وپەك ەلدەرىنىڭ مۇناي ءوندىرىسى قاڭتار ايىندا تاۋلىگىنە 1 ملن باررەلگە قىسقارىپ, جالپى ءوندىرىس كولەمى قازىر 32,06 ملن باررەلگە تەڭەستى, دەپ جازادى حالىقارالىق ەنەرگەتيكالىق اگەنتتىك.
ەستەرىڭىزگە سالا كەتەيىك, وتكەن جىلدىڭ 30 قاراشاسىندا وپەك ەلدەرى مۇناي باعاسىن كوتەرۋ ءۇشىن نارىقتا جاساندى تاپشىلىق جاساۋ ماقساتىندا ءوندىرىس كولەمىن تاۋلىگىنە 1,2 ملن باررەلگە دەيىن ازايتۋ تۋرالى شەشىم قابىلداعان ەدى. ارادا 10 كۇن وتكەندە وپەك-كە كىرمەيتىن وزگە دە مۇناي ەكسپورتتاۋشى ەلدەر وسى باستامانى قولداپ, تاۋلىگىنە 558 مىڭ باررەل ازايتۋعا كەلىسكەن. قازاقستان وسى ورايدا تاۋلىگىنە 20 مىڭ باررەل ازايتۋ تۋرالى مىندەتتەمە العان. كەلىسىم بويىنشا, اتالعان كورسەتكىش جىل ورتاسىنا دەيىن ورىندالۋى ءتيىس. دەگەنمەن, قازاقستان قازىردىڭ وزىندە تاۋلىگىنە 30 مىڭ باررەل ازايتىپ, وپەك+ مىندەتتەمەسىن ارتىعىمەن ورىنداپ جاتقانىن قر ەنەرگەتيكا مينيسترلىگى قاڭتاردا مالىمدەگەن ەدى.
وسىلايشا, قازىرگى تاڭدا وپەك ەلدەرى اتالعان كولەمنىڭ 90 پايىزىن قىسقارتىپ ۇلگەردى.
«ساۋد ارابياسى باستاعان كەي ەلدەر جوسپاردى ارتىعىمەن ورىنداۋدا. وعان سەبەپ ليۆيا مەن نيگەرياداعى ءوندىرىستىڭ ازايماۋى", - دەپ جازادى اگەنتتىك.