جازۋشى تولەن ابدىكتىڭ درامالىق-پسيحولوگيالىق جانردا جازىلعان «وڭ قول» اڭگىمەسى وقىرمان قاۋىمدى قازاق ادەبيەتىندەگى جاڭاشىلدىعىمەن سەلت ەتكىزگەن شىعارما بولاتىن. قوستانايلىق جانىبەك كاربوزوۆ وتكەن جىلى ت.جۇرگەنوۆ اتىنداعى ونەر اكادەمياسىن ءتامامداردا وسى شىعارمانى ەكرانداۋعا بەل بۋعان ەكەن. سول ەڭبەگىن ءساتتى اياقتاپ شىعىپ, ديپلوم جۇمىسىن قورعاعاندا كوميسسيانىڭ جاقسى باعاسىن الدى ءارى ءبىلىم ورداسىن ۇزدىك ءبىتىردى.
– تولەن ابدىك مەنىڭ اتام كاكىمجاننىڭ تۋىس ءىنىسى بولادى. كوزىمدى اشقالى ۇيدە دە, اۋىلدا دا تولەن اتام تۋرالى ەستىپ, ونىڭ كىتاپتارىن بالا كۇنىمىزدەن وقىپ وستىك. بالا كەزدە «وڭ قول» اڭگىمەسىنەن «قورقاتىنبىز». تولەن اتامنىڭ وسى شىعارماسىنىڭ جەلىسىمەن فيلم تۇسىرۋگە اۆتوردىڭ وزىنەن رۇقسات سۇرادىم. ول كىسى قارسى ەمەستىگىن ايتىپ, باتاسىن بەردى, بۇل ارمانىما قانات بايلاعانداي بولدى, – دەيدى جاس رەجيسسەر جانىبەك كاربوزوۆ.
جانىبەك فيلمدە اڭگىمە ءماتىنىن سول كۇيىنشە العانىمەن, ول شىعارمانىڭ ەكراندىق نۇسقاسىنا ەشقانداي نۇقسان كەلتىرمەگەن. رەجيسسەر كوپ ىزدەنىستەرمەن وزىندىك شەشىمدەر جاساۋعا تالپىنادى. 30 مينۋتتىق قىسقا مەتراجدى فيلم كورەرمەنىن باۋراپ الادى, ويلاندىرادى. جازۋشى كۇندەلىكتى تىرلىكتە كوز ءۇيرەنبەگەن وعاشتاۋ وقيعانى اڭگىمەلەي وتىرىپ, وقىرمانىن الما ارقىلى ومىرگە ىنتىقتىرا تۇسەدى. رەجيسسەر دە شىعارما اۆتورىنىڭ وسى ويىن ءدوپ باسا بىلگەن.
– ەكرانداعى «وڭ قولدى» بەيجاي تاماشالاۋ مۇمكىن ەمەس. ۇرەي مەن ءۇمىت قوس قاناتىڭا اينالىپ, تىلسىم ءبىر الەمگە ساپار شەككەندەي اسەرگە ەنەسىڭ. ءبارى شىنايى. تولەن ابدىك وسى تۋىندىسى ارقىلى وقىرمانىنا وي الەمىندەگى جاۋاپكەرشىلىگىن سەزدىرسە, جانىبەك وعان جاستىققا ءتان رومانتيكا, رەجيسسەرلىك شەشىمىن قوسقان. ول قىز بەن جىگىت اراسىنداعى بەيكۇنا ەپيزودتاردى ءساتتى بەرە بىلگەن. اڭگىمەدە المانىڭ اناسى ايتىلسا, كينودا اكەسى كورىنىس تابادى. دارىگەردىڭ قولىنداعى «اكە» كىتابى دا كەزدەيسوقتىق ەمەس, تۇسپال ءتارىزدى. سول ارقىلى المانىڭ ولىمىنە كىنالى ادامنىڭ سۇلباسى كورىنەتىندەي, – دەيدى كينونىڭ تۇساۋكەسەرىن كورگەننەن كەيىن وي ءبولىسكەن جۋرناليست, اقىن ابىلاي ماۋدانوۆ.
قازاق كينوسىنداعى درامالىق-پسيحولوگيالىق جانردىڭ قارلىعاشى دەۋگە لايىق «وڭ قول» بۇگىنگى كۇننىڭ كۇيىپ تۇرعان تاقىرىبىنىڭ ءبىرى – سۋيتسيد ماسەلەسىن تۇسپالداپ قوياتىنداي. الما نەگە ءوز قولىنىڭ قۇربانى بولدى؟ الدە جاقسىلىق بار جەردە جاماندىق جۇرەتىنى, ادام ءوز بويىنداعى جاقسىلىقتىڭ ەمەس, جاماندىقتىڭ قۇربانى بولاتىنىن ايتقىسى كەلدى مە؟ كورەرمەن ويى سان-ساققا كەتەدى. قايتكەندە دە رەجيسسەر جازۋشىنىڭ ويىنان شىعۋعا تىرىسقان.
فيلمدە دارىگەردىڭ ءرولىن ع.مۇسىرەپوۆ اتىنداعى جاستار تەاترىنىڭ اكتەرى اسەت ەسجان, المانىڭ ءرولىن ت.ءجۇرگەنوۆ اتىنداعى ونەر اكادەمياسىنىڭ 3-كۋرس ستۋدەنتى زۋحرا سايپي وينايدى. ەكەۋى دە شىنايىلىعىمەن كورەرمەنىن سەندىرە ءبىلگەن. المانىڭ اكەسىنىڭ ءرولىن كورەرمەنگە ەرمەك تۇرسىنوۆتىڭ «شال» فيلمىنەن جاقسى تانىس ەربولات توعىزاقوۆ الىپ شىقتى. ءفيلمدى مۋزىكامەن كومپوزيتور ۇشقىن جامالبەك كوركەمدەدى. ايتپاقشى, ءفيلمدى كورگەننەن كەيىن تولەن اعا جاس رەجيسسەردىڭ تالابىنا ريزاشىلىعىن ءبىلدىرىپتى.
ال جانىبەك كاربوزوۆتىڭ وسىعان دەيىن تۇسىرگەن قىسقا مەتراجدى «بوراندى تۇندە» جانە «كاۋسارىم» فيلمدەرىن كورەرمەن جىلى قابىلداعان بولاتىن.
ءنازيرا جارىمبەتوۆا,
«ەگەمەن قازاقستان»
قوستاناي