننىڭ اۋەسقوي بوكستا تاجىريبەسى وتە مول. كاسىپقوي بوكستا الەم چەمپيونى اتانۋ وڭاي جۇمىس ەمەس. ەندى بارلىعى جاناتتىڭ قولىندا, دايىندىعىنا بايلانىستى. بۇل بوكس, مۇندا بارلىعى دا بولادى. ءبىر سوققى كەزدەسۋدىڭ قورىتىندىسىن شەشىپ جىبەرۋى مۇمكىن. جاناتتىڭ تىلەۋىن تىلەپ, جانكۇيەر بولىپ وتىرامىز», – دەدى مازىمباەۆ.
«ءوز باسىم جاناتتى جاقسى بىلەمىن. پروموۋتەرلىك قىزمەتپەن اينالىسىپ جۇرگەنىمدە بوكس كەشتەرىندە شارشى الاڭعا شىعىپ جۇرگەن. بۇل كەزدەسۋىن دە جەڭىسپەن اياقتاسا قاتتى قۋانار ەدىم. ول پسيحولوگيالىق تۇرعىدان وتە مىقتى ادام, سوققىسى اۋىر. كاسىپقوي بوكسشى ءۇشىن كەرەكتىڭ بارلىعى بار. جاناتقا جاقسى دايىندىق كەرەك. ول ۋوررەننىڭ تۋعان جەرىندە جۇدىرىقتاسپاقشى. ەگەر تەڭ ءتۇسىپ جاتسا, جەڭىستى ونىڭ قارسىلاسىنا بەرىپ جىبەرۋى ابدەن مۇمكىن. وسال تۇستارىن بايقاعان بويدا, سول جەرىنە سوققىلارىن قارشا بوراتۋى كەرەك. حاس باتىرعا ءتان بوكس كورسەتىپ, جەڭىسكە جەتەدى دەگەن ۇمىتتەمىن», – دەدى اتاقتى بوكسشى.
ايتا كەتەيىك, قوس بوكسشىنىڭ اراسىنداعى ايقاس 10 اقپاندا اقش-تا (استانا ۋاقىتىمەن 11 اقپاننىڭ تاڭعى ۋاقىتىندا) وتەدى.