قازاقستاندىق شاڭعىشى ولگا پولتورونينا اۆستريادا ءوتىپ جاتقان الەم بىرىنشىلىگىندەگى دوپينگ داۋى جايلى ءوز پىكىرىن ءبىلدىردى.
«كەشكە قاراي بولمەمىزگە بەيتانىس ادامداردىڭ توپىرلاپ كەلىپ, قورشاپ العانىندا قىزىق ءبىر جاعدايدا قالدىق. ءوزىمىزدى سپورتشى ەمەس بەينە ءبىر قولىنا قارۋ ۇستاپ, تەررورلىق شابۋىل ۇيىمداستىرايىن دەپ جاتقاندار سەكىلدى سەزىنىپ قالدىق. الدىمەن دوپينگ تەكسەرىس بولدى, ارتىنشا پوليتسەيلەر بۇكىل بولمەلەردى ءتىنتىپ شىقتى. وسىدان كەيىن ءبارىمىزدى الىپ كەتىپ, سۇراقتىڭ استىنا الدى. ءتۇنى بويى كوز ىلمەي شىقتىق. مۇنىڭ سوڭى ءبىزدىڭ پايدامىزعا شەشىلەتىنىنە سەنىمدىمىن. سەبەبى, ءبىز تىيىم سالىنعان ءدارى-دارمەك قولدانعان ەمەسپىز», – دەدى پولتورونينا.
ايتا كەتەيىك, بىرەر كۇن بۇرىن جانارماي قۇيۋ بەكەتتەرىنىڭ بىرىندە بەلگىسىز سپورتشىلار مەديتسينالىق قالدىقتار سالىنعان قوراپتار مەن جارىس قۇجاتتارىن تاستاپ كەتكەن. مىنە, وسىلاردىڭ اراسىندا قازاقستاندىق كوماندا دارىگەرلەرىنىڭ قاعازدارى تابىلعان. اۆستريانىڭ دوپينگكە قارسى ۇلتتىق ورتالىعى وسىعان بايلانىستى سپورتشىلارىمىز ورنالاسقان قوناق ءۇيدى ءتىنتىپ شىقتى. ر-سپورت مالىمەتىنە سايكەس, تەكسەرۋ جۇمىستارىنا 30 پوليتسەي جۇمىلدىرىلعان.