ەكسپو-2017 كورمەسىنىڭ ۇيىمداستىرۋشى كەڭسەسىندە «استانا ەكسپو-2017» ۇلتتىق كومپانياسى» اق باسقارما توراعاسى احمەتجان ەسىموۆ پەن بۇۇ باس كوميسسارى, ەۋروپا مەن تمد ەلدەرى بويىنشا وڭىرلىك بيۋروسىنىڭ ديرەكتورى دجيحان سۇلتانوگلۋدىڭ كەزدەسۋى ءوتتى, ونىڭ بارىسىندا بۇۇ-نىڭ كورمەگە قاتىسۋى تۋرالى كەلىسىمشارتقا قول قويىلدى, دەپ حابارلايدى primeminister.kz.
كەزدەسۋ بارىسىندا تاراپتار ەكسپو-2017-گە دايىندىق ماسەلەلەرىن تالقىلادى. ا. ەسىموۆ بۇگىنگى تاڭدا 115 ەل مەن 18 حالىقارالىق ۇيىم كورمەگە قاتىساتىندىعىن راستاعاندىعى تۋرالى مالىمدەدى. 18 ەل پاۆيلوندارىن تاقىرىپتىق بەزەندىرۋگە كىرىستى. جاڭارتىلعان ەنەرگيا كوزدەرى سالاسىندا بۇۇ ەكسپوزيتسيالارى ەڭ ۇزدىك جوبالار مەن جەتىستىكتەرىن كورسەتەتىنىنە سەنىمدىلىك ءبىلدىردى.
ءوز كەزەگىندە, سۇلتانوگلۋ حانىم قازاقستاننىڭ تۇراقتى دامۋ ماقساتتارىن ىلگەرىلەتۋىن, سونداي-اق, مەملەكەتتىڭ تۇراقتى جانە راتسيونالدى ەنەرگيا سالاسىندا ىقپال ەتەتىن شارالار قولادانۋى مەن كەلىسىم جۇرگىزە الۋىن كوشباسشىلىقتىڭ بەلگىسى رەتىندە باعالادى.«ءبىز پرەزيدەنت ن. نازارباەۆتىڭ جاسىل تەحنولوگيالار ورتالىعىن اشۋ جايلى باستاماسىن قولدايمىز. سونىمەن قاتار, وسى جوباعا ءوز كومەگىمىزدى كورسەتۋگە دايىنبىز. تۇراقتى ەنەرگيا تاقىرىبىندا بۇل كورمە قازاقستان ءۇشىن تاپتىرماس مۇمكىندىك بولاتىنىنا سەنىمدىمىن. بۇۇ ءوز ۇلەسىن قوسۋعا دايىن», - دەدى د. سۇلتانوگلۋ.
د. سۇلتانوگلۋ ەكسپو-2017-دەگى بۇۇ-نىڭ باس كوميسسارى رەتىندە بۇكىل بۇۇ جۇيەسىنىڭ كورمە جۇمىسىنا قاتىسۋىن ۇيلەستىرەدى.