بۇگىندە پارلامەنت ماجىلىسىندە ايەلدەردىڭ ۇلەسى 27 پايىزدى قۇراپ وتىر. 2006 جىلى بۇل كورسەتكىش نەبارى 10 پايىز عانا بولاتىن. بۇل تۋرالى بۇگىن استانادا «كورپوراتيۆتىك سەكتوردا ايەلدەردىڭ مۇمكىندىگىن كەڭەيتۋ» اتتى حالىقارالىق فورۋمدا قر مەملەكەتتىك حاتشىسى گۇلشارا ابدىقالىقوۆا مالىمدەدى. ونىڭ ايتۋىنشا, بۇكىلالەمدىك ەكونوميكالىق فورۋمنىڭ مالىمەتتەرى كورسەتكەندەي, 2016 جىلى قازاقستان ايەلدەردىڭ پارلامەنتتەگى ۇلەسى بويىنشا 144 ەلدىڭ ىشىندە 48-ورىندى يەلەنىپ وتىر. شاعىن جانە ورتا بيزنەستىڭ بەلسەندى بولىگىنىڭ 44 پايىزىن ايەلدەر باسقارادى. ولار شاعىن جانە ورتا بيزنەس سالاسىندا جۇمىس ورىندارىنىڭ 31 پايىزىن قامتاماسىز ەتۋدە.
«قازاقستان رەسپۋبليكاسى تاۋەلسىزدىك العالى بەرى ەلدىڭ بارشا ازاماتتارى ءۇشىن بارلىق سالادا قۇقىقتارىن تەڭ ەتۋ بويىنشا كەزەڭ-كەزەڭمەن جۇمىستار اتقارىپ كەلەدى. ءبىز 2006-2016 جىلدارعا ارنالعان گەندەرلىك تەڭدىك باعىتىنداعى ستراتەگيانى ءساتتى جۇزەگە اسىردىق. بەيجىڭ پلاتفورماسى پالاتاسىنىڭ ماقساتتارى اياسىندا ايەلدەردىڭ ەل دامۋىنداعى ۇلەسىن كەمىندە 30 پايىزعا جەتكىزۋ ماقساتىن ورىندادىق», - دەدى مەمحاتشى.
گۇلشارا ابدىقالىقوۆانىڭ ايتۋىنشا, ايەلدەر بيزنەسى مەملەكەتتىك باعدارلامالاردىڭ نەگىزىندە, ۇكىمەت پەن حالىقارالىق دامۋ ينستيتۋتتارى, ەقدب, بۇۇ دامۋ باعدارلاماسى, دۇنيەجۇزىلىك بانك جانە وزگە دە ۇيىمدارمەن كەلىسىمى نەگىزىندە دامىتىلۋدا. سونىمەن قاتار «قازاگرو» حولدينگى اۋىل ايەلدەرى اراسىندا كاسىپكەرلىكتى دامىتۋدى قولعا الۋدا. سوڭعى 3 جىلدا حولدينگ نەسيەلەرىنىڭ 32 پايىزى ايەلدەرگە بەرىلگەن. «وسىنىڭ ارقاسىندا قازاقستان دۇنيەجۇزىلىك ەكونوميكالىق فورۋمى ايەلدەردىڭ ەكونوميكاداعى ۇلەسى مەن بەلسەندىلىگى رەيتينگىسىندە 31-ورىنعا جايعاستى», - دەپ اتاپ ءوتتى ابدىقالىقوۆا.