قازاقستان رەسپۋبليكاسى مەن گەرمانيا فەدەراتيۆتىك رەسپۋبليكاسىنىڭ اراسىندا ديپلوماتيالىق قاتىناستىڭ ورناتىلعانىنا 25 جىل تولادى, دەپ حابارلادى سىرتقى ىستەر مينيسترلىگىنىڭ ءباسپاسوز قىزمەتى.
شيرەك عاسىر ىشىندە قازاق-گەرمان قاتىناسى جوعارعى دامۋ دەڭگەيىنە جەتتى, ەكى ەل اراسىندا سەنىمدى جانە مازمۇندى ديالوگ ورنادى.
بەرىك قۇقىقتىق بازا قۇرىلىپ, قوماقتى كولەمدە ديالوگتىق الاڭدار مەن ينستيتۋتتار – ساۋدا-ەكونوميكالىق ىنتىماقتاستىق جونىندەگى ۇكىمەتارالىق جۇمىس توبى, قازاق-گەرمان ىسكەرلىك كەڭەسى, ورتالىق ازياداعى گەرمان ەكونوميكاسىنىڭ وكىلدىگى, بەرلين ەۋرازيالىق كلۋبى جانە ت.ب جۇمىس اتقارادى.
قر پرەزيدەنتى ن.نازارباەۆتىڭ 2012 جىلعى اقپان ايىندا بەرلينگە جاساعان ساپارى مەن گەرمانيانىڭ كانتسلەرى ا.مەركەلدىڭ 2010 جىلى استاناعا جاساعان ساپارى ەكىجاقتى ىنتىماقتاستىققا ايتارلىقتاي تۇرتكى بەردى.
قازاق-گەرمان ساۋدا-ەكونوميكالىق قاتىناسى تۇراقتى نىعايۋدا جانە ءوزارا ەكونوميكالىق ءوزارا ءىس-قيمىلعا جاڭا مۇمكىندىكتەر ىزدەستىرىلۋ ۇستىندە. قازىرگى تاڭدا قازاقستان ەكونوميكاسىنىڭ شەتەلدىك ينۆەستورلارىنىڭ اراسىندا گەرمانيا باستى وندىققا جانە مەملەكەتىمىزدىڭ ساۋدا سەرىكتەستىگىنىڭ باستى بەستىگىنە كىرەدى.
«سوڭعى جىلدارى قازاقستان گەرمان كومپانيالارىمەن بىرلەسىپ قۇرىلىس, ساۋدا, ونەركاسىپتىك ءوندىرىس جانە كەن ورىندارىن وڭدەۋ سالالارىندا 19 اۋقىمدى ينۆەستيتسيالىق جوبا جۇزەگە اسىرىلدى. Siemens, Knauf, MetroCash&Carry, Heidelberg Cement, Quaesta Capital, Linde AG جانە باسقا دا نەمىس كومپانيالارى ەلىمىزدىڭ ءىرى ارىپتەستەرى بولىپ تابىلادى», - دەلىنگەن حابارلامادا.
قازاقستان مەن گەرمانيا اراسىنداعى شيكىزات, ونەركاسىپ جانە تەحنولوگيالىق سالالارداعى ارىپتەستىك تۋرالى ورتاق كەلىسىمنىڭ ىسكە اسىرىلۋى ەكى ەل اراسىنداعى ساۋدا-ەكونوميكالىق ىنتىماقتاستىقتىڭ دامۋىندا ماڭىزدى ءرول اتقارادى.
گەرمانيا بالامالى ەنەرگيا سالاسىنداعى جاڭا زەرتتەمەلەردى ۇسىنا وتىرىپ, قازاقستاندا ەكسپو - 2017 كورمەسىن وتكىزۋ جانە وعان دايىندالۋ بارىسىنا بەلسەندى قاتىسادى.
2012 جىلدان باستاپ قازاقستاندا قوسارلى كاسىپتىك-تەحنيكالىق ءبىلىم بەرۋ سالاسىندا «نازارباەۆ-مەركەل» باستاماسى بويىنشا گەرماندىق مودەل ەنگىزىلۋدە. بۇل باستامانىڭ ماقساتى – گەرمانيانىڭ كاسىپتىك پالاتاسىنىڭ الدىڭعى قاتارلى تاجىريبەسىن كاسىپتىك-تەحنيكالىق ءبىلىم بەرۋدى دامىتۋ ءۇشىن قولدانۋ. قازاقستان مەن گەرمانيا باسشىلارىنىڭ باستاماسى اياسىندا حالىقارالىق ىنتىماقتاستىق بويىنشا گەرمان قوعامى جەلىسىمەن قازاقستاندا باسقارۋ كادرلارىن دايارلاۋ باعدارلاماسى ىسكە اسىرىلۋدا.
ەكونوميكالىق ىنتىماقتاستىقتان باسقا, قازاقستاندا تۇراتىن جانە قازاقستاننان گەرمانياعا قونىس اۋدارعان ەتنيكالىق نەمىستەر ماسەلەسىنە ۇلكەن ساياسي جانە تاجىريبەلىك ءمان بەرەمىز, سەبەبى بۇل ەكى ەل اراسىنداعى «بايلانىستىرۋشى كوپىر» بولىپ سانالادى. بۇل جاعداي ءبىزدىڭ ءوزارا ءوزارا ءىس-قيمىلىمىزدىڭ ماڭىزدى بولىگى بولىپ تابىلادى.
سونىمەن قاتار, 2016 ج. 8 قىركۇيەكتە بەرلين قالاسىندا كەزەكتى وتىرىسى وتكەن ۇكىمەتارالىق كوميسسيانىڭ قىزمەتى ماڭىزدى ءرول اتقارادى.
قازاق-گەرمان ۋاعدالاستىعىنىڭ رۋحى مەن قاعيدالارىنا سۇيەنە وتىرىپ, قازاقستان مەن گەرمانيا ءوزارا ءىس-قيمىل مەن ىنتىماقتاستىقتى تەرەڭدەتۋدى جالعاستىرۋدا جانە بىرىككەن دامۋ مەن گۇلدەنۋگە ءوز ۇلەستەرىن قوسۋدا.