ەلباسى بيىلعى جولداۋىندا ۇكىمەت پەن اكىمدەرگە بەس جىل ىشىندە 500 مىڭنان استام جەكە ءۇي شارۋاشىلىقتارى مەن شاعىن فەرمەرلەردى كووپەراتيۆتەرگە تارتۋ جونىندە تاپسىرما بەرگەنى ءمالىم. وسىعان بايلانىستى قر اۋىل شارۋاشىلىعى مينيسترلىگى الدىنا اۋىل شارۋاشىلىعى كووپەراتيۆتەرىن كەڭ اۋقىمدا قولداۋ جانە جەكە قوسالقى شارۋاشىلىقتاردى پايدالانۋ ارقىلى اۋىل تۇرعىندارىن جۇمىسپەن قامتۋ باعىتىندا ۇلكەن مىندەتتەر قويىلىپ وتىر. بۇل تۋرالى ورتالىق كوممۋنيكاتسيالار قىزمەتى وڭىرلىك فيليالىندا قر اشم وسىمدىك شارۋاشىلىعى ونىمدەرىن ءوندىرۋ جانە قايتا وڭدەۋ دەپارتامەنتى ستراتەگيا جانە تالداۋ باسقارماسىنىڭ باسشىسى نۇربولات ماقاشەۆ ءمالىم ەتتى, دەپ حابارلايدى قازاقپارات.
ونىڭ ايتۋىنشا, «اۋىل شارۋاشىلىعى كووپەراتيۆتەرى تۋرالى» قر زاڭىنىڭ وتكەن جىلدىڭ قاڭتارىنان كۇشىنە ەنگەنىنە قاراماستان, شارۋالار كووپەراتيۆتەردىڭ ەكونوميكالىق جاعىنان قانشالىقتى ءتيىمدى ەكەندىگىن تولىق سەزىنە قويعان جوق. كووپەراتسيا دەگەنىمىز - اۋىل شارۋاشىلىعى تاۋارىن وندىرۋشىلەردى ەكونوميكالىق تۇرعىدا بىرىكتىرۋ. مۇنداعى ارتىقشىلىقتاردىڭ ءمانى مىنادا, ەڭ الدىمەن ەڭبەك ونىمدىلىگى ارتىپ, وتكىزەتىن تاۋار مول بولعاننان كەيىن ونىمگە سۇرانىس تۇراقتالادى, ءوندىرىس قۋاتى ءتيىمدى پايدالانىلىپ, شىعىن ازايادى, ماركەتينگتىك اقپاراتقا قول جەتكىزىلەدى.
ەڭ باستىسى, مەملەكەتتىك قولداۋ شارالارى كورسەتىلەدى.سوندىقتان اركىم ءوز بەتىمەن, جەكە-جەكە ءومىر ءسۇرۋدىڭ ءتيىمسىز ەكەندىگىن تۇسىنەتىن ۋاقىت جەتتى. ودان دا بىرلەسىپ اۋىل شارۋاشىلىعى ونىمدەرىن قايتا وڭدەۋگە باعىت ۇستاپ, ءسۇت ونىمدەرىن قابىلدايتىن ورتالىق قۇرىلسا نەمەسە وتباسىلىق بورداقىلاۋ جانە مال سويۋ الاڭدارى اشىلىپ, ورتالىقتاندىرىلسا, اۋىل تۇرعىندارىنىڭ ۇتاتىنى انىق. «وسىعان وراي اۋىل شارۋاشىلىعى مينيسترلىگى «قازاگرو» ەنشىلەس ۇيىمدارى ارقىلى ءمودۋلدى ءسۇت قابىلداۋ جانە مال سويۋ ورتالىقتارىن العاشقى جارناسىز ليزينگكە بەرۋ سىزباسىن دايىندادى.
باستاپقى جارنا رەتىندە ينۆەستسۋبسيديا (50 پايىز) جانە ساتىپ الىنعان قوندىرعىلار كەپىلگە قويىلادى. اگروونەركاسىپ كەشەنىن دامىتۋدىڭ 2017-2021جىلدارعا ارنالعان مەملەكەتتىك باعدارلاماسى اياسىندا كووپەراتيۆتەردى دامىتۋ باعىتىندا مال شارۋاشىلىعى ونىمدەرىن سۋبسيديالاۋدىڭ جاڭا باعىتتارى قاراستىرىلدى. مىسالى, كووپەراتيۆتەردە وندىرىلگەن ءسۇتتىڭ ءبىر ليترىنە 10 تەڭگە, بورداقىلانعان وگىزشەلەردىڭ ءار باسىنا 20 مىڭ تەڭگە, قوزىعا 1500 تەڭگەدەن تولەنەدى. سونداي-اق قۇراما جەم ءوندىرىسىن ارزانداتۋ, بىرجىلدىق جانە كوپجىلدىق جەمشوپ داقىلدارىن سۋبسيديالاۋ, بيىلدان باستاپ كووپەراتيۆتەردى قولداۋ ماقساتىندا ولاردىڭ ساتىپ العان قۇرال-جابدىقتارىنا جۇمسالعان شىعىننىڭ 50 پايىزىن قايتارۋ كوزدەلگەن.
وعان قوسا «ىنتىماق» نەسيەلىك ونىمدەرى كووپەراتيۆتەردى قوسىمشا قارجىلاندىرۋعا باعىتتالسا, «يگىلىك» مال باسىن كوبەيتۋگە, «بىرلىك» ءسۇت قابىلداۋ ورتالىقتارىن, «بەرەكە» باعدارلاماسى وتباسىلىق بورداقىلاۋ الاڭىن قۇرۋعا قىزمەت ەتپەك. اۋىل شارۋاشىلىعىن دامىتۋعا باعىتتالعان شاعىن نەسيە (18 ملن. تەڭگە) 7 جىلعا بەرىلمەك»,- دەدى ن.ماقاشەۆ. بقو اۋىل شارۋاشىلىعى باسقارماسى باسشىسىنىڭ مىندەتىن اتقارۋشى سەرىك نۇرماعامبەتوۆتىڭ ءمالىم ەتكەنىندەي, ءوڭىردىڭ بىرقاتار اۋداندارىندا قازىردىڭ وزىندە كووپەراتيۆتەر قۇرىلىپ, جۇمىس جاساۋدا. الداعى ۋاقىتتا ولاردىڭ اياسى كەڭەيە تۇسەدى دەۋگە نەگىز بار. سەبەبى كووپەراتيۆتەرگە بىرىككەن جەكە قوسالقى شارۋاشىلىقتاردى پايدالانۋ ارقىلى ازىق-ت ۇلىك قاۋىپسىزدىگىن قامتاماسىز ەتۋ باعىتىندا بيىل باتىس قازاقستان وبلىسىنا 1 474 ملن تەڭگە بيۋدجەتتىك نەسيە ءبولۋ جوسپارلانۋدا.