ەلباسى نۇرسۇلتان ءابىش ۇلى نازارباەۆتىڭ بيلىك تارماقتارىنىڭ وكىلەتتىكتەرىن قايتا ءبولۋ تۋرالى ۇندەۋىن تاريحي ماڭىزى زور باستاما رەتىندە قۋانا قابىلدادىق.
مەملەكەتتىك دەڭگەيدەگى كەز كەلگەن شەشىم ماقساتسىز بولمايدى. بۇل تاۋەلسىز ەلىمىزدىڭ كەلەشەگىن ويلاعاننان جاسالىپ وتىرعان قادام ەكەنى ايتپاسا دا تۇسىنىكتى. الىپ ەلدىڭ تاعدىر-تالايىنا قاتىستى اسا ماڭىزدى ماسەلەلەردى شەشۋ جالعىز پرەزيدەنتكە شىن مانىندە تىم اۋىر سالماق. ەگەمەن ەل بولعاننان-اق پرەزيدەنتتىك باسقارۋ جۇيەسىن تاڭداپ العانىمىز دۇرىس بولعانىن ۋاقىتتىڭ ءوزى دالەلدەدى. وسى ۇستانىممەن الەمدىك دەڭگەيدەگى قانشاما جەتىستىكتەرگە جەتتىك. الەم جاڭا مەملەكەتتى كورىپ, جاڭا ەكونوميكامىز بەن جاڭا قوعامىمىزدى مويىندادى.
دەسەك تە, ناعىز دەموكراتيالىق ەل بولۋ ءۇشىن بيلىك ءبىر قولعا شوعىرلانباعانى ابزال. بيلىك تارماقتارىنىڭ وكىلەتتىگى مەن قۇزىرىن قايتا ءبولۋ ماسەلەسىن ەلباسىمىزدىڭ ءوزى كوتەرىپ وتىر. بۇل ول كىسىنىڭ مەملەكەت بولاشاعىن بولجاپ, جوعارى پاراساتپەن قابىلداعان شەشىمى: دارا بيلىكتەن القالى دانا بيلىكتى ءجون كورىپ وتىر.
جاريالىلىق سالتانات قۇرعان ەلدە ساياسي جۇيە حالىققا نەعۇرلىم جاقىن, تۇسىنىكتى بولۋى شارت. بۇل ءۇندەۋ سونداي ۇردىسكە شاقىرۋىمەن قۇندى. سوندىقتان, وسىناۋ قادامنىڭ تاريحي ماڭىزدىلىعىنا داۋ جوق. «قازاقستان – جاس, كوپ ۇلتتى, بولاشاعىنا سەنىمدى جانە قارقىندى دامىپ كەلە جاتقان مەملەكەت! ءبىز تاۋەلسىز قازاقستاننىڭ 25 جىلدىق دامۋ جولىنان وتتىك. الداعى 25 جىلدا بۇدان دا بيىك بەلەستەر كۇتىپ تۇر. مەملەكەت قۇرۋ جولىندا تەڭدەسسىز, مول تاجىريبە جيناپ, جاڭا كەزەڭگە قادام باسىپ وتىرمىز. الدىمىزدا قانداي قيىندىقتار كەزدەسسە دە, ولاردى ەڭسەرە الاتىنىمىزعا سەنىمدىمىن. ءبىزدىڭ باستى كۇشىمىز – ءبىرلىكتە», – دەدى پرەزيدەنت نۇرسۇلتان نازارباەۆ جاقىندا عانا جاريالاعان قازاقستان حالقىنا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا.
ەندىگىدە ۇكىمەت پەن پارلامەنتكە جۇكتەلەتىن جاۋاپكەرشىلىك جۇگى دە ارتا تۇسپەك. بۇل رەفورمانىڭ بارىسىندا اتا زاڭىمىز بەن وزگە دە قۇقىقتىق نورمالارعا, قۇزىرلى ورگانداردىڭ باعىت-باعدارىنا وزگەرىستەر ەنگىزىلۋى ءتيىس.
«كەڭەسىپ پىشكەن تون كەلتە بولماس» دەمەكشى, پرەزيدەنت جارلىعىنا سايكەس, كونستيتۋتسيالىق رەفورمالار جوباسىن تاۋەلسىز ەلىمىزدىڭ حالقى ورتاعا سالىپ, تالقىلاۋى ءتيىس. سول كەزدە ەل ەرتەڭىن ويلاعان ازاماتتار ءۇنسىز قالماۋى كەرەك. بۇل – ءبىزدىڭ ەرتەڭگى تاعدىرىمىز!
بەكزات التىنبەكوۆ,
قازاقستان حالقى اسسامبلەياسىنىڭ مۇشەسى, جەزقازعان قالالىق قوعامدىق كەلىسىم كەڭەسىنىڭ توراعاسى
قاراعاندى وبلىسى,
جەزقازعان قالاسى